ایوب ۱۲
۱۲
ایوبٚ جواب
۱ بأزین ایوب وأگردسته بوگفته:
۲ «رأس رأسی کی شومأن با فأمٚ مردومأن ایسید
و حکمت شیمی اَمرأ میره!
۳ ولی منم شیمی مأنستن فأم و درک دأرم،
و شیمی جأ کمتر نی‌یم.
کیسه کی اَ جور چیزأنَ ندأنه؟
۴ «می رِفِقأن مرَ رخشنَ گیریدی،
مرَ کی خودایَ دوخوأنم
و می جوابَ دهه؛
بله، مرَ کی پارسا ایسم و عیبی نأرم، دس پرَ گیریدی!
۵ اونی کی خو پوشتٚ تأن خوفته، دیگرأنٚ غم و غورصه‌یَ کوجه‌دأنه دینه،
و کسأنی‌یَ کی اوشأنٚ پا لیز خوره، لقد زنه.
۶ رأزنأنٚ جاجیگاه همیشه آرامه
و اوشأنی کی خودایَ به غیظ اَوریدی امنٚ ایسیدی،
اوشأنی کی خودایَ خوشأنٚ دسٚ دورون دأریدی!
۷ «هسأ جک و جانورأنٚ جأ وأورس تا ترَ یاد بدید،
و آسمانٚ پرنده‌یأنٚ جأ تا ترَ بیگید.
۸ زیمینٚ اَمرأ گب بزن تا ترَ تعلیم بده
و وهل دریا مأیی‌یأن تِره خبر بأورید.
۹ تومامٚ اوشأنٚ جأ کیسه کی نفأمه
خودا دس اَ کارَ بوکوده؟
۱۰ تومامٚ زنده‌یأنٚ حیات اونٚ دسأنٚ دورون نهَه
و تومامٚ آدمأنٚ نَفَس.
۱۱ آیا هوطو کی دَهن خو خوراکَ چشه
گوش گبأنَ ایمتحان نوکونه؟
۱۲ حکمت پیرأنٚ ورجأ نهَه
و فأم درازٚ عمرٚ دورون.
۱۳ «حکمت و قودرت خودا شینه،
مشورت و فأمم هَطو.
۱۴ اگه ویرانَ کونه،
کسی نتأنه اونَ دوواره چأکونه؛
اگه آدمَ اسیرَ کونه،
کسی نتأنه اونَ آزادَ کونه.
۱۵ اگه آبأنٚ جولُویَ بیگیره، خوشکَ بید؛
اگه اوشأنَ ولَ کونه، تومامٚ زیمینَ آب گیره.
۱۶ قودرت و حکمت اونٚ ورجأ نهَه،
گول بوخورده و گول بزه، هر دوتأ خودا دسأنٚ دورون نهَه.
۱۷ خودا، مشاورأنٚ حکمتَ اوشأنٚ جأ فیگیره
و داورأنَ تورَ کونه.
۱۸ پادشایأنٚ لیباسَ اوشأنٚ جأ فیگیره
و غولامی کمرقیشَ اوشأنٚ کمر دٚوٚده.
۱۹ همه چی‌یَ کاهنأنٚ جأ فیگیره و اوشأنَ اسیری بره
و قودرتمندأنٚ قوّتَ فیگیره.
۲۰ معتمدٚ آدمأنَ ساکیتَ کونه
و پیرأنٚ فأمَ اوشأنٚ جأ گیره.
۲۱ خفتَ نجیب زاده‌یأنٚ سر فوکونه
و پألوانأنٚ کمرقیشَ وازَ کونه.
۲۲ تاریکی جأ پیله کارأنَ آشکارَ کونه
و ظولمأتَ روشنایی دورون اَوره.
۲۳ قومأنَ پیلَه کونه یا اوشأنَ هلاکَ کونه؛
میلتأنٚ جمعیتَ زیادَ کونه یا اوشأنَ اسیری بره.
۲۴ عقلَ جٚه دونیا رهبرأن فیگیره
و اوشأنَ بیابانٚ میأن کی هیچ رأهی نأره، اویرَ کونه.
۲۵ تاریکی میأن دس وأمج رأ شیدی
و کاری کونه کی مستٚ آدمأنٚ مأنستن دگرَه بوخورید.
Currently Selected:
ایوب ۱۲: گیلکی (رشتی)
Highlight
Share
Copy
Want to have your highlights saved across all your devices? Sign up or sign in
© 2010-2019 Gilak Media
