SOERA GESITERA FAZA 2.
FAZA 2.
I. Laʼohe chõ razo Gesitera andrõ, Iraono Gizeraëli. II. Ihalõ ia razo. III. Iʼombachaʼõ Morodochai zamoenoe razo enaʼõ.
1I. Ba me no aefa daʼõ, me no alõ wõnoe razo Ahasiwero, ba itõrõ tõdõnia Wasi, awõ wolaoenia andrõ, awõ nihonogõi mege, ba chõnia andrõ. 2Ba lamane ono matoea andrõ chõ razo, ngoningoninia: Acha laʼaloei chõ razo nono alawe sawoejoewoejoe ba si sõchi, 3jamoefataro zamaigi razo, jamoedozigõ õri ba gamatõrõw̃ania, sangówoeloi ono alawe sawoejoewoejoe ba si sõchi, fefoe, ba wolohe ba gõdo, ba Zoesa, ba nomo ndra alawe andrõ, barõ Mbawa Hegaʼi samaigimaigi ira alawe, ba ndra moefatõrõ wangehao andrõ; 4ba heza dania zomasi razo, ono alawe, ba ja daʼõ woʼomo razo, fangali Wasi. Ba omasi razo niw̃aʼõra, ba iʼoʼõ daʼõ. 5Ba no so ba gõdo, ba Zoesa niha Jehoeda, Morodochai dõi, ono Jaʼiro ono Zimeʼi ono Gisi, mado Mbenijami, niʼoloiʼõ no, 6moroi ba Jeroezalema, awõ niʼoloiʼõ andrõ, si fao chõ Jechonia, razo mado Joeda, niʼoloiʼõ Neboekanesa, razo Mbabeli. (Raz. II. 24, 14). 7Ba Morodochai andrõ, ba sangeʼeboea Hadasa — Esitera —, ono dána namania, me no si lõ ama ba si lõ ina Hadasa andrõ. Ba no si sõchi sibai boto nono alawe andrõ, ba si sõchi sibai bawa; ba me mate ndra amania inania mege, ba isooe ia ononia Morodochai. 8Ba me no terongo niw̃aʼõ razo, oroisania andrõ, me laʼojaʼõ wolohe ba gõdo, ba Zoesa, barõ mbawa Hegaʼi, ono alawe, ba laʼohe gõi Gesitera ba gõdo razo, barõ mbawa Hegaʼi, samaigimaigi ira alawe. 9Ba omasi ia nono alawe andrõ, eboea dõdõnia chõnia; ba iʼaliogõ wamaigi fangebao andrõ chõnia, ibeʼe dána chõnia andrõ, ba ifaʼaso chõnia ngoningoninia andrõ, nitehe chõnia, si dafitoe, ono alawe, moroi ba gõdo razo, ba ibeʼe nahiania ba he nahia ngoningoninia andrõ wondrege zi sõchi mbateʼe ba nomo ndra alawe. 10Ba lõ niʼombachaʼõ Gesitera ha mado ia ba ha niha niwara; noa sa iw̃aʼõ chõnia Morodochai, bõi jamoeʼombachaʼõ.
11II. Ba ero maʼṍchõ manõrõnõrõ Morodochai fõnafõna golajama nomo ndra alawe, ba wamaigimaigi na lõ hadia ia chõ Gesitera, ba heza laʼohe ia. 12Ba ero na iroegi inõtõ, ba mõi jomo chõ razo Ahasiwero nono alawe, samõsa, na no iroegi zi 12 waw̃a andrõ, ba nifatõrõ chõnia nihonogõi ba ndra alawe andrõ, — si manõ sa waʼara wangehao andrõ chõra: õnõ waw̃a lagoeleʼõ wanicha emoeri, ba õnõ waw̃a gõi zamohoea bõʼõ, ba hadia ia na wangehao ndra alawe —: 13ba na mõi jomo chõ razo nono alawe, samõsa, ba lõ tola lõ labeʼe chõnia fefoe hadia ia zomasi ia, enaʼõ iʼohe ba gõdo razo, na iʼotarai nomo ndra alawe andrõ. 14Na bongi mõi ia jomo [chõ razo], ba na moloeo, ba ifoeli ia, ba ba nomo ndra alawe si samboea mõi ia ba daʼõ, barõ mbawa Zaʼasagasa, enoni jomo chõ razo, samaigimaigi dongania ba dõi; ba lõ tola saʼae mõi ia chõ razo, ha na no omasi razo ia, ba na ifakaoniʼõ. 15Ba me no iroegi inõtõ chõ Gesitera, ono Gabihailo, tána nama Morodochai andrõ, si no manooe jaʼia ononia, me no iroegi inõtõ chõnia, ba mõi ia jomo chõ razo, ba lõ hadia ia iʼandrõ, ha niw̃aʼõ Hegaʼi andrõ, enoni jomo chõ razo, samaigimaigi ira alawe. Ba laʼomasiʼõ Gesitera dozi sangila jaʼia. 16Ba lahalõ jomo chõ razo Ahasiwero, ba gõdo razo chõnia, Gesitera, ba mbaw̃a si foeloe — baw̃a Tebeti —, me no aloea meõnõ fache razo ia. 17Ba omasi razo Gesitera, moroi ba waʼomasinia ndra alawe bõʼõ fefoe, ba eboea dõdõnia chõnia, moroi ba waʼeboea dõdõnia ba nono alawe bõʼõ fefoe. Ba ibeʼe ba hõgõnia mbala hõgõ woʼomo razo ba ibaliʼõ foʼomo razo, fangali Wasi. 18Ba ilaoe walõw̃a seboea razo, ikaoni nawõnia salaw̃a ba enoninia, fefoe; falõw̃a ba wangai Esitera, ba ba danõ gõi itehe wolombase, ba mameʼe boeala ia, faʼobõwõ razo. 19Ba me lafoeli laʼowoeloi nono alawe, ba no doemadao ba zinga mbawandroehõ chõ razo Morodochai —. 20Ba lõ niʼombachaʼõ Gesitera ha niha niwara ba ha mado ia, no iʼoʼõ niw̃aʼõ Morodochai chõnia, no ifondrondrongo niw̃aʼõ Morodochai, si mane mege, me iraono ia na baomonia.
21III. Me loeo daʼõ, me no doemadao ba zinga mbawandroehõ chõ razo Morodochai, ba tesao waʼafõchõ dõdõ genoni jomo chõ razo, daroea ira, Bigitana ba Teresi, sanaro ba mbawandroehõ, ba laʼaloei wamoenoe razo Ahasiwero. 22Ba irongo daʼõ Morodochai ba iʼombachaʼõ chõ Gesitera, foʼomo razo, ba Esitera zamaʼema chõ razo niw̃aʼõ Morodochai. 23Ba lasechegõ ba larongo, wa tenga faja, ba lataw̃i zi daroea andrõ ba gatoenga. Ba tetanõ ba zoera daʼõ, ba zoera hikaja chõ razo.
Currently Selected:
SOERA GESITERA FAZA 2.: NIA
Highlight
Copy
Compare
Share
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.