مزامیر ۳۶
۳۶
خودایا، تی موحبت چقدر ارزش دأره
پیله رهبرٚ وأسی کی سرود خوأنأنَ هیدایت کونه. داوودٚ مزمور، خوداوندٚ ختمتگوزار.
۱ نافرمانی، شرورٚ آدمٚ دیلٚ دورون اونٚ اَمرأ گب زنه؛
خودا جأ ترسئن اونٚ رِه هَچین بیخوده.
۲ چونکی اَنقده خورَه گولاز کونه
کی نتأنه خو گونایَ بفأمه و اونٚ جأ بیزار ببه!
۳ اونٚ دَهنٚ گبأن شرارت و فریب دَئنه؛
عاقل و خوروم کارأنٚ جأ دس بکشه.
۴ خو رختٚ خوابٚ دورونم شرارتٚ رِه نقشه کشه؛
خورَه تأوده کجٚ رأیأنٚ دورون؛
خو دیمَ شرارتٚ جأ وأنگردأنه.
۵ اَی خوداوند، تی موحبت بوجورترین آسمانأنٚ سر فأرسه
و تی وفاداری ابرأنٚ جور!
۶ تی عیدالت، کوهٚ مأنستن سر به فلک فأکشه
و تی حوکمأن، دریا پیله جولفٚ جاجیگایأنَ مأنه.
تویی، اَی خوداوند، کی اینسأن و حیوانَ نجات دیهی.
۷ خودایا، تی موحبت چقدر ارزش دأره!
آدمی‌زاده‌یأن تی پر بالٚ سایه جیر پناه گیریدی.
۸ تی خانه فراوانٚ نعمتأنٚ جأ سِئرَ بیدی،
و آبی کی تی گوارا چشمه جأ دأره اوشأنَ فأدی بوخورید.
۹ چونکی تی ورجأ چشمه‌یٚ حیات نهَه،
و تی نورٚ دورونه کی نور دینیمی.
۱۰ وهل تی موحبت اوشأنی رِه کی ترَ شنأسیدی دوام بدأره
و تی عیدالت، راست‌دیلأنٚ رِه.
۱۱ نوکونه مغرورٚ آدمأن مرَ لغد دمج بوکونید
یا کی شرورأنٚ دس مرَ فراری بده.
۱۲ بیدین بدکارأن چوطویی بکفتیدی؛
اوشأنَ تأودَه‌ییدی خاکٚ سر و دِه نتأنیدی ویریزید!
Currently Selected:
مزامیر ۳۶: گیلکی (رشتی)
Highlight
Share
Copy
Want to have your highlights saved across all your devices? Sign up or sign in
© 2010-2019 Gilak Media
