اعمالٚ رسولأن ۱۵
۱۵
اورشلیمٚ شورا
۱ چند نفر یهودیه جأ بموییدی اَنطاکیه شهرٚ میأنی و ایماندارأنَ تعلیمٚ غلط دَییدی کی: «اگه به موسی سنت ختنه نیبید، نتأنیدی نجاتَ دریافت بوکونید.» ۲ وختی پولُس و برنابا اوشأنٚ اَمرأ به مخالفت ویریشتیدی، قرار بر اَن بوبوسته کی پولُس و برنابا چند نفر جٚه ایماندارأنٚ اَمرأ بیشید اورشلیم و خوشأنٚ اختلافَ، رسولأن و مشایخٚ اَمرأ در میأن بنید. ۳ بأزین کلیسا اعضا، اوشأنَ بدرقه بوکودیدی و هَطویی کی به طرفٚ اورشلیم جٚه رایٚ فینیقیه و سامره بوشوییدی، خبرٚ ایمأن اَوردنٚ غیریهودیأنَ بوگفتیدی و تومامٚ ایماندارأن خوشحالَ بوستیدی.
۴ وختی پولُس و برنابا فأرسه‌ییدی اورشلیم، ایماندارأن و رسولأن و مشایخ بموییدی اوشأنٚ پیشواز و پولُس و برنابا هرچی‌یَ کی خودا اوشأنٚ دسٚ جأ انجام بده‌بو، اَشأنٚ‌ره بوگفتیدی. ۵ چند نفر جٚه فرقه‌یٚ فریسیأن کی ایمأن بأورده‌بید، ویریشتیدی، بوگفتیدی: «غیریهودیأنی کی مسیحی بوبوستیدی لازمه کی ختنه بیبید و اوشأنَ دستور بدیم کی موسی شریعتَ بجا بأورید.»
۶ پس رسولأن و مشایخ دورٚ هم جمَ بوستیدی تا اَ مسئله‌یَ رسیدگی بوکونید. ۷ آخرٚ سر بعدٚ گبأنٚ زیادی، پطرس ویریشته و اوشأنَ بوگفته: «اَی برأرأن، شومأن دأنیدی کی پیشتر، خودا مرَ جٚه شیمی میأن اینتخاب بوکوده تا غیریهودیأن می جأ خبرٚ خوشٚ انجیلَ بیشنَوید و ایمأن بأورید. ۸ خودا کی جٚه هر کسٚ قلب وأخبرَ، روح‌القدسَ هَطو کی اَمرَ ببخشه، به غیریهودیأنم فدَه تا ثابت بوکونه کی اوشأنم اَمی مأنستن قوبیل کونه. ۹ اون اَمی میأن و اوشأنٚ میأن هیچ فرقی ننَه. هَطو کی ایمأنٚ اَمرأ، اَمی دیلَ پاکَ کوده، اوشأنٚ دیلم پاک بوکوده. ۱۰ هسأ چره خوأییدی خودا صبرَ آزمایش بوکونید و باری‌یَ کی نه اَمأن و نه اَمی پئرأن، تحملٚ اونَ نأشتیم، به دوشٚ ایماندارأنٚ غیریهودی بنید؟ ۱۱ همه‌تأنٚ اَمأن ایمأن دأریم کی مجانی فیضٚ خوداوند عیسی مسیحٚ اَمرأ نجات پیدا بوکودیم و غیریهودیأنم هَطویی.»
۱۲ همه‌تأن ساکیتَ بوستیدی و به اونچی کی برنابا و پولُس گفتن دیبید گوش دَییدی، کی چوطو خودا نیشأنه‌یأن و معجزاتی‌یَ اوشأنٚ دسٚ جأ غیریهودیأنٚ‌ره آشکارَ کوده‌بو. ۱۳ ولی وختی اوشأنٚ گبأن تومامَ بوسته، یعقوب کی اورشلیمٚ کلیسا رهبر بو، وأگردسته بوگفته: «اَی برأرأن، گوش بدید! ۱۴ شمعونٚ پطرس، اَمرَ بوگفته کی چوطو خودا پیشتر، غیریهودیأنَ رحمت بوکوده کی جٚه اوشأنٚ میأنی خو قومَ اینتخاب بوکونه. ۱۵ اَ گبأن، پیغمبرأنٚ گبأنٚ اَمرأ برابری کونه، هوطو کی عاموسٚ نبی کیتابٚ دورونی بینیویشته بوبوسته:
۱۶ «‹خودا بفرمأسته: «بعدٚ اون وأگردم
و داوودٚ سلطنتَ کی جٚه بین بوشو، دوواره بر پا کونم
و اونٚ خرابه‌یأنَ آبادَ کونم
۱۷ تا بقیه‌یٚ کسأنی کی زیمینٚ رو زندگی کونیدی،
ینی تومامی‌یٚ غیریهودیأن کی می نام اوشأنٚ رو نهَه،
همه‌تأن خوداوندَ طلب بوکونید.»#۱۵:۱۷ عاموسٚ نبی کیتاب بابٚ ۹، آیه ۱۱ و ۱۲
«‹هَن چیزأنی ایسه کی خوداوند فرمأیه، ۱۸ خوداوندی کی او کارأنی کی جٚه قبلنأن آشکارَ بوسته‌بو، به انجام برسأنه.›
۱۹ «پس من یعقوب، می عقیده اَنه کی نوأستی غیریهودیأنَ کی خودا طرف اَییدی اصرار بوکونیم کی حتماً یهودیأنٚ تومامٚ قانونأنَ رعایت بوکونید، ۲۰ بلکی غیریهودیأنٚ‌ره بینیویسیم کی جٚه خوردنٚ قوربانی‌یٚ بُتأن، بی‌عفتی آدمأن، حیواناتی کی خفَه بوستیدی و خون، دوری بوکونید. ۲۱ چونکی موسی شریعت جٚه قدیمٚ ایام و تا هسأ هر شهرٚ دورونی موعظه بوستی و اونٚ کیتابٚ تورات شَبّاتٚ روزأنٚ دورونی کنیسه‌یأنٚ میأنی بخوأنده بوستی و هَطویم ایدامه دأره.»
شورا نامه به غیریهودیأنی کی ایماندار بید
۲۲ بأزین رسولأن و مشایخ، تومامٚ کلیسا اعضا اَمرأ تصمیم بیگیفتیدی کی جٚه خوشأنٚ میأن مردأکأنی‌یَ اینتخاب بوکونید کی پولُس و برنابا اَمرأ اوسه کونید اَنطاکیه. سیلاس و یهودایَ کی بَرسابا نام دأشتی اینتخاب بوکودیدی کی ایماندارأنٚ میأنی رهبر بید. ۲۳ پس ایتأ نامه اورشلیمٚ شورا رِه بینیویشتیدی و فدَه‌ییدی پولُس و اونٚ همراهأنٚ دس کی متنٚ نامه اَطویی بو:
«جٚه اَمأن رسولأن و مشایخ، شیمی برأرأن، به برأرأنٚ ایماندارٚ غیریهودی‌یٚ اَنطاکیه، سوریه و کیلیکیه، سلام! ۲۴ بیشتأوستیم کسأنی جٚه اَمی میأن بدونٚ اَن کی دستوری جٚه اَمأن بدأرید، بموییدی خوشأنٚ غلطٚ گبأنٚ اَمرأ شمرَ دیل‌نیگران و پریشأن خأطر بوکودیدی. ۲۵ هَنٚ وأسی اَمأن یکدیلی اَمرأ یهودا و سیلاسَ اینتخاب بوکودیم و اوشأنَ اَمی عزیزأن، برنابا و پولُسٚ اَمرأ شیمی ورجأ اوسه کودیم، ۲۶ پولُس و برنابا کی خوداوند مسیحٚ نامٚ وأسی، جٚه خوشأنٚ جانَ بوگوذشتیدی. ۲۷ پس یهودا و سیلاسَ اوسه کودیم کی شمرَ خوشأنٚ گبأنٚ اَمرأ آگاه بوکونید. ۲۸ روح‌القدسٚ کومکٚ اَمرأ، اَمأن اَطو مصلحت بیده‌ییم کی شیمی دوشٚ سر، باری ننیم جز چیزأنی کی شومأن وأ دوری بوکونید: ۲۹ جٚه خوردنٚ قوربانی‌یٚ بت‌پرستأن و خون و گوشتٚ حیواناتی کی خفَه بوستیدی و بی‌عفتی‌یٚ آدمأن. اگه اَ کارأنَ نوکونید، کارٚ پسندیده بوکودیدی. خودا همه‌تأنٚ شمرَ بدأره.»
۳۰ پس اوشأن رأ دکفتیدی، بوشوییدی به اَنطاکیه. اویه کلیسا اعضایَ دورٚ هم جمَ کودید و نامه‌یَ فدَه‌ییدی اوشأنٚ دس. ۳۱ کلیسا اعضا، نامه‌یٚ دیلگرم‌کوننده‌یَ بخوأندیدی و اَشأنٚ دیلأن شادَ بوسته. ۳۲ یهودا و سیلاسم کی جٚه روح‌القدس عطایٚ نبوّت دأشتیدی، گبأنٚ زیادٚ اَمرأ، ایماندارأنَ تشویق و تقویت بوکودیدی. ۳۳ پس ایتأ مدت اَنطاکیه بِیسَه‌ییدی و بعدٚ اون ایماندارأنٚ اَنطاکیه، اوشأنَ به سلامتی اوسه کودیدی کی وأگردید بیشید اورشلیمٚ ایماندارأنٚ ورجأ، کسأنی کی اوشأنَ مأموریت فدَه بید. ۳۴ ولی پولُس و برنابا اَنطاکیه میأن بِیسَه‌ییدی ۳۵ و اَنطاکیه ایماندارأنٚ اَمرأ به تعلیم و بشارتٚ خوداوندٚ کلام مشغولَ بوستیدی.
پولُس و برنابا میأن اختلاف دکفته
۳۶ مدت زمأتی کی اَنطاکیه میأن بِیسَه‌ییدی پولُس، برنابا‌یَ بوگفته: «وأگردیم بیشیم به شهرأنی کی اویه خوداوندٚ کلامَ موعظه بوکودیم، دیداری ایماندارأنٚ اَمرأ بدأریم و بیدینیم اوشأن چی کودن دریدی.» ۳۷ برنابا خوأستی یوحنایَ کی مَرقُس نام دأشتی، خوشأنٚ اَمرأ ببره. ۳۸ ولی پولُس مخالفت بوکوده، بوگفته: «کسی‌یَ کی پامفیلیه میأن اَمی اَمرأ همکاری نوکوده و اَمرَ تنها بنَه، صلاح نی‌یه کی اَمی اَمرأ ببریم.» ۳۹ اختلافٚ سختی اوشأنٚ میأن دکفته، کی جٚه یکدیگر سیوأ بوبوستیدی. برنابا، مَرقُسَ اوسأده و جٚه رایٚ دریا بوشو قبرس؛ ۴۰ ولی پولُس، سیلاسَ اینتخاب بوکوده و ایماندارأن، اوشأنٚ رِه دوعا بوکودیدی و به خوداوندٚ فیض بیسپردیدی. او وخت رأ دکفتید بوشویید سوریه و کیلیکیه، کی جزٚ اوستانأنٚ روم بید. ۴۱ وختی کی جٚه او اوستانأن بوگوذشتیدی، کلیسا ایماندارأنَ خوشأنٚ گبأنٚ اَمرأ قوّتٚ قلب فدَه‌ییدی.
Currently Selected:
اعمالٚ رسولأن ۱۵: گیلکی (رشتی)
Highlight
Share
Copy
Want to have your highlights saved across all your devices? Sign up or sign in
© 2010-2019 Gilak Media
