ایوب ۳۳
۳۳
۱ «پس هسأ، اَی ایوب، می گبأنَ گوش بدن،
و هرچی گمَ بیشنأو.
۲ هسأ می دَهنَ وازَ کونم،
و زوان می دَهنٚ دورون به گب اَیه.
۳ می گبأن می صاف و صادقٚ دیل جأ ویریزه،
و می لب هرچی کی دأنه صاف و سادگی اَمرأ گه.
۴ خودا روح مرَ خلق بوکوده،
و قادرٚ مطلقٚ نٚفٚس مرَ زندگی ببخشه.
۵ اگه تأنی، مرَ جواب بدن؛
ترَ آمادَه کون و می جُلُو بِئس.
۶ رأس رأسی خودا ورجأ تی مأنستن ایسم؛
منم گیلٚ جأ چأکوده بوبوستم.
۷ هسأ می جأ نوأ ترسئن و وحشت نوکون
و می گب تِره فشار نأوره.
۸ «رأس رأسی کی تو گب بزه‌یی و من بیشنأوستم،
و تی گبأن می گوش فأرسه.
۹ گی: ‹پاکم و گوناهی نوکودم؛
هیتّأ عیبی نأرم و می دورون گوناهی ننَه.
۱۰ هسأ خودا عایب و ایرادأنَ می دورون یأفه،
و مرَ خو دوشمن دأنه.
۱۱ می پایَ کوندٚه دورون دٚوٚده،
و تومامٚ می رأیأنَ پایه.›
۱۲ «ولی اَ موردٚ دورون حق تی اَمرأ نی‌یه،
من تی جوابَ دهم
چره کی خودا اینسأنٚ جأ پیله‌تره.
۱۳ چره خودا اَمرأ بوگو مگو کونی،
و گی: ‹اون، خو هیتّأ کارأنٚ رِه جواب پس نده؟›
۱۴ چره کی خودا ایجور گب زنه،
و اوجور گب زنه ولی اینسأنَ حألی نیبه.
۱۵ خوابٚ دورون، شبٚ رویا میأن،
او زمأتی کی اینسأن سنگین وأخوابَ شه،
وختی کی آدم خو جا سر خوفته،
۱۶ او وخت خودا اینسأنٚ گوشَ وأکونه،
و هوشدارأنٚ اَمرأ اونَ ترسأنه
۱۷ تا اینسأنَ خو کردکارأنٚ جأ وأگردأنه،
و اونٚ غرورٚ جُلُو بِئسه،
۱۸ ونأله اونٚ جان، مورده‌یأنٚ دونیا دورون بشه،
و شمشیرٚ اَمرأ جٚه بین بشه.
۱۹ «هَطویم اینسأن خو جاجیگاه دورون دردٚ اَمرأ ادب بِه،
گله و شکایت کونه همشک خو خاشأنٚ دردٚ وأسی.
۲۰ تا اَنکی نانٚ خوردنٚ جأ اونٚ جانَ بد اَیه،
هیچ خوروم خوراکٚ ایشتهایَ نأره.
۲۱ اونٚ جانٚ گوشت هَطو آبَ به کی دِه هیچی نمأنه،
اونٚ خاشأنم کی نشأستی دِئن، بیرون زنه.
۲۲ اونٚ جان، مورده‌یأنٚ دونیایَ نزدیکَ به،
و اونٚ زندگی کسأنی‌یَ کی مرگَ اَوریدی.
۲۳ «اگه اونٚ ورجأ ایتأ فرشته بِئسه،
ینی هیزارتأ فرشته‌یأنٚ میأن ایتأ فرشته میانجی ببه،
تا اونچی‌یَ کی اینسأنٚ رِه خُبه اونٚ رِه اعلام بوکونه،
۲۴ و اونَ لطف بوکونه و خودایَ بگه: ‹ونأل اون، مورده‌یأنٚ دونیا دورون بشه
چره کی اونٚ رِه ایتأ کفاره بیأفتم.›
۲۵ بأزین اونٚ جانٚ گوشت، زأکٚ جانٚ گوشتٚ مأنستن نرمَ به،
و خو جوانی روزأنَ وأگرده.
۲۶ او وخت خودایَ ایلتماس کونه،
و خودا اونَ قوبیل کونه؛
خودا دیمَ شادی ایجگره اَمرأ دینه،
و خودا اونٚ دوروستکاری‌یَ اونَ وأگردأنه.
۲۷ آوازٚ اَمرأ مردومأنٚ ورجأ اَیه و گه:
‹گوناه بوکودم و راسٚ رأ جأ بیرون بوشوم
ولی مِره سودی نأشتی.
۲۸ خودا می جانَ، مورده‌یأنٚ دونیا جأ نجات بدَه
منم زندگی‌یٚ روشنایی‌یَ دینم.›
۲۹ «رأس رأسی کی خودا تومامٚ اَ کارأنَ اینسأنٚ رِه انجام دهه،
دو مرتبه و یا حتی سه مرتبه،
۳۰ تا کی اونٚ جانَ مورده‌یأنٚ دونیا جأ وأگردأنه
و اونَ، زندگی نورٚ اَمرأ روشنَ کونه.
۳۱ «اَی ایوب، مرَ فَندر و گوش بدن؛
ساکیتَ بو کی من گب بزنم.
۳۲ اگه گبی دأری، مرَ بوگو؛
گب بزن چره کی خوأیم تی بی‌گوناهی‌یه ثابت بوکونم.
۳۳ وگرنه مرَ گوش بدن؛
ساکیتَ بو کی ترَ حکمتَ یاد بدم.»
Currently Selected:
ایوب ۳۳: گیلکی (رشتی)
Highlight
Share
Copy
Want to have your highlights saved across all your devices? Sign up or sign in
© 2010-2019 Gilak Media
