ایوب ۳۸
۳۸
خوداوند، ایوبَ جواب دهه
۱ بأزین خوداوند گردبادٚ میأن ایوبَ جواب بدَه و بوگفته:
۲ «اَن کیسه کی گبأنی اَمرأ کی معرفتٚ جأ خالی‌ییدی
می نقشه‌یأنَ قایمَ کونه؟
۳ هسأ تی کمرَ مردأکأنٚ مأنستن دٚوٚد؛
تی جأ وأورسم، مرَ جواب بدن!
۴ «وختی زیمینَ برپا بوکودم، کویه ایسَه‌بی؟
اگه ترَ حالی‌یه، مرَ بوگو!
۵ کیسه کی اونٚ اندازه‌یأنَ تعیین بوکوده؟ اگه دأنی بوگو!
یا کیسه کی اونَ وجب بزه؟
۶ اونٚ سوتونأن چی رو بنَه بوبوسته؟
و کیسه کی اونٚ سنگٚ زاویه‌یَ بنَه،
۷ وختی کی صُبٚ دمٚ ستاره‌یأن همدیگرٚ اَمرأ سرود بخوأندیدی،
و فرشته‌یأن#۳۸:۷ متنٚ عبری دورون «خودا پسرأن» بینیویشته بوبوسته کی منظور هو فرشته‌یأن ایسیدی. همه‌تأن شادی جأ فریاد بزه‌یید؟
۸ «کیسه کی دریایَ درأنٚ اَمرأ دٚوٚسته،
وختی کی رحمٚ جأ بیرون بمو،
۹ وختی ابرأنَ اونٚ لیباس چأکودم
و غلیظٚ ظولمأتَ اونٚ قنداق،
۱۰ و اونٚ رِه حد و حدود تعیین بوکودم
و پشت دٚوٚد و درأنَ چأکودم
۱۱ و بوگفتم: ‹تا اَیه تأنی بأیی و دِه تومام،
و هَیه تی سرکشٚ موجأن وأ بِئسید›؟
۱۲ «تی تومامٚ عمرٚ روزأنٚ میأن، صُبَ دستور بدَه‌یی،
و یا شفقَ خو جاجیگاه جأ وأخبرَ کودی؟
۱۳ تا زیمینٚ چار طرفَ بیگیره
و شرورٚ آدمأنَ اونٚ جأ فیشأنه؟
۱۴ زیمین، مومٚ مأنستن کی خاتمٚ جیر نهَه، وأگرده،
و اونٚ شکل و شمایل لیباسٚ نقشأنٚ مأنستن آشکارَ به.
۱۵ شرورأنٚ نور اوشأنٚ جأ فیگیفته به،
و اوشأنٚ جورَ گیفته بازو ایشکفه.
۱۶ «مگه دریا چشمه‌یأنٚ دورون بمویی،
یا دریا جولفٚ جاجیگایأنٚ دورون رأ بوشویی؟
۱۷ مگه مرگٚ دروازه‌یأنَ ترَ نیشأن بدَه‌یید،
یا ظولمأتٚ دروازه‌یأنَ بیده‌یی؟
۱۸ زیمینٚ پهنا ترَ حألی ایسه؟
مرَ بوگو، اگه تومامٚ اَشأنَ دأنی!
۱۹ «چوطو تأنی نورٚ جاجیگاه طرف بیشی،
و ظولمأتٚ جاجیگاه کویه ایسَه،
۲۰ تا اوشأنَ به خوشأنٚ حد و مرز فأرسأنی،
و اوشأنٚ خانه رأیأنَ ترَ حألی ببه؟
۲۱ البته کی تو دأنی، چره کی تو قبلٚ اَن بدونیا بمو بی،
و روزأنی کی زندگی بوکودی ایتأ عالمه‌یه!
۲۲ «مگه تو ورفٚ بانکه‌یأنٚ دورون بوشویی،
یا تگرگٚ بانکه‌یأنَ بیده‌یی،
۲۳ کی اوشأنَ سختٚ زمأتٚ وأسی بدأشتم،
جنگ و جدالٚ وختٚ رِه؟
۲۴ چوطو تأنی اویه بیشی کی نور اونٚ جأ اَیه،
یا شرقٚ باد کویه جأ زیمینٚ سر وزه؟
۲۵ «کیسه کی ایتأ روگأ#۳۸:۲۵ جاجیگایی‌یَ گیدی کی آب اویه جأ دواره و شالی زیمینأن اونٚ جأ ایستفاده کونیدی. وارشٚ سیلٚ وأسی بکنده بی،
یا ایتأ رأیَ گورخانه وأسی،
۲۶ تا زیمینٚ سر کی هیکس اویه نِیسه وارش بوأرأنه،
و صارا دورون کی هیچ اینسأنی اونٚ میأن زندگی نوکونه،
۲۷ تا چورٚ#۳۸:۲۷ چور ینی بایر، زیمین غیر دایر و مخروبه زیمینی‌یَ کی متروکه‌یه، آبٚ اَمرأ سِئرَ کونه،
و تازه واشأنَ اونٚ سر بوجور بأوره؟
۲۸ «ینی وارش پئر دأره؟
یا کیسه کی ایازٚ توکه کودنَ چأکونه؟
۲۹ کی رحمٚ جأ، یخ بیرون اَیه،
و کی ایسه کی آسمانٚ جأ یخ دٚوٚسته ایازَ بوجود بأوره؟
۳۰ آبأن سنگٚ مأنستن سختَ بید،
و جولفٚ جاجیگایأنٚ رو یخ دٚوٚده.
۳۱ «تأنی ثریا ستاره‌یأنَ گلوبندٚ مأنستن دٚوٚدی،
یا جِبّارٚ لافندَ وأکونی؟
۳۲ تأنی ستاره‌یأنَ خوشأنٚ فصلأنٚ دورون بیرون بأوری،
یا تأنی دُبٚ اکبرَ اونٚ زأکأنٚ اَمرأ هیدایت بوکونی؟
۳۳ آسمانٚ قانونأنَ دأنی،
یا تأنی زیمینٚ سر اوشأنَ حاکم چأکونی؟
۳۴ «تأنی تی آوازَ تا ابرأنٚ جور بولندَ کونی،
تا کی سیلابأن ترَ بپوشأنه؟
۳۵ تأنی گورخانه برقأنَ اوسه کونی،
کی بیشید و ترَ بیگید: ‹تی فرمانبریم›؟
۳۶ کیسه کی حکمتَ اینسأنٚ باطنٚ دورون بنَه،
یا ذهنَ فأم ببخشه؟
۳۷ کیسه کی اَنقدر حکمت دأره کی بتأنه ابرأنَ بیشمأره؟
و کیسه کی آبَ آسمانٚ مشکأنٚ جأ فوکونه،
۳۸ وختی کی خاک، چولَ به،
و کلوخأن همدیگرَ چسبیدی؟
۳۹ «تأنی ماده شیرٚ رِه شکار، صید بوکونی،
یا تأنی شیر زأکأنٚ شکمَ سِئرَ کونی؟
۴۰ وختی کی خوشأنٚ لانه‌یأنٚ میأن جوخوسیدی،
یا بوته دورون کمین کونیدی؟
۴۱ کیسه کی کلاچٚ رِه خوراک بأوره،
وختی کی اونٚ زأکأن خودا ورجأ داد زنیدی،
و بی‌غذایی وأسی ویلأنیدی؟
Currently Selected:
ایوب ۳۸: گیلکی (رشتی)
Highlight
Share
Copy
Want to have your highlights saved across all your devices? Sign up or sign in
© 2010-2019 Gilak Media
