عِزرا ۹
۹
عِزرا دوعا
۱ بأزین کی اَ کارأن تومامَ بوسته، قومٚ پیله کسأن می ورجأ بموییدی و بوگفتید: «ایسرائیلٚ قوم و کاهنأن و لاویأن خوشأنَ الباقی میلتأنٚ جأ سیوأ نوکودید، بلکی نجستٚ کارأنی کی کنعانیأن، حیتّیأن، فِرِزّیأن، یِبوسیأن، عَمّونیأن، موآبیأن، مصری‌یأن و اَموریأن کونیدی، انجام بدَه‌یید. ۲ چره کی اوشأنٚ دُخترأنٚ جأ، خوشأنٚ رِه و خوشأنٚ پسرأنٚ رِه زن بیگیفتیدی و اَطویی خوشأنٚ موقدّسٚ قومَ، دیگر سرزیمینأنٚ قومأنٚ اَمرأ قاطی بوکودیدی و قومٚ رهبرأن و حاکمأن اَ خیانتٚ میأن پیش قدم بید.»
۳ وختی اَ گبَ بیشنأوستم، می رخت و ردایَ پارَه کودم و می سرٚ مو و می ریشَ بکندم و قاقَ بوستم، بینیشتم. ۴ بأزین، تومامٚ اوشأنی کی تبعیدَ بوسته‌یأنٚ خیانتٚ وأسی، ایسرائیلٚ خودا گبٚ جأ بترسه‌بید، می دور جمَ بوستید و من تأ او وختی کی غروب دم قوربانی‌یَ تقدیم کودیدی، قاقَ بوسته نیىشته‌بوم. ۵ و غروب دم قوربانی موقع، می حالٚ زارٚ جأ بیرون بموم و ویریشتم و می ژندره مندره رخت و ردا اَمرأ زانو بزم و می دسَ، یهوه، می خودا طرف درازَ کودم ۶ و بوگفتم: «اَی می خودا، شرم کونم و جٚه اَنکی می سرَ تی طرف بوجور گیرم خجالت کشم، چره کی اَمی گونایأن، اَمی سرٚ جأ بوگوذشته و اَمی خطایأن، آسمانٚ جور فأرسه. ۷ اَمأن، جٚه اَمی پئرأنٚ روزأن تا هسأ پیله خطایأن بوکودیم. اَمأن و اَمی پادشایأن و کاهنأن، اَمی گونایأنٚ وأسی، بیگانه پادشایأنٚ دسٚ اَمرأ، شمشیر و اسیری و غارت و روسوایی اَمرأ تسلیم بوبوستیم، هوطو کی ایمروز دِئن دریمی. ۸ و هسأ، اَ کوجه زمأتٚ دورون، یهوه، اَمی خودا، اَمرَ لطف بوکوده، وهشته کی ایتأ عده تبعیدٚ جأ وأگردید و خو موقدّسٚ جاجیگاه دورون، اَمرَ جا بدَه تأ امنیت بدأریم، و اَطویی اَمی خودا اَمی چومأنَ نور دتأوأنه و بندگی موقع ایتأ پیچه اَمی جانَ تازَه کوده. ۹ چره کی اَمأن بنده ایسیم، ولی اَمی خودا، اَمرَ بندگی دورأنٚ میأن ولَ نوکوده، بلکی خو موحبتَ پارسٚ پادشایأنٚ ورجأ اَمرَ ببخشه، اَمی جانَ تازَه کوده تا اَمی خودا معبدَ دوواره چأکونیم و اونٚ خرابه‌یأنَ چأکون وأکون بوکونیم و اَمرَ یهودا و اورشلیمٚ میأن حیصارٚ اَمرأ موحافظت بوکوده.
۱۰ «هسأ اَی اَمی خودا، بأزین چی وأ بیگیم؟ چره کی تی دستورأنَ محل نوکودیم، ۱۱ هو دستورأنی کی پیغمبرأنٚ دسٚ اَمرأ کی تی ختمتگوزارأن بید، فرمان بدَه‌یی و بوگفتی: ‹او زیمینی کی اونٚ فیگیفتنٚ وأسی اونٚ دورون شوئون‌دریدی، زیمینی ایسه کی اونٚ مردومأنٚ پستٚ کارأنٚ وأسی نجستَ بوسته. اوشأن سرتاسرٚ او زیمینَ خوشأنٚ نجستٚ کردکارأنٚ اَمرأ کثیفَ کودید. ۱۲ هَنٚ وأسی شیمی دُخترأنَ اوشأنٚ پسرأنَ فئندید و اوشأنٚ دُخترأنَ شیمی پسرأنٚ رِه فئنگیرید. هیوخت اوشأنٚ جان ساقی و خوشبختی‌یَ نوأ خوأستنید کی قوی بیبید و او زیمینٚ خوروم خوراکی‌یأنَ بوخورید و او سرزیمینَ شیمی زأکأنٚ رِه تا اَبد به ارث بنید.› ۱۳ تومامٚ اَ بلایأن کی اَمی سر بمو، اَمی بدٚ کردکارأن و پیله گونایأنٚ وأسی بو، ولی بازم تو، اَی اَمی خودا، اَمرَ کمتر جٚه اَمی گونایأنٚ وأسی موجازات بوکودی، موجازاتی کی اَمی حق بو و وهشتی کی ایتأ عده جٚه اَمأن زنده بِئسیم. ۱۴ پس چوطو تأنیمی ایوار دِه تی دستورأنٚ جأ سرپیچی بوکونیم و او قومأنٚ اَمرأ کی اَ جور پستٚ کارأن کونیدی، قوم و خویش بیبیم؟ بأزین ترَ اوطو غیظ نیگیره کی همه‌تأنٚ اَمرَ جٚه بین ببری، جوری کی نه کسی جأ چیزی باقی مأنه، و هیکسم نتأنه جان بدر ببره؟ ۱۵ اَی یهوه، ایسرائیلٚ خودا، تو عادلی، چره کی وهشتی ایتأ عیده جٚه اَمأن زنده بِئسیم، هوطو کی ایمروز دِئن‌دریمی. اَمأن اَمی گونایأنٚ اَمرأ تی ورجأ ایسَه‌ییم؛ اگه چی اَ حالٚ روزٚ میأن هیکس نتأنه اَ کردکارأنٚ اَمرأ، تی جُلُو بِئسه.»
Currently Selected:
عِزرا ۹: گیلکی (رشتی)
Highlight
Share
Copy
Want to have your highlights saved across all your devices? Sign up or sign in
© 2010-2019 Gilak Media
