ایوب ۲۸
۲۸
۱ «رأس رأسی کی نقره معدن دأره،
و طلا رِه جاجیگایی نهَه کی اونٚ دورون تصفیه به.
۲ آهین، زیمینٚ جأ بدس اَیه،
و مرس#۲۸:۲ مرس ینی مس، آبَ بوسته سنگٚ دیلٚ جأ بیرون اَیه.
۳ اینسأن ظولمأتَ روشنَ کونه،
و تا او جولفٚ جایأن شه
کی ایتأ سنگَ تاریکی و ظولمأتٚ دورون بیأفه.
۴ او جایی کی اینسأن زندگی نوکونه، زیمینٚ دورون نقب زنه،
هو جایأنی کی هیکس اویه شوئون اَمون نوکونه؛
دور جٚه مردومأن آویزانَ بوسته، اَ طرف اوطرف تاب خوره.
۵ زیمینی کی اونٚ جأ نان بیرون اَیه،
اونٚ جولفٚ جیگا دورون، اینگار کی آتشٚ اَمرأ سرنگونَ به.
۶ کبودٚ یاقوت اونٚ سنگأنٚ دورون نهَه،
و اونٚ خاکم طلا اَمرأ قاطی بوبوسته‌یه.
۷ «هیتّأ شکاری پرنده اونٚ رأیَ نأنه،
و شاهینٚ چوم اونَ نیده.
۸ هیتّأ وحشی جک و جانور اونٚ رو خو پایَ ننَه،
و هیتّأ شیرم اونٚ جأ دنوأرسته.
۹ «اینسأن، چخماقٚ سنگَ ایشکنه،
و کویأنَ بیخٚ و بونٚ جأ فوگُردأنه.
۱۰ صخره‌یأنٚ دورونی‌یَ نقب زنه
و اونٚ چومأن تومامٚ قیمتی چیزأنَ دینه.
۱۱ روخانٚ چشمه‌یَ وأمجه،
و اونچی‌یَ کی قایمَ بوسته نهَه روشنایی دورون اَوره.
۱۲ «ولی حکمتَ کویه شأ یأفتن؟
و درک و فأمٚ جاجیگاه کویه ایسه؟
۱۳ اینسأن اونٚ قدرَ نأنه،
و زنده‌یأنٚ دونیا دورون پیدا نیبه.
۱۴ جولفٚ جیگا گه: ‹می دورون ننَه،›
و دریا گه: ‹می ورجأ نِیسه›.
۱۵ اونَ طلا اَمرأیم نشأ هِئن،
و نشأ نقره اَمرأ اونٚ رو قیمت نهن.
۱۶ ‹اوفیرٚ› طلا اَمرأ نشأ اونٚ رو قیمت نهن،
و نه گیرانٚ عمیق و کبودٚ یاقوتٚ مره.
۱۷ اونَ طلا و شیشه اَمرأ نتأنی ایتأ بوکونی،
و طلایی زیورآلاتٚ مره نشأ عوض دکش کودن.
۱۸ حکمتٚ جُلُو مرجان و بلورٚ جأ نشأ گب زِئن؛
اونٚ قیمت، مورواریدٚ جأ ویشترَ.
۱۹ ‹کوشٚ›#۲۸:۱۹کوش ایتأ سرزیمینی بو کی قدیمٚ زمأت، مصرٚ جنوبٚ طرف نهَه‌بو. زِبَرجد نتأنه اونٚ اَمرأ برابری بوکونه،
طلایٚ خالصٚ اَمرأ نشأ اونٚ رو قیمت نهن.
۲۰ «پس حکمت کویه جأ اَیه؟
و فأمٚ جاجیگاه کویه ایسه؟
۲۱ جاندارأنٚ چومأنٚ جأ جوخُفته،
و هوا پرنده‌یأنم هَطو.
۲۲ ‹اَبَدون› و مرگ گیدی:
‹فقط اونٚ صدا اَمی گوش فأرسه.›
۲۳ «فقط خودایه کی اونٚ رأیَ دأنه؛
و اونه کی اونٚ جاجیگایَ دأنه.
۲۴ چره کی اون، زیمینٚ چار طرفَ دینه،
و هرچی‌یَ کی آسمانٚ جیر نهَه فندره.
۲۵ او وخت کی بادٚ رِه وزن تعیین بوکوده،
و آبأنَ اندازه بیگیفته،
۲۶ هو وخت کی وارشٚ وأسی قانون بنَه،
و گورخانه رأیَ تعیین بوکوده،
۲۷ بأزین حکمتَ بیده و اونٚ اندازه‌یَ بیگیفته؛
اونَ برپا بوکوده و ایمتحان بوکوده.
۲۸ و اینسأنَ بوگفته:
‹وأ بدأنید حکمت، خودا جأ ترسئن ایسه،
و فأم، بدی جأ دوری کودنه.›»
Currently Selected:
ایوب ۲۸: گیلکی (رشتی)
Highlight
Share
Copy
Want to have your highlights saved across all your devices? Sign up or sign in
© 2010-2019 Gilak Media
