Esaya 8

Umwana umwaume uwakwa Esaya afyalwa

1Yawe alinjebele ati, “Buula icakulembapo cimo icikulu, ulembepo ifilembo ifikulu utile, ‘Maeri Shalali Hashi Basi’#8:1 Ili shina mu Cihibulu lyatila, “Uwangufyanya ukutapa, uwanguka ukusampa.”. 2Unjitileko abantu abacishinka, shimapepo Ulia na Sakaria mwana Yeberekia, pakuti ebo bese babe bakambone bandi.”

3Ilyo nasendeme no mukashi wandi, uwali kasesema wa mashiwi yakwa Lesa, awe aimita asuka afyala no mwana umwaume. Elyo Yawe anjeba ati, “Mwinike ishina lya Maeri Shalali Hashi Basi. 4Pantu umwana akalati talaishiba nakutila, ‘Tata’ nangu ‘Mayo’, ninshi imfumu ya Asiria yalisenda kale ifyuma fyonse ifya Damasiko no kutapa Samaria onsefye.”

Imfumu ya Asiria yalaswa ise

5Yawe alinsoseshe nakabili, 6alanjeba ati, “Pa mulandu wakuti aba bantu nabakaana amenshi ya mu kamana ka Shiloa#8:6 Shiloa e kamana ako intulo yakako iyikulu yabela lwa ku kabanga ka Yerusalemu. ayapitafye tondolo, na pa mulandu wakuti aba bantu balesekela pa fikaponena imfumu Resini, ne mfumu mwana Remaliya, 7kanshi ine ne Yawe nalaya buula imfumu ya Asiria ne fita fyaiko fyonse, uleke ise isanse icalo ca Yuda. Abena Asiria bakulaisa nge lyeshi lya mu mumana wa Yufurate uupongwele. 8Baleisa pongwela nge lyeshi pa calo ca Yuda, amenshi yaleisa pelela mu mikoshi, no kubunsha icalo conse. Ukufunguluka kwa mapindo yakwe kukakupa icalo cobe we Imanueli#8:8 Imanueli: Ekutila, “Lesa twaba nankwe.”.

9“Icefyeni imwe mwe mishobo ya benafyalo kabili tiineni, mukafwantaulwa.

Kutikeni imwe bonse mwe baikala mu fyalo fyakutali.

Pikileni ifyanso fyenu, lelo kwena mukafwantaulwa.

Ee, akupekanyeni, lelo kwena mukafwantwa.

10Pekanyeni ifyo muli nokucita, lelo kwena tamwakaficite nakalya.

Landeni fyonse ifyo muteyenye ukucita, lelo kwena muleicushafye,

pantu Lesa ifwe twaba nankwe#8:10 Lesa ifwe twaba nankwe: Mu Cihibulu muleti, “Imanueli.”.”

Yawe asoka kasesema Esaya

11Yawe alinsokele pa maka ine ne Esaya, kabili alinsokele ukuti nilakonkelela imisango iyo abantu bakwete. 12#1 Pet 3:14-15Alinjebele ati, “Iwe wilakonkelela mufyo abantu balecita, kabili tecakwesha kulatiina ifyo bena baletiina. 13Uleibukishafye ukuti Yawe umwine wa fita, ena wamushilo, kanshi eo uli nokulakwatila akatiina. Ena ekafye eo uli nokulatutuma. 14#1 Pet 2:8Ena akaba icifulo icamushilo, nomba ku ba mu mayanda yonse yabili ayakwa Israeli akaba ilibwe ilyo abantu baipununako, no kubalenga ukutalansuka no kuwa. Ku ba mu Yerusalemu, akaba icitembo kabili iciteyo cakwikatwako. 15Kanshi bengi bakulaipununako, no kuwa bakulawa. Bakulawa no kufunika bakulafunika. Ee, bakulaikatwa ku citeyo.”

Ukusoka abantu abafwaya ukupandwa amano ku bafwa

16“Ukakilile ubunte ubu, kabili ukonkomeshe amafunde aya mu basambi bandi. 17#Bahi 2:13Yawe aliifisa ku ba ŋanda yakwa Yakobo, lelo ine nalimutetekela, no kumulolela ine ndamulolela.

18 # Bahi 2:13 “Moneni epo ndi, ine pamo na bana abo Yawe ampeela. Yawe umwine wa fita, uo icipuna cakwe icabufumu caba pa lupili lwa Sioni, nifwe abika ukuba ifishibilo kabili nge fyakumwenako kukushinina abena Israeli.

19“Abantu nga balamweba ukwipusha imilandu ku bantu ababuka na bapendula, abalongofyanya pakulanda, nangu abatamantama pakulanda, ubaasuke auti, ‘Bushe abantu teti bepushe Lesa wabo? Mulandu nshi bengalaipushisha imilandu ya bomi ku mipashi ya bafwa?’ 20Ku mafunde na kufyo Lesa amukonkomesha eko muloleshe, nga tabasosa ukulingana nefi ninshi tamwaba ulubuuto muli bena.”

Inshita ya ntulubundi

21Abantu bakalalulumbafye mu calo, ilyo ninshi nabapelelwa, kabili ninshi nabafwa ulushile ku nsala. Pakuba ne insala ifyo, bakafulwa nganshi. No kupunamina kumulu, bakatuka imfumu yabo iyabateeka, bakatuke na Lesa wabo wine. Bakalati bapunamina mumulu, 22elyo kabili balolesha amenso panshi, awe bakamonafye ubucushi bweka bweka ne mfifi no bunkukwa. Bakasunkilishiwa na mu mfifi iyikalamba.

Currently Selected:

Esaya 8: ILL15

Highlight

Copy

Compare