Esaya 28
28
Ukusoka abena Efulemu
1Yalishama amataki ya bacakolwa wa bena Efulemu.
Ukucindama kwabo kwile kulepwa,
kwati citebo ca maluba ayalebonsa.
Walishama umusumba wabo uwabela pa mulu we wanga ilyafunda,
umwaikala abantu abanashiwa ku mwangashi.
2Moneni, Yawe alipo na umo uwabulamba,
uo alatuma nge mfula ya mabwe, nge cipungufula.
Akesa nge cikuku cabonaushi,
nge lyeshi ilifimbene ilileisa ulubilo.
Kabili akacifuntula panshi na maka.
3Icitebo ca maluba icamataki ica bacakolwa wa bena Efulemu
ala cileisa nyantaulwapo.
4Ukucindama kwa musumba wabo kulepwa,
ulya uwabela pa mulu we wanga ilyafunda,
awe kwalapwa nga makunyu aya bangililapo ukutwala mu mwaka,
ayo abantu bamona no kusaba no kuya lyafye lilya line yapya.
5Pali ubo bushiku Yawe umwine wa fita ewalaisa ba kwati e ŋana ya maluba kabili iyalulumbi,
iyakuti abantu bakwe abalepusuka baleitakishishapo.
6Abantu abaputula imilandu ya banabo ni Lesa ewaisa balangako umwalola umulinganya,
kabili ewaisa kosha na bantu abatamfya abalwani
balya besa mukusansa impongolo sha musumba.
Esaya na bakasesema ba mu Yerusalemu bacakolwa
7Na bakasesema bene kumo kwine na bashimapepo,
nabo bene tepakukolwa ubwalwa kabili balatalansuka pakwenda.
Balanwa nganshi umwangashi uukola ne fikola fimbi ifyamaka,
icakuti alewishikanafye kulwa kufulungana amano.
Bakasesema nabakolwa
icakuti balefilwa no kwiluka ifimonwa ifyo Lesa alebalanga.
Na bashimapepo bene nabo nabakolwa
icakuti balefilwa no kuputula imilandu iyo abantu baleleta uko bali.
8Amatebulo yabo umo bekala nayalamba yonse ku malushi,
tapali nangu pamo apashele apasuma.
9Balailishanya abati, “Bushe ulya Esaya abo alefwaya ukufunda, ni bani?
Bushe ni bani alelondolwela amashiwi yakwe?
Bushe alefunda utunya utusumwike kwibele
nangu utwaice utwaleka ukonka?
10Esaya ena pakufunda aikalilafye ati,
‘Mulecita ifi ne fi, ifunde pefunde,
umulingo pa mulingo, akaninini apa, akanini palya.’”
11 #
1 Kol 14:21
Cisuma balya nga tabalefwaya kulaumfwa kuli ine,
kanshi ninshi Yawe umwine akabatumine abenafyalo,
ababulubusa pakulanda mu ndimi shimbi shimbi,
uleke ebo bakese mukulabafunda.
12Nikuli balya bene Lesa atile, “Ici e cifulo cenu icakutuushapo,
iseni bonse mwe banaka pakuti mulepemwinako,”
lelo bena balikaana ukumumfwa.
13Eico Yawe alanda amashiwi kuli bena ati,
“Mulecita ifi ne fi, ifunde pefunde,
umulingo pa mulingo, akanini apa akanini palya,
pakuti bawe cimfutyanuma pakwenda bafunike,
bawile mu citeyo no kubekata bunkole.”
Ilibwe lya petungi ilyakubika mu mufula wa Sioni
14Umfweni ifyo Yawe alesosa imwe mwe bantu bacilumba,
mwe bateeka aba bantu ba muno Yerusalemu.
15Imwe mulaitakisha ukuti mwalyumfwana ne mfwa,
nokuti imwe mwalipangana ne calo ca bafwa.
Imwe mwalishininkisha ukuti icinkunka ilyo cikesa, imwe tacakamukume iyoo,
pantu imwe mwaikalila ubufi no bucenjeshi pakuti efyo filemupusushako.
16 #
Amalu 118:22-23; Roma 9:33; 10:11; 1 Pet 2:6 Kanshi nomba Imfumu Yawe aletila ati,
“Moneni ndebika ilibwe mu Sioni,
ilibwe limo ilyakosa,
ilibwe lya petungi ilyacindamisha ilyakukosha umufula.
Onse uwacetekela takafupuke.
17Umulinganya ewalaba umwando uwakupiminako ubutali bwa mufula,
no bulungami e kacela ka ku mwando akakupiminako ukololoka kwa mufula.
Elyo imfula yacitalawe yena eikapwisha ubufi bwenu bonse ubo mwaikalila,
ne lyeshi elikesa senda ifyo mupusukilamo.”
18Icumfwano cenu ico imwe mwaumfwana ne mfwa, ala cikapwa,
ne cipangano ico mwapangana ne calo ca bafwa, ala naco cine tacakeminine.
Ilyo icinkunka icabipisha cikesa tamwakashanseko iyoo.
19Lyonsefye ilyo capita cikamwikata,
cikalapita umo inshiku shicela.
Cikamupukanya akasuba no bushiku.
Nga cakuti ifi fintu mwafitesha uko filolele,
awe mwakulaisokonenafye ku mwenso.
20Cikaba nge pinda ilyatila,
umuntu aleesha ukutambalala pa kamusengele akepi nganshi,
no kwesha ukufimbana akalangeti akalifye nga kapiti ku buce.
21 #
Yosh 10:10-12; 2 Sam 5:20; 1 Imila 14:11 Yawe akabilimuka pakulwisha,
nga filya fine acitile pa lupili lwa Pelasimu na mwishika ya Gibeoni#28:21 Ulupili lwa Pelasimu ne shika lya Gibeoni, e ncende umo ilingi balelwila inkondo. Emo ne mfumu Davidi yacimfiishe abena Filisiti. 2 Sam 5:20 na 25; 1 Imila 14:16.,
epakuti akabombepo cimo ico apanga ukubomba,
nangu kwena ico akacitapo cilemoneka ukuba icintu cimbi cimbifye.
Kwena akapwisha umulimo wakwe,
noyo mulimo, ala wabwile.
22Kanshi imwe mwilaseka amuti fyamipulwe ifyo ine ndemweba.
Nga mwalacita ifyo, awe ninshi cikamwafya ukumona umwakupusukila.
Ine ninjumfwila uko Imfumu Yawe umwine wa fita alepanga ukonaula icalo conse.
Amano yakwa Yawe
23Imwe kutikeni kufyo ine ndesosa,
poseniko amano kufyo ine ndemweba.
24Bushe umulimi akonkanyapofye ukulima ukwabula ukubyala?
Bushe akonkanyapofye ukusankabula no kulinganya umushila epela?
25Umulimi onse atila nga apwa ukupekanya umushili,
elyo abyalamo imbuto ishili nga isha busoshi ne sha mponso.
Atandamo bwino bwino iŋanu na male,
elyo mu mbali lwa mu mpela abyalamo na masaka#28:25 Amasaka: Mu Cihibulu muleti, “imbuto isha sipeliti,” umusango umbi uwa ŋanu..
26Umulimi alishiba bwino ifyakucita,
pantu ni Lesa ewamufunda.
27Tabomfya icela icatwa pakupuma inseke sha busoshi,
kabili tabomfya umupeto we celeta pakupuma imponso.
Inseke sha busoshi bapumina ku kamulando akangwikeko,
kabili imponso bapumina ku kamuti akalingile.
28Tonaula ŋanu mukulashipulaula ukwabula ukuleka iyoo.
Alishiba ukusokola iŋanu mukupishapo iceleta ukwabula ukushishonaula.
29Amano ayakucita ifi fyonse, ala yatula kuli Yawe umwine wa fita.
Ifyo Lesa apekanya, fya mano yeka yeka, kabinge filabombafye bwino lyonse.
Currently Selected:
Esaya 28: ILL15
Highlight
Copy
Compare
Share
Want to have your highlights saved across all your devices? Sign up or sign in
Bible Society of Zambia
