مزامیر ۱۲
۱۲
خودا، دوروستکارأنَ حمایت کونه
پیله رهبرٚ وأسی کی سرود خوأنأنَ هیدایت کونه. داوودٚ مزمور. سازأنی اَمرأ کی هشت‌تأ سیم دأریدی.
۱ اَی خوداوند، نجات بدن، چونکی هیچ آدمٚ با دین و ایمأنی باقی نمأنسته
مردومأنٚ میأنی وفادارٚ آدمأنم محوَ بوستید.
۲ همه‌تأن کس‌کسَ دورُغ گیدی
و اوشأنٚ لبأن الکی قوربأن صدقه شوئون و دو رویی اَمرأ گب زنه.
۳ ببه کی خوداوند تومامٚ لبأنی کی الکی قوربأن صدقه شیدی وأوینه
و زوانی کی گولازٚ اَمرأ گب زنه،
۴ اوشأنی کی گیدی: «چرب‌زوانی اَمرأ پیروزَ بیم
اَمی زوانم اَمی اَمرأیه، کی تأنه اَمی سرور ببه؟»
۵ خوداوند فرمأیه: «فقیرأنٚ مال و منال غارت بوستنٚ وأسی و ستم کشٚ آدمأن آه و ناله رِه
هسأ ویریزم،
و اَشأنٚ رِه او رفاه و امنیتی‌یَ کی ناجه دأریدی، فأدم.»
۶ خوداوندٚ گبأن خالص ایسه،
نقره‌یَ مأنه، کی گیلٚ کوره دورون تصفیه بوبوسته
و هفت وار پاکَ بوسته.
۷ اَی خوداوند، تو ستم بیده آدمأنَ حفظَ کونی؛
تو اَمرَ اَ نسلٚ بدٚ جأ تا اَبد موحافظت کونی.
۸ شرورٚ آدمأن همه جا فأرسیدی،
وختی کی پستی و رذالت آدمأنٚ میأن ارزش پیدا کونه.
Currently Selected:
مزامیر ۱۲: گیلکی (رشتی)
Highlight
Share
Copy
Want to have your highlights saved across all your devices? Sign up or sign in
© 2010-2019 Gilak Media
