خروج ۷
۷
موسی و هارون شیدی فرعونٚ ورجأ
۱ بأزین خوداوند موسایَ بوگفته: «من کاری بوکودم کی تو فرعونٚ رِه خودا مأنستن و تی برأر هارون، تی رسول ببه. ۲ هر فرمانی کی ترَ گم، تی برأر هارونَ بوگو کی اون فرعونٚ رِه واگویا بوکونه، کی وئله بنیایسرائیل اونٚ سرزیمینٚ جأ بیرون بأیید. ۳ ولی من فرعونٚ دیلَ سختَ کونم، و با اَنکی نیشأنهیأن و معجزهیأنٚ زیادی سرزیمینٚ مصرٚ میأن آشکارَ کونم، ۴ اون شیمی گبأنَ گوش نوکونه. بأزین می دسَ مصرٚ سر راستَ کونم و پیله داورییأنٚ اَمرأ می لشکرییأن، ینی می قوم، بنیایسرائیلَ جٚه اویه بیرون اَورم. ۵ پس وختی می دسَ مصرٚ سر راستَ کونم و بنیایسرائیلَ جٚه اویه بیرون اَورم، مصرییأنَ حألی به کی من خوداوند ایسم.» ۶ موسی و هارون هر چییَ کی خوداوند فرمان بدَهبو، انجام بدَهییدی. ۷ موسی هشتاد ساله و هارون هشتاد و سه ساله بید، وختی فرعونٚ اَمرأ گب بزهییدی.
موسی عصا لأنتی به
۸ خوداوند موسی و هارونَ اَطویی بوگفته: ۹ «وختی فرعون شیمی جأ معجزه بخوأسته، هارونَ بوگو: ‹تی عصایَ اوسأن و فرعونٚ جُلُو تأود زیمینٚ سر› و عصا ایتأ لأنتی به.» ۱۰ پس موسی و هارون بوشوییدی فرعونٚ ورجأ و هرچی خوداوند فرمان بدَهبو انجام بدَهییدی. هارون خو عصایَ فرعون و اونٚ خدمتگوزارأنٚ جُلُو تأوده زیمینٚ سر و عصا ایتأ لأنتی بوبوسته. ۱۱ ولی فرعون خو حکیمأن و جادوگرأنَ دوخوأده، او مصرییأنم خوشأنٚ جادو جنبلٚ اَمرأ هو کارَ بوکودی. ۱۲ هر کدام خو عصایَ تأوده زیمینٚ سر و عصا لأنتی بوبوسته. ولی هارونٚ عصا اوشأنٚ عصایأنَ فٚوٚرسته. ۱۳ فرعونٚ دیل سختَ بوسته و اوشأنٚ گبأنَ گوش ندَه، هوطو کی خوداوند بوگفتهبو.
بلای خون
۱۴ بأزین خوداوند موسایَ بوگفته: «فرعونٚ دیل سختَ بوسته و قوبیل نوکونه کی قومَ آزادَ کونه. ۱۵ صُبٚ زود کی فرعون شه روخانٚ نیلٚ کنار، بوشو اونٚ ورجأ. تی عصایَ کی لأنتی بوبوستهبو به دسَ گیر و روخانٚ کنار اونٚ رافا بِیس. ۱۶ فرعونَ بوگو: ‹یهوه، عبرانیأنٚ خودا، مرَ اوسه کوده تی ورجأ و بوگفته: ”می قومَ آزادَ کون کی بیشید بیابانٚ میأن مرَ عیبادت بوکونید.“ تا هسأ اونٚ گبأنَ گوش نوکودی. ۱۷ پس خوداوند گه: ”کاری کونم کی بدأنی من خوداوند ایسم،“ می عصا اَمرأ کی بدس دأرم نیلٚ روخانٚ آبَ زنم و اون خون به. ۱۸ روخانٚ ماهییأن میریدی، روخانٚ آب بو دکفه و مصرییأن هی ذره نتأنستید او آبَ بوخورید.»
۱۹ خوداوند هَطویم موسایَ بوگفته: «هارونَ بوگو: ‹تی عصایَ بزن نیلٚ روخانٚ میأن و تی دسَ مصرٚ آبأنٚ سر راستَ کون ینی روخانأن و کانالأن، حوضأن و تومامٚ سلأن و همه خون بیدی.› مصرٚ همه جا خون به، حتی چوبی ودرهیأن و سنگٚ کوزهیأنٚ میأن.»
۲۰ موسی و هارون، هوطو کی خوداوند بوگفتهبو، انجام بدَهییدی. فرعون و اونٚ خدمتگوزارأنٚ جُلُو خو عصایَ راستَ کوده و نیلٚ آبَ بزه و تومامٚ آب خون بوبوسته. ۲۱ روخانٚ ماهییأن بمردیدی، روخان بو دکفته، و مصرییأن دِه نتأنستیدی او آبَ بوخورید. مصرٚ سرزیمینٚ همه جا خون بو. ۲۲ ولی مصری جادوگرأنم، جادو جنبلٚ اَمرأ هو کارَ بوکودیدی و فرعونٚ دیل سختَ بوسته و هوطو کی خوداوند بوگفتهبو، اوشأنٚ گبأنَ گوش نوکوده. ۲۳ فرعون وأگردسته بوشو خو قصر بدونٚ اَنکی حتی اَ ایتفاقأنَ محل بنه. ۲۴ تومامٚ مصرییأن نیلٚ روخانٚ کنار مشغولٚ چاه کندن بوبوستیدی چونکی دِه نتأنستیدی روخانٚ آبٚ جأ بوخورید. ۲۵ جٚه وختی کی خوداوند روخانَ بزه، هفت روز بوگوذشته.
Currently Selected:
خروج ۷: گیلکی (رشتی)
Highlight
Share
Copy

Want to have your highlights saved across all your devices? Sign up or sign in
© 2010-2019 Gilak Media