اعمالٚ رسولأن ۱۴
۱۴
پولُس و برنابا قونیه شهرٚ میأن
۱ قونیه میأنم پولُس و برنابا به کنیسه‌یٚ یهودیأن بوشوییدی و ایجور جٚه خودا کلام گب زه‌ییدی کی مردومأنٚ زیادی جٚه یهودیأن و غیریهودیأن ایمأن بأوردیدی. ۲ ولی یهودیأنی کی ایمأن نأورده‌بید، غیریهودیأنَ تحریک کودیدی و اوشأنٚ فیکرَ بر ضدٚ ایماندارأن خرابَ کودیدی. ۳ پس پولُس و برنابا زمانٚ زیادی‌یَ اویه بِیسَه‌ییدی و شجاعتٚ اَمرأ در موردٚ خوداوند عیسی مسیح گب زه‌ییدی. خوداوندم اوشأنَ قوّتٚ انجامٚ آیات و معجزات فدَیی و خو کلامٚ فیضَ تأیید کودی. ۴ او شهرٚ مردومم دو دسته بوبوستیدی؛ ایتأ دسته جٚه یهودیأن طرفداری کودیدی، ایتأ دسته‌یم رسولأنٚ طرفدار بید. ۵ وختی یهودیأن و غیریهودیأن، خوشأنٚ قومٚ پیله‌دأنه آدمأنٚ اَمرأ همدس بوبوستیدی کی پولُس و برنابایَ اذیت و آزار و سنگسار بوکونید، ۶ اوشأن وأخبرَ بوستیدی، به لیکائونیه شهرأن، ینی لِستْره و دِربِه و اونٚ اطراف، فرار بوکودیدی ۷ و اویه خودا کلامَ بشارت دَیید.
پولُس و برنابا لِستْره و دِربِه شهرأنٚ میأن
۸ لِستْره میأن ایتأ مردای شَلٚ مادرزاد نیشته‌بو کی نتأنستی خو پایأنَ تکان بده و هرگز رأ نوشو بو. ۹ وختی کی پولُس جٚه خودا کلام گفتن دوبو، اون پولُسٚ گبأنَ خُب گوش دَیی. پولُس کی بیده اونٚ گبأنَ دقتٚ اَمرأ گوش دَئن دره، بفهمسته کی اون ایمأن دأره کی تأنه شفا پیدا بوکونه. ۱۰ پس صدایَ بولندٚ اَمرأ اونَ بوگفته: «ویریز تی پایأنٚ سر به پا بِیس!» اون هو موقع جٚه خو جا سر ویریشته، به رأ دکفته.
۱۱ وختی مردوم، اونچی‌یَ کی پولُس انجام بده‌بو بیده‌ییدی، به خوشأنٚ زبانٚ لیکائونی فریاد بزه‌ییدی: «خودایأن اینسأنٚ مأنستن بوبوستیدی، اَمی وأسی بیجیر بموییدی!» ۱۲ اوشأن برنابایَ «زئوس»، رئیسٚ خوشأنٚ خودایأن، دأنستیدی و پولُسم کی بهتر تأنستی گب بزنه، «هِرمِس» کی اوشأنٚ سخنگوی خودایأن بو. ۱۳ کاهنٚ زئوس کی اونٚ معبد بیرونٚ شهرٚ دروازه نهَه‌بو، چن‌تأ نرٚ گاب و چن‌تأ تاجٚ گل مردومٚ اَمرأ بأوردیدی شهرٚ دروازه دورونی تا پولُس و برنابا رِه قوربانی بوکونید چونکی اوشأنَ خوشأنٚ خودا دأنستیدی.
۱۴ وختی برنابا و پولُس بیشتأوستیدی، خوشأنٚ لیباسأنَ چاک بزه‌ییدی، بودُوٚستیدی مردومٚ میأن و فریاد بزه‌ییدی، بوگفتیدی: ۱۵ «اَی مردومأن، چره اَ کارَ کونیدی؟ اَمأنم شیمی مأنستن انسانیم و شمرَ بشارت دَئن دریم کی جٚه اَ بُتأنٚ پوچ دس بکشید و به خودایٚ زنده رو بأورید کی آسمان و زیمین و دریا و هر اونچی کی اوشأنٚ میأن نهَه خلق بوکوده. ۱۶ خودا در گوذشته ایجازه بده کی تومامٚ قومأنٚ غیریهودی هر کدام خوشأنٚ رایَ بیشید. ۱۷ خودا خو خُرُم کارأنٚ مره خو وجودَ همیشه ثابت بوکوده و خو رحمتٚ اَمرأ آسمانٚ جأ شمرَ واران، فصلأنٚ پور محصول و خوراکٚ فراوان فده و شیمی دیلأنَ شادی مره پورَ کونه.» ۱۸ آخرٚ سر اَ گبأنٚ اَمرأ، مردومَ به زحمت آرامَ کودیدی کی اوشأنٚ رِه قوربانی نوکونید.
۱۹ ولی بعدٚ اون، یهودیأنی جٚه اَنطاکیه و قونیه بموییدی، مردومَ خوشأنٚ اَمرأ همدس بوکودیدی و پولُسَ سنگسار بوکودید. چون خیال بوکودیدی کی بمرده، اونَ فأکشه‌ییدی، ببردیدی بیرون تأودَه‌ییدی. ۲۰ امّا وختی ایماندارأن اونٚ دور جمَ بوستیدی، ویریشته و به شهر وأگردسته. فردایٚ او روز، اون و برنابا به شهرٚ دِربِه بوشوییدی.
پولُس و برنابا وأگردستن به اَنطاکیه‌یٚ سوریه
۲۱ اوشأن دِربِه شهرٚ میأنم بشارت بدَه‌ییدی و خیلی‌یأنَ اویه ایماندار چأکودیدی. جٚه اویه وأگردستیدی، بوشوییدی لِستْره و قونیه و اَنطاکیه. ۲۲ او شهرأنٚ میأن ایماندارأنَ تقویت و تشویق بوکودیدی کی خوشأنٚ ایمأنٚ دورون قایم بِیسید و اوشأنَ نصیحت بوکودیدی کی «اَمأن سختی‌یٚ زیادی‌یَ وأ پوشتٚ سر بَنیم تا به خودا پادشایی فأرسیم.» ۲۳ اوشأن، هر کلیسا میأن، مشایخی ایماندارأنٚ رِه اینتخاب بوکودیدی و دوعا و روزه اَمرأ اوشأنَ به خوداوند عیسی کی به اون ایمأن بأورده بید بیسپردیدی. ۲۴ بأزین جٚه پیسیدیه سرزیمین دوأرستیدی، فأرسه‌ییدی پامفیلیه. ۲۵ وختی شهرٚ پِرجه میأن خودا کلامَ موعظه بوکودید، جٚه اویه به شهرٚ بندری‌یٚ آتّالیه بموییدی.
۲۶ پولُس و برنابا جٚه شهرٚ آتّالیه کشتی اَمرأ وأگردستیدی بوشوییدی اَنطاکیه‌یٚ سوریه، اَنطاکیه هو شهری بو کی پولُس و برنابا اویه به فیضٚ الهی بیسپرده بوبوسته‌بید، تا خدمتی‌یَ شروع بوکونید کی الأن دِه تومامَ کودیدی. ۲۷ وختی فأرسه‌ییدی اویه، ایماندارأنٚ کلیسا‌یَ دورٚ هم جمَ کودیدی و اوشأنٚ رِه بوگفتیدی کی خودا اوشأنٚ دسٚ جأ چی کارأنی انجام بده و چوطو غیریهودیأنٚ‌ره رایٚ ایمأنَ نیشأن بده ۲۸ و زمانٚ زیادی اویه ایماندارأنٚ اَمرأ بِیسَه‌ییدی.
Currently Selected:
اعمالٚ رسولأن ۱۴: گیلکی (رشتی)
Highlight
Share
Copy
Want to have your highlights saved across all your devices? Sign up or sign in
© 2010-2019 Gilak Media
