عِزرا ۶

داریوشٚ فرمان

۱ بأزین داریوشٚ پادشا دستور بدَه بابِلٚ کیتابخانه میأن کی سندأن اونٚ دورون نهَه‌بید، وأمجید. ۲ و اِکباتانٚ شهرٚ قصرٚ دورونی کی مادأنٚ سرزیمینٚ میأن نهَه‌بو، ایتأ طومار پیدا بوبوسته کی اونٚ دورون اَطویی بینیویشته‌بو: ۳ «کوروشٚ پادشا خو سلطنتٚ اوّلی سال، ایتأ دستور اَ متنٚ اَمرأ اورشلیمٚ معبدٚ وأسی صادر بوکوده: «او معبد، قوربانی‌یأنٚ پیش‌کش کودنٚ وأسی دوواره چأکوده ببه و اونٚ پاکارم بکنید کی معبدٚ درازا و پهنا شصت ذراع ببه. ۴ سه رَج بتأشته سنگأنٚ اَمرأ و ایتأ رَج الوارٚ چوبٚ مره چأکوده ببه و اونٚ خرج و مخارجم پادشا خزانه جأ فأدَه ببه. ۵ هَطویم معبدٚ طلا و نقره ظرفأنَ کی نبوکدنصر اوشأنَ اورشلیمٚ معبدٚ جأ اوسأده و بابِلَ ببرده‌بو، وأگردأنید و اوشأنَ ببرید و خوشأنٚ جا سر اورشلیمٚ معبدٚ دورون بنید.

۶ «پس هسأ اَی تَتِنایی، ماوراءالنهرٚ والی و شِتَربوزِنای و شومأن و شیمی همدسأن کی ماوراءالنهرٚ پیله کسأن ایسید، اویه جأ دورَ بید. ۷ و معبد چأکودنٚ رِه کاری نوأ دأشتنید. وئلید یوهودٚ فرماندار و یوهودیأنٚ پیله کسأن اَ معبدَ خو اوّلی جا سر، دوواره چأکونید. ۸ هَطویم فرمان دهم کی شومأن وأ چوطویی اَ یوهودٚ پیله کسأنَ معبد چأکودنٚ وأسی کومک بوکونید. تومامٚ خرج و مخارجم پادشا مال و منالٚ جأ، ینی ماوراءالنهرٚ خراجٚ جأ، اَ مردومأنَ فأدید تا کار نوخوسه. ۹ همه‌تأن روزأن هرچی کی نیاز ایسه جٚه گاب و قوچ و بره کی خودایٚ آسمانَ سوجأنئنی قوربانی فأدید و گندم و نمک و شراب و روغن هَطویی کی اورشلیمٚ کاهنأن شمرَ گیدی، بدونٚ ایذره کم و زیادَ کودن اوشأنَ فأدَه ببه. ۱۰ تا اَنکی اوشأن خوروم پیش‌کشی‌یأنَ خودایٚ آسمانَ فأدید و پادشا و اونٚ زأکأنٚ جان‌ساقی رِه دوعا بوکونید. ۱۱ و هَطویم فرمان دهم کی هر کی بخوأیه اَ حوکمَ عوضَ کونه، ایتأ دارٚ خال اونٚ خانه جأ بکنید و اونَ هو دارٚ خالٚ رو بچسبأنید و راستَ کونید و اونٚ خانه اونٚ کردکارٚ وأسی آشخال‌دأنی ببه ۱۲ و ببه کی خودایی کی خو نامَ اویه ساکن بوکوده، هر پادشا یا قومی کی اَ حوکمَ عوضٚ کودنٚ وأسی یا اَ معبدٚ فوگوردأنئنٚ وأسی کی اورشلیم میأن نهَه خو دسَ درازَ کونه، نابود بوکونه. من، داریوش اَ فرمانَ صادر کونم؛ وأستی اَ کار تومام و کمال انجام ببه.»

معبد وقف به

۱۳ او وخت تَتِنای، ماوراءالنهرٚ والی و شِتَربوزِنای و اوشأنٚ همدسأن او حوکمی کی داریوشٚ پادشا فأدَه‌بو، تومام و کمال انجام بدَه‌یید. ۱۴ و یوهودٚ پیله کسأن دوواره معبدٚ چأکودنَ ایدامه بدَه‌یید و او پیشگویی‌یأنٚ وأسی کی حَجَّی نبی و زکریا، عِدّو زأی، بوکوده‌بید، خوشأنٚ خوأسته‌یَ فأرسه‌ییدی. بأزین ایسرائیلٚ خودا فرمان و کوروش و داریوش و اردشیر، پارس پادشایأنٚ دستورأنٚ اَمرأ معبد چأکودنَ تومامَ کودیدی. ۱۵ اَ معبد چأکودن، داریوشٚ پادشا حکومتٚ شیشمی سال، سومی روزٚ ماهٚ اَذار تومام بوبوست.

۱۶ بأزین بنی‌ایسرائیل، ینی کاهنأن و لاویأن و تومامٚ کسایی کی تبعیدٚ جأ وأگردسته‌بید، شوق و ذوقٚ اَمرأ معبدٚ وقفٚ رِه جشن بیگیفتیدی. ۱۷ اوشأن معبدٚ وأگوزاری وأسی، صدتأ گاب و دیویست‌تأ قوچ و چار صد بره قوربانی بوکودید و هَطویم تومامٚ بنی‌ایسرائیلٚ گونایأنٚ وأسی، دوازده‌تأ نرٚ بوز، ینی ایتأ نرٚ بوز هر ایسرائیلٚ طایفه رِه. ۱۸ اوشأن هوطو کی موسی کیتابٚ میأن بینیویشته بوبوسته، کاهنأنَ اوشأنٚ جا سر و لاویأنم هر کی خو دسته میأن، خودا ختمت کودنٚ رِه اورشلیمٚ میأن بنَه‌یید.

عیدٚ پِسَخ

۱۹ چاردهمی روز جٚه اوّلی ماه، اوشأنی کی تبعیدٚ جأ وأگردسته‌بید، عیدٚ پِسَخَ جشن بیگیفتید ۲۰ چره کی تومامٚ کاهنأن و لاویأن خوشأنَ تر و تیمیزَ کودید و همه‌تأن پاکَ بوستید. لاویأن پِسَخٚ برّه‌یَ او کسأنی وأسی کی تبعیدٚ جأ وأگردسته‌بید و خوشأنٚ دینی برأرأن، ینی کاهنأنٚ وأسی و خوشأنٚ رِه قوربانی بوکودید. ۲۱ بأزین ایسرائیلٚ آدمأن کی تبعیدٚ جأ وأگردسته‌بید، او قوربانی گوشتٚ جأ بوخوردید و هَطویم تومامٚ اوشأنی کی خوشأنَ جٚه نجستٚ کارأنی کی او سرزیمینٚ قومأنٚ شین بو سیوأ کوده‌بید، جمَ بوستید تا یهوه، ایسرائیلٚ خودایَ عیبادت بوکونید. ۲۲ اوشأن عیدٚ نانٚ فطیرَ#۶‏:۲۲ عیدٚ پِسَخ ایتأ روزٚ جشن بو کی بعدٚ اون هفت روزٚ دیگرم جشن گیفتیدی کی اَ عیدٚ نام «فطیر» بو و اَ روزأنٚ میأن نان بدونٚ خمیر مایه خوریدی. هفت روز ذوق و شوقٚ اَمرأ جشن بیگیفتید، چره کی خوداوند اوشأنٚ دیلَ شادَ کوده‌بو و هَطویم آشورٚ پادشا دیلَ نرمَ کوده‌بو تا اوشأنٚ دسَ، ایسرائیلٚ خودا معبدٚ چأکودنٚ وأسی بیگیره.

Currently Selected:

عِزرا ۶: گیلکی (رشتی)

Highlight

Copy