ایوب ۱۹
۱۹
ایوبٚ جواب
۱ بأزین ایوب وأگردسته بوگفته:
۲ تا کِی خوأییدی مرَ عذاب بدید؟
و تا کِی شیمی گبأنٚ اَمرأ مرَ دورسنیدی؟
۳ دهمی واره کی مرَ سرزنش کودَن درید؛
خجالت نکشیدی کی می اَمرأ بدرفتاری کونیدی؟
۴ اگرم رأس رأسی می پایَ کج بنَه‌بیم،
می خطا مرَ ضرر رسأنه، نه شمرَ.
۵ اگه رأس رأسی گومان کونیدی می جأ پیله‌تر ایسیدی
و می رسوایی‌یَ می ضد به کار گیریدی،
۶ بدأنید اَن خودا بو کی می مره بدی بوکوده
و مرَ خو دامٚ دورون تأوده.
۷ هر چی داد زنم و خشونتٚ جأ گم،
هیکس مرَ جواب ندِه.
هر چی ایجگره اَمرأ کومک خوأیم،
هیکس نی‌یه به می داد فأرسه.
۸ خودا می رأیَ دٚوٚسته کی نتأنم دوأرم،
و ظولمأت، تومامٚ می رایَ بیگیفته دأره.
۹ می آبرویَ ببرده
و تاجَ می سرٚ جا اوسأده.
۱۰ مرَ جٚه هر طرف خوردَ کوده و جٚه بین ببرده؛
می اومیدَ دارٚ مأنستن ریشه جأ بکنده.
۱۱ خو غیظٚ اَمرأ می ضد وٚل بیگیفته
و مرَ خو دوشمن دأنه.
۱۲ خودا لشکرأن همدیگرٚ اَمرأ اَییدی؛
می ضد سنگر چأکونیدی،
و می خیمه دور اوردو زنیدی.
۱۳ اون، می برأرأنَ می جأ دورَ کوده،
و می آشنایأن می اَمرأ کاملاً غریبه‌ییدی.
۱۴ می فک و فامیلأن می جأ دورَ بوستیدی
و می رِفِقأن مرَ جٚه خأطر ببردید.
۱۵ می خانه مهمانأن و می کولفتأنَ مرَ غریبه دأنیدی،
و اوشأنٚ چومٚ جُلُو ایتأ بیگانه‌یَ مأنم.
۱۶ می نوکرَ دوخوأنم ولی مرَ جواب نده؛
اگه چی می دَهنٚ اَمرأ اونَ ایلتماس بوکونم.
۱۷ می دَهنٚ بو می زنأکٚ حالَ بهم زنه
و می برأر خأخورأن نتأنیدی مرَ تحمول بوکونید.
۱۸ کوچی زأکأنم مرَ کوچیکَ کونیدی
و وختی ویریزم می ضد گب زنیدی.
۱۹ تومامٚ می خانه‌زاده رِفِقأن می جأ بیزاریدی
کسأنی‌یَ کی دوس دأرم می ضد وأگردستید.
۲۰ می خاشأن می پوست و گوشتَ دوچکستید؛
ایتأ خالٚ مویَ بندم.
۲۱ وای اَی رِفِقأن، مرَ رحم بوکونید! مرَ رحم بوکونید!
چره کی خودا خو دسٚ اَمرأ مرَ بزه.
۲۲ چره خودا مأنستن می دونبأل ایسید کی مرَ شکار کونید؟
می جانٚ گوشتٚ خوردنٚ جأ سِئرَ نوبوستید؟
۲۳ کأشکی می گبأن بینیوشته بوبوسته‌بی!
کأشکی ایتأ طومارٚ دورون ثبت بوبوسته‌بی!
۲۴ کأشکی آهینی و سربٚ قلمٚ اَمرأ،
صخره سر تا اَبد بینیویشته بوبوسته‌بو!
۲۵ ولی من دأنم، اونی کی مرَ نجات دهه زنده‌یه،
و بیلاخره زیمینٚ سر اَیه و به پا ایسه.
۲۶ و بعدٚ اَنکی می جانٚ پوست اَطویی خرابَ به،
ولی می جانٚ اَمرأ خودایَ دینم!
۲۷ دأنم کی خودم اونَ دینم،
و می چومأنٚ اَمرأ اونَ فندرم، کی دِه اون غریبه نی‌یه.
و می دیل می جانٚ دورون ذوقٚ جأ پَر گیره!
۲۸ «اگه گیدی: ‹چوطویی اونٚ دونبأل بِیسیم کی اونَ شکار بوکونیم،
چره کی موشکلأنٚ ریشه خودشٚ دورونی نهَه؟›
۲۹ شومأن وأ شمشیرٚ جأ بترسید،
چره کی غیظ خو اَمرأ موجازاتٚ شمشیر اَوره،
کی بدأنید کی داوری روزم نهَه.»
Currently Selected:
ایوب ۱۹: گیلکی (رشتی)
Highlight
Share
Copy
Want to have your highlights saved across all your devices? Sign up or sign in
© 2010-2019 Gilak Media
