Abapingushi 3
3
Imishobo yakwesha abena Israeli iyashele
1Iyi e mishobo Yawe ashile iyakweseshako bonse abena Israeli abo abashabalile abalwako inkondo mu calo ca Kenani. 2Yawe acitile ifi pakusambilisha indupwa sha bena Israeli ishishaishibe ifyakulwa inkondo. 3Neyi imishobo yali ni bakateeka basano bonse aba bena Filisiti, bonse abena Kenani, abena Sidoni na bena Hifi abaleikala ku mpili sha ku Lebanoni ukufuma ku lupili lwa Baali Hemoni ukufika ku Lebo Hamati#3:3 Lebo Hamati: Ishiwi lya Lebo lilanda apakwingilila ku musumba wa Hamati.. 4Aba bonse babashile mukwesha abena Israeli pakumona nga cakuti kuti banakila ifipope fyakwa Yawe ifyo akonkomeshe kuli bashibo, ukupitila muli Mose. 5Kanshi abena Israeli baleikala pakati ka bena Kenani, abena Hiti, abena Amoli, abena Perisi, abena Hifi elyo na bena Yebusi. 6Baleupa abana banakashi ba iyi mitundu kabili no kuufya abana babo abanakashi ku bana abaume ba iyi mitundu, kabili balapepa ne milungu yabo.
Umupingushi Otinieli
7Abena Israeli bacitile ifyabipa pa cinso cakwa Yawe no kulaba kuli Yawe Lesa wabo, no kulabombela utulubi tu Baali na tu Ashera. 8Ecalengele ubukali bwakwa Yawe ukwisa pa bena Israeli, icakuti abaposa na mu maboko yakwa Kushani Rishataimu imfumu ya mu Aramu Naraimu#3:8 Aramu Naraimu: Ba Baibele bambi batila ku masamba ya Mesopotamia., uko bateekelwe ubusha pa myaka cine konse konse. 9Lelo ilyo abena Israeli balilile kuli Yawe, nao abemishe uwakubalubula, Otinieli, mwana Kenasi umwaice wakwa Kalebu, uyo uwabalubwile. 10Umupashi wakwa Yawe waishile pali ena elyo nao atendeka no kulapingula pa bena Israeli. Aile na ku nkondo, kabili Yawe apeele Kushani Rishataimu imfumu ya mu Aramu mu maboko yakwa Otinieli, uyo uwamucimfishe. 11Kanshi icalo conse caikele mu cibote pa myaka amakumi yane mpaka ilyo Otinieli mwana Kenasi afwile.
Umupingushi Ehudi
12Kabili abena Israeli balibwekeshepo ukucita ifyabipa pa cinso cakwa Yawe, na pa mulandu wa ifi fintu bacitile, Yawe abapeele mu maboko ya mfumu Egiloni, uwa mu Moabu. 13Egiloni bauminkene pamo na bena Amoli elyo na bena Amaleki, baya lwisha no kucimfya abena Israeli, kabili bapokolwele no musumba wa Tuncindu#3:13 Ekutila umusumba wa Yeriko, Amafu 34:3.. 14Abena Israeli bateekelwe ubusha ku mfumu Egiloni iya mu Moabu pa myaka ikumi limo na cine konse konse (18).
15Lelo ilyo abena Israeli balilile kuli Yawe, nao abemishe uwakubalubula, Ehudi, uyo uwalebomfya ukuboko kwa ku kuso, mwana Gera umwina Benjamini. Uyu wine eo abena Israeli batumine ukubatwalila umusonko ku mfumu ya bena Moabu. 16Nomba Ehudi alifulile ulupanga ulwatwa konse konse, ulwalepa mupepi na citika wa mita umo#3:16 Mu Cihibulu batila abati, “ulwalepa kubiti umo.”, alukakila ku lutungu lwakwe kwitanta lya ku kulyo mukati ka fyakufwala. 17Awe atwele umusonko kuli Egiloni imfumu ya mu Moabu. Iyi mfumu yali iyaina nganshi. 18Cilya Ehudi apwisha ukutuula umusonko, aeba abantu abasendele uyu musonko ukubwelelamo. 19Nomba ena abweluluka ilyo bafikafye ku tulubi twa mabwe mupepi na ku Giligali, nokwisa eba imfumu Egiloni ati, “Ine ndi ne lyashi lyankaama ilyakulanda nobe we Mfumu.” Nayo imfumu epakweba abantu aiti, “Lekeni icongo.” Awe na babomfi ba kwisano bonse abali nankwe, bafuma baya.
20Elyo Ehudi aya umo imfumu yaikele yeka mu muputule wa pamulu uwakupupwamo umwela, nokutila, “Ine ndi ne lyashi ilifumine kuli Lesa ukuti nkwebe.” Kanshi imfumu epakwima na pa cipuna yaikele. 21Elyo Ehudi abuulila ulupanga ku kuboko kwakwe ukwa kuso ukufuma mu lutungu lwe tanta lya ku kulyo, no kulasa imfumu mu lufumo. 22Icitubo ca lupanga naco cine caliingile pamo ne cilimi. Amafuta yacilikapo, kabili Ehudi tasomwene ulupanga. Ubusali nabo bwafumina na kunse. 23Kanshi Ehudi epakufumina kunuma ya ŋanda#3:23 Ili shiwi ilya mu Cihibulu talyaishibikwa bwino umo lyalola., ninshi nasha naisala no kufunga ifiibi fyonse ifya pa muputule wa pamulu.
24Panuma ninshi naya, ababomfi ba mfumu baisa sanga ifiibi fya muputule wa pamulu nafikomwa. Nabo batile, “Imfumu ifwile ili mu cimbusu ileyafwilisha.” 25Kanshi epakwikala balapembela pa nshitafye iyitali mpaka cabapesha amano. Lelo ilyo bamwene ukuti teswileko ku ciibi ca muputule, babuulile imfungulo no kwisulako iciibi. Awe bamwene imfumu yabo naiwa panshi, naifwa.
26Ehudi afyukile ninshi bena bacili balepembela, aya acila na pa tulubi twa mabwe, afyukila na ku Seira. 27Na lintu afikile kulya, aya lisha ipenga mu calo ca mpili icakwa Efulemu, kabili abena Israeli baile pamo nankwe ukufuma mu calo ici ica mpili. Ehudi ewali e ntungulushi pakati kabo. 28Elyo abeba ati, “Nkonkeni, pantu Yawe napeela abena Moabu, abalwani benu, mu maboko yenu.” Eico nabo balimukonkele, no kuyapokolola ifyabu fya mumana wa Yordani ifyalebomfya abena Moabu. Tabalesuminisha umuntu nelyo umo ukwabuka nakalya. 29Pali iyo ine nshita baipeye ifita fyabulamba, ifyamaka fyeka fyeka, ifya bena Moabu ukulingana na makana ikumi limo (10,000), tapashele nelyo umo uwakufyuka. 30Pali bulya bwine bushiku abena Israeli bacimfishe abena Moabu bonse. Kabili ukutula pali ilya nshita, icalo caikele mu cibote imyaka amakumi cine konse konse (80).
Umupingushi Shamuga
31Panuma yakwa Ehudi pakonkele Shamuga mwana Anati, uyo uwaipeye abena Filisiti imyanda mutanda (600). Abepeye ku musokofyo wakusokwelako iŋombe pakuti shileendesha. Nao wine alipuswisheko abena Israeli.
Currently Selected:
Abapingushi 3: ILL15
Highlight
Copy
Compare
Share
Want to have your highlights saved across all your devices? Sign up or sign in
Bible Society of Zambia
