Esaya 56
56
Lesa akapususha na benafyalo
1Ifi efyasosa Yawe ati,
“Imwe mulecita ubupingushi no mulinganya.
Kabili mulecita ifyalungama,
pantu ukupususha kwandi nakupalama,
kabili ubulungami bwandi buli nokusokololwa.
2Akulaba uwapaalwa umuntu onse uucita ifi fintu,
no mwana wa muntu onse uubikako amano no kwikatisha ukucita ifisuma,
uucindika lyonse ubushiku bwe Sabata ukwabula ukulacitamo ifyabindwa,
elyo no kukanacita ifyabipa nelyo fimo.
3“Umwinafyalo uwaisa ilunda kuli ine ne Yawe elatila ati,
‘Yawe ine akampatulako ku bantu bakwe.’
Mutungwi nao elaesha kusosa ati,
‘Moneni ine nabafye nge cimuti icauma.’
4Yawe aletila kuli bamutungwi,
‘Imwe nga mwalancindika pakubika imitima yenu ku nshiku shandi ishe Sabata,
kabili nga mwalacita nefyo ine mfwaya,
mwalasunga bwino ne cipangano candi,
5ninshi ine nkamupeelapo cimo mu ŋanda yandi na mu fibumba fyaiko,
icibukisho ne shina ilyawamisha ukucila pa bana abaume na banakashi.
Nkamupeela ne shina ilishakalabweko kabili ilishakalobe.’
6“Imwe mwe benafyalo, mwe baisa ilunda kuli ine ne Yawe,
imwe mwe batemwa ishina lyandi, mwe bamombela,
mwe babika umutima ku nshiku she Sabata ukwabula ukulacitamo ifyabindwa,
mwe basunga bwino ne cipangano candi.
7 #
Mateo 21:13; Mako 11:17; Luka 19:46 Imwe nkamuleta ku lupili lwandi ulwamushilo,
nkalamusansamusha mu ŋanda yandi iyakupepelamo.
Nkalapokelela amalambo yenu ayakoca,
pamo pene na malambo yambi ayo mukalantuula pa bulambo bwandi.
Pantu iŋanda yandi ikalaitwa iŋanda iyakupepelamo abantu aba mishobo yonse.”
8Efyasosa Yawe umwine wa maka yonse, uulonganya bankole abena Israeli.
“Nkalonganya na bambi abantu
ukusansha pa bantu bandi abo nalonganya kale.”
Yawe aebaula intungulushi sha bena Israeli
9Iseni mwe fiswango fyonse ifya mu mpanga,
na imwe mwe fiswango fyonse ifya mu mutengo iseni mubacibaule.
10Pantu intungulushi shonse ishaba no mulimo wakusoka abantu bandi,
awe ni mpofufye sheka sheka.
Tashaishibapo nelyo kamo.
Shabafye nge mbwa shimalonda ishishibosa,
ishaikalilafye ukulalala utulo no kulalota, epela,
ishatemwa ukulayolwela pa bulele.
11Ishi ntungulushi shaba nge mbwa ishatemwisha ukulya
tashiikuta nakalya.
Bacemi impelwamano.
Bonse umo umo bacitilafye umo balefwaila,
cila umo akonkelelafye ubunonshi bwakwe epela.
12Basosa abati, “Iseni, katulete bane umwangashi,
natunwenshe no bwalwa ubwaluma, uleke tusansamuke.
Nga ni mailo lyena, awe cikacilapo pali lelo ku busuma.”
Currently Selected:
Esaya 56: ILL15
Highlight
Copy
Compare
Share
Want to have your highlights saved across all your devices? Sign up or sign in
Bible Society of Zambia
