ایوب ۳۴
۳۴
۱ بأزین اِلیهو ایدامه بدَه و بوگفته:
۲ «اَی حکیمٚ مردأکأن، می گبأنَ بیشنأوید،
و اَی عاقلٚ مردأکأن، مرَ گوش بدید.
۳ چره کی گوش، گبأنٚ دوروستی‌یَ ایمتحان کونه،
هوطو کی زوان خوراکَ چشه.
۴ بأیید اونچی‌یَ کی دوروسته تشخیص بدیم،
و اونچی‌یَ کی خُبه خودمأنٚ میأن یاد بیگیریم.
۵ «ایوب گه: ‹من گوناهی نأرم.
خودا می حقَ می جأ فیگیفته.
۶ با اَنکی من حق دأرم، اون، مرَ دورُغگو دأنه؛
با اَنکی هیچ نافرمانی نوکودم،
می زخمأن دوا نأره.›
۷ کویدأنه اینسأن ایوبَ مأنه،
کی مسخره کودنٚ رِه تشنه‌یه
۸ و بدکارٚ آدمأنٚ اَمرأ رأ دکفه شه،
و شرورٚ آدمأنٚ اَمرأ شوئون و اَمون کونه؟
۹ چره کی بوگفته: ‹اینسأن، خودا راضی کودنٚ جأ
هیچ سودی نبره.›
۱۰ «پس اَی بافأمٚ مردأکأن، مرَ گوش بدید:
دور ببه خودا جأ کی بدی بوکونه،
و قادرٚ مطلق جأ کی شرورٚ کارأنَ انجام بده.
۱۱ چره کی اون، اینسأنٚ کردکارأنَ پس دهه،
و هر کسَ اونٚ کردکارأنٚ مواجبَ فأدِه.
۱۲ رأس رأسی کی خودا بدی نوکونه،
و قادرٚ مطلق بی‌عیدالتی نوکونه.
۱۳ کیسه کی زیمینٚ ایداره کودنَ اونَ بیسپرده‌بو؟
کیسه کی اونَ تومام دونیا رئیس بوکوده؟
۱۴ اگه خودا دیل بخوأیه
کی خو روح و نٚفٚسَ اینسأنٚ جأ فیگیره،
۱۵ تومامٚ اینسأنأن همدیگرٚ اَمرأ جٚه بین شیدی،
و آدمی‌زاد گیلٚ جیر وأگرده.
۱۶ «اگه فأم دأری، اَنَ بیشنأو،
و اونچی‌یَ کی گم، گوش بدن.
۱۷ مگه اونی کی عیدالتٚ جأ بیزاره تأنه حکومت بوکونه؟
او پیله عادلٚ داورَ محکومَ کونی؟
۱۸ هو داوری کی پادشایَ گه: ‹هیچی نی‌یی،›
و پیله کسأنَ گه: ‹شرور ایسید.›
۱۹ هونی کی اَمیرأنٚ جأ طرفداری نوکونه،
و مال و منال‌دارَ، فقیرٚ جأ بوجورتر نأنه،
چره کی همه‌تأن اونٚ دسٚ اَمرأ چأکوده بوبوسته.
۲۰ ایتأ لحظه دورون میریدی؛
مردومأنٚ جان نیصفٚ شب پرکِه و جٚه میأن شیدی،
و قوی مردأکأن بی اَنکی اینسأنٚ دس دخالت بوکونه، جٚه میأن اوسأده بیدی.
۲۱ «چونکی خودا چومأن، اینسأنٚ رأیأنَ فندره
و تومامٚ اوشأنٚ پا قدمأنَ دینه.
۲۲ هیچ تاریکی و ظولمأت ننَه
کی بدکارٚ آدمأن خوشأنَ اونٚ دورون جا بدید.
۲۳ خودا ایحتیاج نأره کی اینسأنَ ویشتر ایمتحان بوکونه،
کی اینسأن وأ داوری بوستنٚ وأسی اونٚ ورجأ بأیه.
۲۴ زورمندٚ آدمأنَ بدونٚ اَنکی وأپرس دپرس بوکونه، خوردَ کونه،
و دیگرأنَ اوشأنٚ جا سر نیشأنه.
۲۵ پس اون، اوشأنٚ کارأنٚ جأ وأخبره
و اوشأنَ شبٚ میأن جٚه بین بره و له و لورده کونه.
۲۶ اوشأنَ شرارتٚ وأسی زنه،
جاجیگایی کی همه‌تأن بیدینید
۲۷ چره کی دِه اونٚ راستٚ رایَ نوشوییدی
و هیتّأ اونٚ رأیأنَ محل نوکودید.
۲۸ اَطویی باعیث بوبوستید کی فقیرأنٚ ایجگره خودا گوش فأرسه
و اون ستم بیده آدمأنٚ دادَ بیشنأوه.
۲۹ اگه ساکیت بِئسه، کی تأنه اونَ محکوم بوکونه؟
اگه خو رویَ جیگا بده، کی تأنه اونَ فندره؟
هم میلت و هم آدمٚ اختیارَ دأره،
۳۰ کی خودا نشنأسٚ آدم حکومت نوکونه و مردومأنٚ رأ سر دام ننِه.
۳۱ «ینی کسی ایسه کی خودایَ بوگفته‌بی:
‹موجازاتَ بوستم و دِه خطا نوکونم؛
۳۲ اونچی‌یَ کی نیدینم، مرَ یاد بدن؛
و اگه گوناه بوکودم، دِه اَ کارَ نوکونم›؟
۳۳ ینی خودا وأ هوطو کی تی دیل خوأیه ترَ پاداش فأده،
در حألی کی اونَ قوبیل نوکونی؟
تو وأ تصمیم بیگیری، نه من؛
هرچی کی دأنی، مرَ بوگو.
۳۴ «بافأمٚ آدمأن مرَ گیدی،
و حکیمٚ مردأی کی می گبَ بیشنأوه گه:
۳۵ ‹ایوب بی اَنکی اَنَ حألی ببه، گب زنه،
و اونٚ گبأن هَچین باد و هوایه.›
۳۶ کأشکی ایوب تا آخر ایمتحان ببه،
چره کی شرورأنٚ مأنستن جواب دهه؛
۳۷ چره کی خو گونایأنٚ رو نافرمانی‌یَ ایضافه کونه،
و اَمی میأن مسخره اَمرأ چاپلا زنه،
و خودا ضد، ایتأ عالمه گب زنه!»
Currently Selected:
ایوب ۳۴: گیلکی (رشتی)
Highlight
Share
Copy
Want to have your highlights saved across all your devices? Sign up or sign in
© 2010-2019 Gilak Media
