ایوب ۵
۵
۱ «هسأ فریاد بزن؛ کسی ایسَه کی تی جوابَ بده؟
کویتأ موقدّسأنٚ جأ کومک خوأیی؟
۲ رأس رأسی کی غیظ، احمقَ کوشه
و حسودی، ساده دیلَ هلاکَ کونه.
۳ احمقَ بیدم کی خوشبخت بو،
ولی ایدفعه‌یی اونٚ خانه نفرین بوبوسته.
۴ اونٚ زأکأن امنیت نأریدی؛
محاکمه میأن پامالَ بید و هیکس نِیسه کی اوشأنَ نجات بده.
۵ گوشنه‌یأن اونٚ محصولَ خوریدی،
حتی اونَ جٚه تمشأنٚ میأنم اوچینیدی
و تشنه‌یأن اونٚ مال و منالٚ وأسی له له زنیدی.
۶ چره کی موصیبت خاکٚ جأ وینریزه
و سختی‌یأن واشٚ مأنستن زیمینٚ جأ زپّه نزنه،
۷ در حألی کی آدمی‌زاد سختی وأسی بدونیا اَیه،
هوطو کی آتشٚ شواله بوجور شه.
۸ «اگه من بوم، خودا جأ خوأستیم
و می شکایتَ اونٚ ورجأ بردیم،
۹ اونی کی پیله‌دأنه کارأنی کونه کی اَمی عقلٚ جأ ویشتره
و عجیبٚ کارأنی کونه کی نشأ اوشأنَ ایشمردن:
۱۰ وارشَ زیمینٚ سر وأرأنه
و آبَ صارا میأن اوسه کونه.
۱۱ فروتنٚ آدمأنَ پیله‌دأنه جاجیگاه فأرسأنه
و ماتم بزه آدمأنَ امنٚ جیگا دورون سربولندَ کونه،
۱۲ دغل بازأنٚ کلکأنَ بی‌نتیجه نهه
کی اوشأنٚ دسأن موفقیتٚ جأ کوتاه بمأنه.
۱۳ آدمأنی‌یَ کی خوشأنَ حکیم دأنیدی، اوشأنٚ دوز و دغلکارأنٚ دورون گیرفتارَ کونه
و حیله گرأنٚ نقشه‌یأن، فوری باطیلَ به.
۱۴ اوشأنٚ روز تاریکَ به
و ظهر، شبٚ مأنستن دس وأمج رأ شیدی.
۱۵ ولی خودا موحتاجٚ آدمأنَ، اوشأنٚ گبأنٚ جأ کی شمشیرَ مأنه، آزادَ کونه،
و اوشأنَ، قوی آدمأنٚ دسٚ جأ نجات دهه.
۱۶ پس فقیرأنٚ رِه اومید نهَه
و ظلم خو دَهنَ دَوده.
۱۷ «خوشا بحالٚ کسأنی کی خودا اوشأنَ ادب کونه،
پس تو نوأ خودا ادب کودنَ بحیساب نأوری
۱۸ چره کی اون هوطو کی زخم زنه، دوا کونه،
زخمی کونه ولی اونٚ دس شفایم بخشه.
۱۹ ترَ شیش‌تأ بلا جأ آزادَ کونه
و هفت‌تأ بلا جأ ترَ هیچ آسیبی فئنرسه.
۲۰ قحطی میأن ترَ مردنٚ جأ نجات دهه
و جنگٚ دورون شمشیرٚ جأ.
۲۱ نیش و کنایه جأ ترَ حفظَ کونه
و هلاکَ بوستنٚ موقع نترسی.
۲۲ قحطی و هلاکَ بوستنَ رخشنَ گیری
و صارا جانورأنٚ جأ ترسی نأری.
۲۳ صارا سنگأنٚ اَمرأ عهد و پیمان دٚوٚدی
و صارا جانورأن تی اَمرأ سازش کونیدی.
۲۴ دأنی کی تی سرپناه امن ایسه
و تی طیواله دورون وأمجی و دینی هیچی گومَ نوبوسته.
۲۵ دأنی کی تی نسل زیادَ به،
و تی زأکأن زیمینٚ علفَ مأنیدی.
۲۶ پیری دورون قبرٚ دورون شی،
گندمٚ ساقه مأنستن کی خو وختٚ میأن درو به،
۲۷ اَنَ ایمتحان بوکودیم و دأنیم کی حقیقت دأره.
پس اَنَ گوش بده و خودتٚ وأسی یاد بیگیر.»
Currently Selected:
ایوب ۵: گیلکی (رشتی)
Highlight
Share
Copy
Want to have your highlights saved across all your devices? Sign up or sign in
© 2010-2019 Gilak Media
