ایوب ۲۱
۲۱
ایوبٚ جواب
۱ بأزین ایوب جواب بدَه:
۲ «می گبأنَ خُب گوش بوکونید،
اَطویی شومأن می دیلَ آرامَ کونید.
۳ موهلت بدید کی گب بزنم
و بعدٚ اَنکی می گبأن تومامَ بوسته، تأنیدی مرَ دس پرَ گیرید.
۴ «مگه من اینسأنٚ جأ شاکی بوبوستم؟
چره نوأستی می طاقت کمَ به؟
۵ مرَ فندرید و قاقَ بید
انگشت به دَهن بِئسید.
۶ هر وخت مرَ یاد اَیه، وحشت کونم،
تومامٚ می عوصم و اعضا پرکِه.
۷ چره شرورٚ آدمأن زنده مأنیدی،
پیرَ بید و اوشأنٚ زور و قوّت ویشترَ به؟
۸ اوشأنٚ زأکأن خودشأنٚ چومأنٚ جُلُو پیلَه بیدی
و خوشأنٚ نوه‌یأنم دینیدی.
۹ اوشأنٚ خانه‌یأن ترس و وحشتٚ جأ امن و اَمأنه
و خودا چوبم اوشأنٚ سرٚ جور ننَه.
۱۰ ;;اوشأنٚ کله ورزأ هر وخت گابٚ اَمرأ جوفت‌گیری کونه، اون شکم اوسأنه
و زأیه و خو مانده‌یَ تئنوده.
۱۱ خوشأنٚ زأکأنَ گله مأنستن اوسه کونیدی بیرون
و اوشأنٚ جغالأن واز واز کونیدی.
۱۲ دف و بربطٚ اَمرأ آواز خوأنیدی
و نی صدا اَمرأ شادی کونید.
۱۳ خوشأنٚ روزأنَ خوشبختی اَمرأ گوذرأنیدی
و آرامشٚ اَمرأ شیدی مورده‌یأنٚ دونیا.
۱۴ خودایَ گیدی: ‹اَمی جأ دورَ بو!
اَمأن نخوأییم تی رأیأنَ بشنأسیم.
۱۵ قادرٚ مطلق کیسه کی اونَ عیبادت بوکونیم؟
دوعا کودن اونٚ ورجأ اَمِره چی سودی دأره؟›
۱۶ ولی اوشأنٚ خوشبختی خودشأنٚ دس نی‌یه،
پس شرورأنٚ نقشه‌یأنٚ جأ دور ایسم.
۱۷ «چن وار بیده‌ییدی کی شرورٚ آدمأنٚ چراغأن خاموشَ به؟
یا بلا اوشأنٚ سر بأیه؟
یا خودا، خو غیظٚ اَمرأ، دردَ اوشأنٚ جان تأوده.
۱۸ چن وار بیده‌ییدی کی بادٚ جُلُو هَچین کاه مأنستن بیبید
یا کولوشٚ مأنستن کی توندٚ باد اونَ خو اَمرأ بره؟
۱۹ شومأن گیدی: ‹خودا، شرورأنٚ زأکأنَ اوشأنٚ عوض موجازات کونه.›
ولی من گم، خودا وأ او شرورٚ آدمأنَ موجازات بوکونه کی اوشأنَ حألی ببه.
۲۰ ببه کی خوشأنٚ چومٚ اَمرأ، خوشأنٚ نابودی‌یه فندرید،
و قادرٚ مطلقٚ غیظٚ جأ نوشٚ جان بوکونید!
۲۱ چره کی وختی میره، خو زن و زأکٚ وأسی دیل‌نیگران نیبه،
بعد اَنکی اونٚ روزأن تومامَ به؟
۲۲ «مگه شأ خودایَ تعلیم دَئن؟
در حألی کی اون خودش، پیله کسأنَ حوکم کونه.
۲۳ اینفر هوطو کی ساق و سالم ایسه میره،
هَطو کی امنیت و آرامش دأره؛
۲۴ اونٚ شکم سِئره،
و اونٚ خاشأن ساق و سالم.
۲۵ اینفر دیگرٚ جان همش زرخه تا بیمیره
و هیوخت خوشبختی مزه‌یَ نچشه.
۲۶ هر دوتأن کس‌کسٚ ورجأ خاکٚ دورون خوسیدی
و کِلمأن اوشأنٚ سر و جانَ پوشأنیدی.
۲۷ «شیمی فیکرأنَ خُب دأنم،
و نقشه‌یأنی کی می آزار دَئنٚ وأسی کشیدی.
۲۸ چره کی گیدی: ‹نجیب‌زاده خانه کویه ایسه؟
شرورٚ آدمأنٚ خیمه کی اویه زندگی کودید، کویه ایسه؟›
۲۹ رأدورأنٚ جأ ونوأرسه‌ییدی؟
اونچی‌یَ کی اوشأن سفرٚ دورون بیده‌ییدی، شومأن قوبیل نوکونیدی،
۳۰ اَنکی شرورٚ مردأی سختی روزأنٚ دورون امنیت دأره
و خودا غیظٚ جأ جیویزه؟
۳۱ کیسه کی اونَ نیشأن بده کی اونٚ کردکارأن بد ایسیدی؟
و کیسه کی اونٚ شرورٚ کارأنٚ وأسی موجازات بوکونه؟
۳۲ اونَ بریدی قبرستان،
و اونٚ قبرٚ سر پاسبانی دهیدی.
۳۳ قبرستانٚ خاک اونٚ رِه شیرین ایسه؛
تومامٚ مردوم اونٚ دونبألسر شیدی
و اونٚ جُلُو ایتأ عالمه آدم رأ شوئون دریدی.
۳۴ پس چوطو تأنیدی مرَ شیمی بیخودٚ گبأنٚ اَمرأ آرامَ کونید؟
شیمی جوابأنٚ جأ فقط بی‌وفایی مأنه.»
Currently Selected:
ایوب ۲۱: گیلکی (رشتی)
Highlight
Share
Copy
Want to have your highlights saved across all your devices? Sign up or sign in
© 2010-2019 Gilak Media
