ایوب ۴
۴
اِلیفازٚ گبأن
۱ بأزین اِلیفازٚ تیمانی وأگردسته بوگفته:
۲ «اگه کسی بخوأیه تی اَمرأ گب بزنه، تأنی تحمول بوکونی؟ خأب، ولی کی ایسه کی تأنه گب زِئنٚ جأ دس اوسأنه؟
۳ بیدین، تو خیلی‌یأنَ نصیحت بوکودی و ضعیفٚ آدمأنٚ دسَ بیگیفتی.
۴ تی گبأن، جیلیسکَ خورده آدمأنَ بپا بدأشته
و زانو‌یأنی کی پرکستیدی قوّت فأدَه‌یی.
۵ ولی هسأ کی بلا تی سر بمو، دِه طاقت نأوری
و اونٚ لمسٚ جأ پریشأنَ بوستی.
۶ تی خودا ترسی وأسی نوأ ایطمینأن بدأری،
و تی بی‌عیبٚ رفتارأنٚ وأسی اومید؟
۷ «ترَ یاد ببه: کویدأنه بی‌گوناه هلاکَ بوسته؟
و کویه دوروستکارٚ آدمأن جٚه بین بوشوییدی؟
۸ اوطویی کی من بیدم، اوشأنی کی شرارتَ شخم زنیدی و ظلمَ کاریدی
بأزین هونَ وأوینیدی.
۹ و خودا توندٚ نٚفٚسٚ اَمرأ جٚه بین شیدی
و اونٚ بادٚ مره کی غیظٚ جأ ایسه، نابودَ بیدی.
۱۰ اَ شرورٚ آدمأن، وحشی شیرٚ مأنیدی کی نعره زنیدی
ولی خودا جوانٚ شیرأنٚ گازأنَ ایشکنه.
۱۱ نره شیر بی غذایی جأ میره
و ماده شیرٚ زأکأن ویلانَ بیدی.
۱۲ «خلوتی ایتأ گب بیشنأوستم
و اونٚ زمزمه می گوش فأرسه.
۱۳ می پریشانٚ افکارٚ دورون کی شبٚ خوابأنٚ جأ بو،
هو وختی کی آدمأن سنگین وأخوابَ شیدی،
۱۴ می دیل و زاله بترکسته
و می تومامٚ خاشأن بپرکستید.
۱۵ ایتأ روح جٚه می جُلُو دوأرسته
و می جانٚ مو سیخَ بوسته.
۱۶ اویه بِئسه
ولی من نتأنستم اونٚ ظاهیرَ بشنأسم.
ایچی می چومأنٚ جُلُو نهَه‌بو
و او خاموشی میأن ایتأ صدا بیشنأوستم کی بوگفته:
۱۷ ‹اینسأنی کی خاکٚ جأ ایسه تأنه خودا ورجأ پارسا ببه؟
آدمی تأنه خو خالقٚ ورجأ پاک ببه؟
۱۸ خودا حتی خو خادمأنَ اعتماد نوکونه
و خو فرشته‌یأنٚ جأ ایراد گیره،
۱۹ چی برسه به آدمی کی خو بدنٚ دورون ساکن ایسه، بدنی کی گیلی خانه‌یَ مأنه
و خاکٚ جأ آفریده بوبوسته و بیدٚ مأنستن جٚه بین شه.
۲۰ ایتأ صُب تا شب نابودَ بیدی
بدونٚ اَنکی کسی وأخبرَ به، تا اَبد هلاکَ بیدی.
۲۱ اوشأنٚ خیمه‌یٚ لافند زیمینٚ جأ بیرون نأیه
و بی‌حکمت میریدی؟›
Currently Selected:
ایوب ۴: گیلکی (رشتی)
Highlight
Share
Copy
Want to have your highlights saved across all your devices? Sign up or sign in
© 2010-2019 Gilak Media
