ایوب ۳۶
۳۶
۱ اِلیهو ایدامه بدَه و بوگفته:
۲ «ایپچه ویشتر می اَمرأ رأ بیأ کی ترَ نیشأن بدم،
کی هنوزم خودا دفاع کودنٚ وأسی گب بمأنسته.
۳ می دانشَ دور دسأنٚ جأ اَورم،
و نیشأن دهم کی می خالق عادل ایسه.
۴ چره کی رأس رأسی می گبأن ایشتباه نی‌یه؛
کسی کی تومامٚ دانشَ دأره، تی ورجأ ایسَه.
۵ «رأس رأسی کی خودا قادره، ولی هیکسَ کوچیکَ نوکونه.
خودا، قودرتٚ فأمستنٚ دورون قادره.
۶ ونأله شرور آدمأن زنده بِئسید
و ستمکشٚ آدمأنٚ داد فأرسه.
۷ خو چومأنَ دوروستکارٚ آدمأنٚ جأ اونسَنه،
بلکی اوشأنَ تا اَبد پادشایأنٚ اَمرأ تختٚ سر نیشأنه،
و سر بولندَ بیدی.
۸ اگه زنجیلأنٚ اَمرأ دٚوٚسته بیبید،
و فلاکتٚ لافندأنٚ مره گیرفتارَ بید
۹ اوشأنَ جٚه کردکارأن و نافرمانی‌یأنی کی بوکودید وأخبرَ کونه،
چره کی غرورٚ اَمرأ رفتار بوکودید.
۱۰ اوشأنٚ گوشأنَ ادب کودنٚ وأسی وأکونه،
و دستور دهه کی شرورٚ کارأنٚ جأ وأگردید.
۱۱ اگه اونَ گوش بدید و اونَ ختمت بوکونید،
خوشأنٚ روزأنَ خوشبختی اَمرأ گوذرأنیدی،
و خوشأنٚ سالأنَ کِیفٚ مره.
۱۲ ولی اگه گوش نوکونید،
شمشیرٚ اَمرأ میریدی،
و نادانی مره جان دیهیدی.
۱۳ «خودا نشنأسأن خوشأنٚ غیظَ تلنبارَ کونید،
و وختی اوشأنَ بندٚ دورون تأوده، کومکٚ وأسی داد و فریاد نوکونید.
۱۴ جوانی میأن میریدی،
و خرابٚ مردأکأن اَمرأ کی معبدأنٚ دورون ایسَه‌ییدی، خوشأنٚ عمرَ تلف کونیدی.
۱۵ ولی خودا سختی‌یأنٚ جأ ایستفاده کونه کی ستمکشٚ آدمأنَ نجات بده،
و اوشأنٚ گوشَ گیرفتاری‌یأنٚ اَمرأ وازَ کونه.
۱۶ پس ترَ موصیبتٚ دَهنٚ جأ بیرون فأکشه،
و اَوره ایتأ پت و پهنه جاجیگاه کی اونٚ دورون حد و حدود ننَه، و تی سفره‌یَ خوروم خوراکیأنٚ جأ پورَ به.
۱۷ «ولی تی فیکرأن در کل خودا داوری رو نهَه کی شرورٚ آدمأن دینیدی؛
داوری و عیدالت ترَ بیگیفته دره.
۱۸ تی حواس جم ببه کی هیکس مال و منالٚ اَمرأ ترَ گول نزنه،
و پیله‌دأنه رشوه‌یأن تی رأهَ کجَ نوکونید.
۱۹ تی ایجگره ترَ موصیبتٚ جأ حفظَ کونه،
یا تومامی تی سختٚ تقلایأن؟
۲۰ ناجه نوأ دأشتن کی شب بأیه،
کی مردومأن خوشأنٚ جاجیگاه جأ بیرون فأکشه بیدی.
۲۱ مراقب بوبو کی شرورٚ کارأنٚ طرف نیشید
چره کی اَ کردکارأنَ بدبختی عوض اینتخاب بوکودی.
۲۲ «بیدین کی خودا خو قودرتٚ وأسی موتعاله؛
اونٚ مأنستن معلّم کیسه؟
۲۳ کیسه کی اونٚ رأیَ اونَ بأموجه،
یا کیسه کی اونَ بگه: ‹ایشتباه بوکودی›؟
۲۴ «ترَ یاد ببه کی خودا کارأنٚ جأ تعریف و تمجید بوکونی،
او کارأنی کی مردومأن، اوشأنٚ ستایشٚ وأسی سرود بخوأندیدی.
۲۵ تومامی مردومأن اوشأنَ بیده‌ییدی،
و آدمأن، دور دورأنٚ جأ اوشأنَ فندرستیدی.
۲۶ بیدین، خودا موتعال ایسه و اَمأن اونَ نشنأسیم؛
اونٚ سالأنٚ تعداد، نشأ وأمختن.
۲۷ «آبٚ چکه‌یأنَ بوجور فأکشه،
و اوشأنٚ بوخارٚ جأ وارش وأره،
۲۸ کی ابرأن واران فوکونید،
و فت و فراوان فیوِه آدمأنٚ سر.
۲۹ کیسه اونَ حألی ببه کی ابرأن چوطویی اَرأ اورأ شیدی،
یا چوطویی خودا، جٚه خو جاجیگاه گورخانه اوسه کونه؟
۳۰ هسأ گورخانه خو دور و ور دتأوأنه،
و دریا جولفٚ جاجیگایأنَ پوشأنه.
۳۱ چره کی اوشأنٚ اَمرأ قومأنَ داوری کونه
و یا ایتأ عالمه رزق و روزی فأده.
۳۲ گورخانه برقَ خو دسأنٚ اَمرأ گیره،
و دستور دهه کی هدفَ بزنه.
۳۳ اونٚ گورخانه، طوفانٚ آمونٚ جأ خبر دهه؛
هَطویم چارپایأنم اونٚ ویریشتنَ خبر دیهیدی.
Currently Selected:
ایوب ۳۶: گیلکی (رشتی)
Highlight
Share
Copy
Want to have your highlights saved across all your devices? Sign up or sign in
© 2010-2019 Gilak Media
