JOHANE FAZA 3.
FAZA 3.
I. Hoehoeo Jesoe chõ Nikodemo andrõ. II. Ifoeli ifadoehoeʼõ Jesoe Johane.
1I. Ba so niha, farizaio, Nikodemo dõinia, salaw̃a ba niha Jehoeda. (F. 7, 50. 19, 39). 2Daʼõ zi mõi chõ Jesoe ba zi bongi, imane chõnia: He samahaõ? maʼila, samahaõ si otarai Lowalangi ndraʼoegõ, me samõsa lõ sangila mamazõchi tandra andrõ, nifazõchioe, na lõ itolo ia Lowalangi. (F. 9, 24. 33. Hal. zin. 10, 38. Loek. 20, 21). 3Itema linia Jesoe, imane chõnia: Si ndroehoendroehoe niw̃aʼõgoe chõoe, na lõ toemboe moroi si jaw̃a niha, ba tebai iʼila mbanoea Lowalangi andrõ. (F. 1, 13. Joh. I. 3, 9). 4Imane chõnia Nikodemo: He iwisa toemboe niha, na no atoea ia? Hadia, iʼila ifoeli ia ba daloe ninania, ba ifoeli toemboe? (Kor. II. 5, 17). 5Itema linia Jesoe: Si ndroehoendroehoe niw̃aʼõgoe chõoe, na lõ toemboe moroi ba nidanõ ba moroi ba Geheha niha, ba tebai mõi la ba mbanoea zoroego andrõ. (Hes. 36, 25 b. t. Tit. 3, 5). 6Õsi niha zi toemboe ba nõsi niha, ba eheha zi toemboe chõ Geheha. (Moz. I. 5, 3; 6, 3. Sin. 51, 7). 7Bõi ahõlihõli dõdõoe, me no oew̃aʼõ chõoe, lõ tola lõ toemboe moroi si jaw̃a ami. 8Angi andrõ, ba isaw̃a zomasi ia, ba õrongo hõngõhõngõnia, ba lõ õʼila, heza iʼotarai, ba heza isaw̃a. Si manõ gõi dozi si toemboe chõ Geheha. (Sangomb. 11, 5). 9Itema linia Nikodemo, imane chõnia: He wisa lala daʼõ? (Loek. 1, 34. 35). 10Itema linia Jesoe, imane chõnia: Samahaõ Iraono Gizeraëli ndraʼoegõ, ba lõ aboto ba dõdõoe daʼõ? (Moz. V. 30, 6. Sin. 51, 12. Hes. 11, 19). 11Si ndroehoendroehoe niw̃aʼõgoe chõoe, saboto ba dõdõma maw̃aʼõ, ba niʼila hõrõma mafadoehoeʼõ, ba lõ mirema wamadoehoeʼõma. 12Na lõ mamati ami, na oew̃aʼõ chõmi zi so ba goeli danõ, ba he miwisa wamati, na oew̃aʼõ chõmi zi so ba zoroego? 13Ba lõ si mõi jaw̃a ba zoroego, baero zi no mõi tooe, si otarai zoroego, Ono Niha andrõ, si so ba zoroego. (F. 6, 38. 62. Efes. 4, 9 b. t.). 14Ba hoelõ goelõ andrõ, nitoewoe Moze jaw̃a, ba danõ si mate, si manõ gõi teʼalaw̃aʼõ jaw̃a dania Nono Niha, lõ tola lõʼõ, (Moz. IV. 21, 8. 9. F. 12, 32. 33), 15enaʼõ so waʼaoeri si lõ aetoe ba zamati chõnia fefoe. (Mar. 16, 16. Rom. 3, 25). 16Si manõ sa waʼomasi Lowalangi nõsi goeli danõ, no ibeʼe Nononia andrõ, si ha samboea, enaʼõ lõ tekikõ dozi samati chõnia, enaʼõ so chõra waʼaoeri si lõ aetoe. (Joh. I. 4, 9. Rom. 8, 32). 17Tenga sa ba wangoehoekoe õsi goeli danõ ifatenge ba goeli danõ Nononia Lowalangi, afoeʼafoenia teʼorifi chõnia nõsi goeli danõ. (F. 12, 47. Loek. 9, 56. Mat. 18, 11). 18Samati chõnia ba lõ lahoekoe, ba si no moehoekoe zi lõ mamati, me lõ mamati ia ba dõi Nono Lowalangi andrõ, si ha samboea. (F. 5, 24. Tes. II. 2, 12). 19Daʼõ wangoehoekoe; no mõi ba goeli danõ haga andrõ, ba no omasi niha daʼogõmigõmi, moroi ba haga, me si lõ sõchi mboeaboeara. (F. 1, 4 b. t.). 20Dozi lõ omasi haga zamazõchi si lõ sõchi, ba lõ laʼondrasi haga, fa lõ teʼotoeʼõ ira ba nifazõchira andrõ. (Efes. 5, 13. Job. 24, 13—16). 21Ba iʼondrasi haga samazõchi si doehoe, enaʼõ oroma mboeaboeania, me nilaoe ba chõ Lowalangi. (Mat. 5, 16).
22II. Aefa daʼõ, ba mõi ba danõ Joedaia Jesoe, awõ nifahaõnia, ba daʼõ so ia, ba soso ira chõnia, ba mamajagõ idanõ ia. (F. 4, 1. 2). 23Ba Johane gõi, mamajagõ idanõ gõi, ba Gaino, ba zi tambai Zalima, me eboea nidanõ ba daʼõ, ba mõi ba daʼõ niha lafabajagõʼõ idanõ ira. 24Lõʼõ na sa moebeʼe ba goeroenga Johane. (Mat. 14, 3). 25Ba fagoeagoea ira, nifahaõ Johane niha Jehoeda, ba wangehao andrõ. 26Ba mõi ira chõ Johane, ba lamane chõnia: He samahaõ! faigi daʼõ, mamajagõ idanõ daʼõ no, si no mõi chõoe, jefo Joridano, nifadoehoeʼõmõ, ba dozi niha zangondrasi jaʼia. (F. 1, 25—34. Mat. 3, 11. 13 b. t.). 27Itema lira Johane, imane: Tebai ihalõ chõnia hadia ia niha, na tenga nibeʼe chõnia moroi ba zoroego. (Kor. I. 4, 7). 28Jaʼami zi so ba mbõrõ chõgoe, wa no oew̃aʼõ: Tenga Keriso andrõ ndraʼo, nifatenge ndraʼo fõnania. (F. 1, 20. 30). 29Ha õchõ so nono nihalõ, daʼõ zangowaloe, ba omoeso sibai dõdõ zi fahoewoe chõ zangowaloe andrõ, si so ba daʼõ ba wamondrondrongo chõnia, na irongo li zangowaloe; ba na aʼoi so waʼomoeso dõdõ andrõ chõgoe. (Mat. 9, 15). 30Lõ tola lõ manõi ia, ba lõ tõla lõ awoewoe ndraʼo. 31No fõna dánõ bõʼõ fefoe zi otarai si jaw̃a. Moroi ba goeli danõ, zi otarai goeli danõ, ba moroi ba goeli danõ hedehedenia. Ba si otarai zoroego, (F. 3, 23. Kor. I. 15, 47), 32ba niʼila hõrõnia, awõ nirongonia, ifadoehoeʼõ, ba lõ samati famadoehoeʼõnia. (F. 3, 11; 1, 11). 33Samati famadoehoeʼõnia, ba iʼaʼaroʼõ, wa no si ndroehoe Lowalangi. (Joh. I. 5, 10). 34Li Lowalangi wedehe nifatenge Lowalangi, me no tenga nisoeʼa Geheha, nibeʼe Lowalangi. (Sin. 45, 8. Kol. 1, 19). 35Iʼomasiʼõ Nono Ama, ba no ahori ibeʼe ba dangania fefoe hadia ia. (F. 5, 22; 13, 3. Mat. 11, 27). 36Chõ zamati chõ Nono andrõ so waʼaoeri si lõ aetoe; lõ iʼila dania waʼaoeri si lõ mamati chõ Nono andrõ, lõ teboelõ wõnoe Lowalangi chõnia. (Joh. I. 5, 12).
Currently Selected:
JOHANE FAZA 3.: NIA
Highlight
Share
Copy
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.