Esaya 13
13
Yawe akalimuna umusumba wa Babiloni
1 #
Esaya 47:1-15; Yere 50:1—51:64 Ifyo Esaya mwana Amosi amwene palwa musumba wa Babiloni, eifi.
2Pa mulu wa lupili ulushabapo kantu, epo imisheni uluunga
ulw kulanga ukuti inkondo nomba yabuuka.
Pundilileni abashilika,
balembuleni pakuti bese basanse impongolo sha musumba isha bashimucindikwa.
3Ee, Yawe naita abamushilo bakwe,
naita ifita fyakwe ifyabulamba pakuti fise fimulimwineko abo afulilwa,
ifita ifisekelela mu kucimfya kwakwe.
4Umfweni icongo mu mpili,
kwena kabolokoto ke bumba lya bantu ilikalamba,
icongo ca bantu ba mishobo,
ne ca bantu abafuma mu fyalo fya bashamfumu babo abalelongana.
Yawe umwine wa fita alepekanya ifita fyakwe pakuti filwe inkondo.
5Pakwisa filefuma mu fyalo fyakutali
ifyaba mu tupinda tonse utwa mpela ya myulu.
Yawe alaisa ne filwilo fya cipyu cakwe kukonaula icalo conse.
6 #
Yoeli 1:15
Pongomokeni imisowa pantu ubushiku bwakwa Yawe nabupalama!
E bushiku ubo Umwine wa maka yonse akacitamo ubonaushi.
7E mulandu wine ukalenga ukuti mu maboko ya bantu mupomponteke,
ne mitima ya bantu bonse ikasunguluka.
8Bakalaikankilafye ku mwenso,
ubutanshi bwa kutapata fyabekata kwati mwanakashi uukomenwe ne fumo.
Bakalaloleshanyafye mwenso mwenso,
na pa menso yabo mulilo weka weka.
9Ubushiku bwakwa Yawe buli mupepi,
e bushiku ubushakabepo uluse,
ubo alaswa alangepo icipyu ca kufulwa kwakwe.
Icalo cikasanguka amatololo, na babifi bakaloba.
10 #
Esek 32:7; Mateo 24:29; Mako 13:24-25; Luka 21:25; Ubuso 6:12-13 Intanda shilya shaba lumo lumo, na shilya shine shatitikana pamo,
shonse shikaleka ukubalika.
Akasuba nako kakafishiwa pa kutula kwakako,
no mweshi nao tawakabalike nakalya.
11Yawe alesosa ati,
“Ine nkacita ubonaushi pa calo conse,
nkalimuna ababifi bonse palwa fibi fyabo.
Nkapwisha amataki ya bantu bonse ababa ne cilumba,
nkakanda abantu bonse ababa ne miya no bunkalwe.
12Abakashalapo bakabafye abancepela,
nga filya fine golide wine wine uwa ku Ofiri
aba uwancepela kabili uwamutengo.
13Ine nkatensha umulu,
ne sonde likasunkana apo caikala.
Ni pali ubo bwine bushiku,
epo ne Yawe umwine wa fita nkalangapo icipyu candi.”
14Abenafyalo abaikala mu Babiloni bakafulumukila mu fyalo fyabo,
bakaya nsale nsale ku bantu babo kwati ni nsebula ishilefulumuka umulunshi,
kwati ni mpaanga ishishikwete uwakushicema.
15Bonse abasangwa bakalabapulinkanya ulupanga,
na baikatwa bakabepaila ku lupanga.
16Bakalaloleshakofye bulanda bulanda ilyo bakalafwanta panshi utwana twabo pakutwipaya,
ilyo bakalatapa amayanda yabo,
kabili nelyo bakalabifya na bakashi babo ku maka.
17“Ine ne Yawe nkaluminisha abena Media#13:17 Abena Media: E bantu ba mutundu umo uwabelele pakati ka kapinda ka ku kulyo na kabanga ka Babiloni. Limbi waishile teekwa ne shamfumu sha calo ca Pesia. pakuti bawililile Babiloni.
Bena tabaposa mano kuli silifa nangufye kuli golide.
18Bakepaya abalumendo bonse ku mifwi,
no tunya twine tabatukwatile luse,
nangufye ukulangulukilako utwaice.
19 #
Icite 19:24
Ubuteeko bwa calo ca Babiloni ubwawamisha pa buteeko bwafyalo bumbi bonse,
na bena Kaludea#13:19 Kaludea: E shina lyakale ilya bena Babiloni. Kwali umutundu wa bantu abaikele ku calo ca ku kulyo lubali lwa ku musumba wa Babiloni. E mutundu wa balupwa lwakwa Nebukadinesa uwaishile teeka ku Babiloni (Esra 5:12). abaikalamo balaitakishishapo,
nomba ine ne Lesa nalaswa ngonaule umusumba wa Babiloni,
nga filya fine naonawile Sodoma na Gomora.
20Takwakatale akuba muntu uukekalamo nakabili.
Abena Arabia abendauka tabakatale nakabili ababikamo amatenti yabo,
takwakatale akuba bakacema abakalacemenamo ifitekwa fyabo.
21 #
Esaya 34:14; Sefa 2:14; Ubuso 18:2 Umusumba wa Babiloni walaswa ubefye incende umwakulaikala inama sha mu matololo,
umo ifipuululu fyakulapikwila ifisansala.
Emo imbuni shakulaikala,
emo ne fibushi mabwe fyakulacena.
22Mu mpungu mwakulaumfwika ukulila kwa bacimbwi
no kwa bamumbwena mu mayanda ye sano.
Inshita yakulimwinapo umusumba wa Babiloni naipalama.
Inshiku shauko tashakatantalishiwe iyoo.”
Currently Selected:
Esaya 13: ILL15
Highlight
Copy
Compare
Share
Want to have your highlights saved across all your devices? Sign up or sign in
Bible Society of Zambia
