ایوب ۱۸
۱۸
بِلدَدٚ گبأن
۱ بأزین بَلدَدٚ شوحی وأگردسته بوگفته:
۲ «تا کِی خوأیی اَ گبأنَ درازَ بدی؟
ایتأ پیچه فیکر بوکون، بأزین گب زنیم.
۳ چره بی‌شعورٚ جانورأنٚ مأنستن بحیساب اَییمی؟
چره تی ورجأ بی‌عقل بحیساب بأییم؟
۴ تو کی غیظٚ جأ ترَ پارَه کونی،
آیا زیمین تی وأسی وأ خالی ببه
یا صخره‌یأن وأ جابجا بیبید؟
۵ «رأس رأسی کی شرورٚ آدمأنٚ چراغ سو خاموشَ به
و اوشأنٚ آتشٚ شواله دِه سو نأره.
۶ سویی کی اوشأنٚ خیمه جأ بیرون اَیه تاریکَ به
و چراغی کی اوشأنٚ سرٚ جور نهَه خاموشَ به.
۷ اوشأنٚ پور قوّتٚ قدمأن سوستَ بوستیدی
و اوشأنٚ نقشه‌یأن اوشأنَ بیجیر تأودَه.
۸ چره کی خوشأنٚ پا مره دامٚ دورون دکفیدی
و تورأنٚ سر رأ شیدی.
۹ تله اوشأنٚ پا بوزَ گیره
و دام اوشأنَ قایم دأره.
۱۰ لافند زیمینٚ سر اوشأنٚ رِه قایمَ بوسته دأره
و تله اوشأنٚ رأ سر نهَه.
۱۱ ترسأن جٚه هر طرف اوشأنٚ زهله‌یَ ترکأنیدی
و هر قدمی کی اوسأنیدی اوشأنَ اذیت و آزار کونید.
۱۲ اوشأنٚ قوّت کمَ به
و موصیبتٚ منتظر ایسَه‌ییدی کی اوشأنٚ پا جیویزه.
۱۳ ناخوشی اوشأنٚ جانٚ پوستَ خوره
و مرگ اوشأنٚ عوصم و اعضایَ فٚوٚره.
۱۴ جٚه خیمه‌یأنی کی اوشأنٚ دورون امنیت دأشتیدی بکنده بوبوستید
و ‹پادشایٚ وحشتٚ›#۱۸:۱۴ ینی مرگ ورجأ، بأورده بوبوستیدی.
۱۵ اوشأنٚ خیمه دورون کسأنی ایسید کی اوشأنٚ اَمرأ هیچ نسبّتی نأرید؛
اوشأنٚ جاجیگاه دورون گوگرد فوکوده بوبوسته.
۱۶ اوشأنٚ ریشه‌یأن جٚه بیجیر خوشکَ به
و اوشأنٚ شاخه‌یأن جٚه بوجور وأوِه به.
۱۷ اوشأنٚ یاد زیمینٚ جأ پاکَ به
و کوچه‌یأنٚ میأن نامی نأریدی.
۱۸ روشنایی جأ، ظولمأتٚ دورون بیرون تأودَه بید
و اوشأنَ دونیا جأ بیرونَ کونید.
۱۹ خوشأنٚ قومٚ میأن نه زأکی دأریدی و نه نسلی
و اوشأنٚ جاجیگاه دورون هیکس باقی نمأنسته.
۲۰ مردومأنی کی مغربٚ طرف زندگی کونیدی اوشأنٚ سرگذشتٚ جأ قأقیدی،
و کسأنی کی مشرقٚ طرف زندگی کونیدی اوشأنٚ دیل ترکه.
۲۱ رأس رأسی کی ناجورٚ آدمأنٚ جاجیگاه اَطویه،
و هَطویم جایی کی خودا نشنأسأن ساکن ایسید.»
Currently Selected:
ایوب ۱۸: گیلکی (رشتی)
Highlight
Share
Copy
Want to have your highlights saved across all your devices? Sign up or sign in
© 2010-2019 Gilak Media
