مزامیر ۴۰
۴۰
تو می یار و یاوری کی مرَ نجات دیهی
پیله رهبرٚ وأسی کی سرود خوأنأنَ هیدایت کونه. داوودٚ مزمور
۱ خوداوندٚ رِه خیلی اینتظار بکشم،
بأزین خو رویَ می طرف وأگردأنه و می ایجگره زِئنَ بیشنأوسته.
۲ اون مرَ چاه هلاکتٚ جأ بیرون بأورده
و چلٚ گیلٚ جأ بیرون فأکشه؛
می پایَ بنَه صخره سر
می قدمأنَ موحکمَ کوده.
۳ تازه سرودَ می دَهنٚ میأن بنَه،
سرودی کی اَمی خودایَ ستایش کونه.
خیلی‌یأن دینیدی و ترسیدی
و خوداوندَ توکل کونیدی.
۴ خوشا بحالٚ او کسی کی خوداوندَ خو تکیه‌گاه چأکوده،
و نه مغرورٚ آدمأنَ توجه کونه
و نه اوشأنی کی بُتأنَ دونبأل ایسیدی و گومرأییدی.
۵ اَی یهوه، می خودا،
چقدر زیادیدی
تی عجیبٚ کارأن
و تی نقشه‌یأن
کی اَمِره انجام بدَه‌یی؛
هیکسَ نشأ تی اَمرأ موقایسه کودن.
اگه بخوأیم تی کارأنَ واگویا بوکونم و بگم،
نشأ اوشأنَ ایشمردن.
۶ قوربانی و پیش‌کشی تی دیل نخوأستی،
ولی می گوشأنَ وازَ کودی تا کی تی جأ ایطاعت بوکونم؛
او قوربانی‌یَ کی سوجانئنٚ شینه و قوربانی‌یَ کی گوناهٚ شینه می جأ نخوأستی.
۷ بأزین بوگفتم: «هسأ دِه بموم!
کیتابٚ طومارٚ دورون می جأ بینیویشته بوبوسته؛
۸ اَی می خودا، می ناجه اَنه
کی تی ایراده‌یَ بجا بأورم؛
تی شریعت، می دیلٚ دورون نهَه.»
۹ پیله جماعتٚ دورون تی عیدالتٚ خوروم خبرأنَ بوگفتم؛
من هیوخت می دَهنَ دنوٚسٚتم، هوطو کی خودت دأنی، اَی خوداوند.
۱۰ تی عیدالتَ می دیلٚ دورون جیگا ندَم،
بلکی تی وفاداری و نجاتٚ جأ گب بزم
و تی موحبت و وفایَ پیله جماعتٚ ورجأ قایمَ نوکودم.
۱۱ اَی خوداوند، تی رحمتَ می جأ دریغ نوکون؛
تی موحبت و وفا همیشه مرَ موحافظت کونه.
۱۲ چونکی ایتأ عالمه بلا می دور و ور بیگیفته دره؛
می گونایأن اَنقدر سنگین و زیادَ بوستید کی دِه نتأنم بیدینم؛
جٚه می سرٚ مویأن ویشترَ بوستید،
ضعیف و ناامیدَ بوستم.
۱۳ اَی خوداوند، مرَ تی لطفٚ اَمرأ نجات بدن؛
خوداوندأ، هر چی زودتر مرَ کومک بوکون!
۱۴ اوشأنی کی خوأییدی مرَ بوکوشید،
همه‌تأن شرمنده و خجالت زده بیبید؛
اوشأنی کی آرزو دأریدی می روز سیاه ببه
پسأ پسأ بیشید و روسوا بیبید.
۱۵ اوشأنی کی می گیرفتاری وأسی خنده دشکنیدی،
شرمندگی وأسی حیرانَ بید.
۱۶ امّا اوشأنی کی تی دونبأل گردیدی
همه‌تأن تی وجودٚ وأسی شادی و ذوق بوکونید؛
او کسأنی کی تی نجاتَ دوس دأریدی
همه‌تأ وخت بیگید: «خوداوند بوزرگه!»
۱۷ من ستم بکشه آدم و فقیرم،
ولی خوداوند می وأسی فیکر کونه.
تو می یاوری و مرَ نجات دیهی؛
اَی می خودا، دِئرَ نوأ کودن.
Currently Selected:
مزامیر ۴۰: گیلکی (رشتی)
Highlight
Share
Copy
Want to have your highlights saved across all your devices? Sign up or sign in
© 2010-2019 Gilak Media
