San Juan 21
21
Jesuu ich khapeen sieteem khʉʉnag ich oopitarr
1Magtarr khur deeu ũwaai mag thʉrrdo pom sim Tiberias anʉm igaau marag ich oopijim. Mag ich oopitarr mʉg ajim: 2Maar maig naajim: Simón Pedro, Tomás am den i Meís a thʉ̃ʉrjerr, Natanael chi Galilea durr phobordam Caná anʉm eem, Santiago, mʉ, maimua mag tag maar khapeen agjo ich Jesús khapeen numí naajim. 3Mag nʉmta Simón Pedroou maar na, —Mʉ do ʉakhemgui ajim.
Magbaawai marau, —Magan maarjã pʉ dʉi wetjugui ajim.
Mag, chadcha marau ereubaadewi bote ee dojãrr paaukhabaadejim. Pari mag ed chan par ich mag ʉa eetarrjã ni ãbjã thõobajim. 4Mag ʉa eedʉtkhamaa awia ya ãspa õor mor dawaa aadem ee dohieg oowai, Jesuuta do igaau oo dʉnaajim; pari mag oobaawai maraun ich khabampii naajim. 5Mag nʉm ee, maar dohi dakha narr aawai, ich garmuata marag, —Keena, ¿ãwarr thõojierrá? ajim.
Magbaawai marau, —Bʉ̃ʉrjã thõoba nʉm perá anaajim jũrr irig.
6Magbaawaita deeu ich garmua marag, —Magan pãach red pãach juachaar gar dubpʉinaa ʉreujurauma; jãiguin chadau nau pãrau pʉr aujugui ajim.
Magbaawai chadcha i ipierr marau maachig jaautarrjo dubpʉinaa ʉreubaawain chadau par marau eudʉdʉkhamjã pod jiir auba aajeejim, ãwarr pomta thʉnarr aawai. 7Mag nʉm ee ya mʉchdeun khaug wai chirarr aawai Pedroog, —Jã maach Por Jesús khabahab a chirajim.
Ichig magbaawai sĩi khajũa khomariipai jũa sĩerr aawai ag bʉrre ich khajũa wajapha jũapet awi warag do ee dʉrbbaadejim, jopkharraa ichta chi Jesús sim aar baraag awia. 8Chi redjã jua miebaadee pod jiir auba, warag sĩita jap eemuapai eudʉ arrumua ag dʉi do igaau phẽeubaimajim, warpcha khaba do igaaumua maar narr aar cien metrojopai sĩerr aawai. 9Mag do igaau panaa oocheewai ichdeu maar na õt orwia ãwarrta ag ee thʉ wai sĩejim; panjã ĩchab wai sim marau ooimajim. 10Mag maar ich aig paaukhabaimaawai ich garmua marag, —Jũrr pãach den eem agjo ãaur phe aipidut ajim.
11Magbaawai Simonau petwi, deeu jap ee waaidʉbaadewia, chi red ich jãg chi ãwarrpa mosjã ee eudʉ aujim. Ãwarr daphʉmpa ag ee thʉnʉmta ciento cincuenta y tres naajim, chi khapanag. Mag ãwarr pom thʉnarrjã ʉu chi red thʉrreubajim. 12Maimua ya chi ãwarr phaakha athaawai ich dʉi thach khomkhĩir maar ich aig thʉ̃rkha aujim. Pari ya marau i khaug wai narr aawai ãbmuajã irig “¿Pʉ khaíujã?” aba aajeejim. 13Mag maar thʉ̃rkha auwi, pan aunaa, ichdeucha marag jigpʉiwi, chi ãwarrjã ich agjo jigpʉijim. 14Mag mosjã ee maar ich khapeenag ich oopitarr, ich iiu phiidʉtarr khur biek jayapam ajim mag ich oopi sim.
Jesuu Simón Pedroog jaautarr
15Mag thach kho nʉʉ awia ya kho aaipagkhabaadee Simón Pedroogta ich Jesuu, —Simón, Juan iewaa, ¿puata chadcha pʉch khapeen khãaijã ʉ̃rcha mʉ daupii chirʉ́wi? ajim.
Magbaawai Pedroou irig, —Eera Señor, pua khaphʉ simgui ajim, mua pʉch daupii chitʉm.
Magbaawai deeu chi Jesuupai irig, —Magan mʉ iek ʉkha durrum khʉʉnta oveja chaain thʉajemjo wajapha thʉa wai chitá ajim, mag amachdeu mʉ iek ʉkha nʉm gaaita ich mag ubʉ wenʉrramkhĩir.
16Maimua deeu ũwaai irig i thʉ̃rcha thʉ̃rthʉ̃rnaa, —Simón, Juan iewaa, ¿chadchata pua mʉ daupii chirʉ́wi? ajim.
Magbaawai Pedroou irig, —Eera Señor, pua khaphʉ simgui ajim, mua chadcha pʉ daupii chitʉm.
Magbaa deeu irig, —Magan mʉ iek ʉkha nʉm khʉʉnta oveja thʉajemjo wajapha thʉa wai chitá ajim.
17Magnaa deeu ũwaai biek thãrjupamua irig ich ag iekpai phʉʉrba, —Simón, Juan iewaa, ¿chadchata pua mʉ khõsi chirʉ́? ajim.
Mag ich ag iekpai biek thãrjup ichig phʉʉrba jejeeu khabaadeewai Pedro warag ichta okhĩirjuu aademua irig magjim:
—Señor, puata nem thum khaphʉ aajeewai pua khap chirabahab ajim, mua chadcha pʉch khõsi chitʉm.
Magbaawai Jesuu, —Magan mʉ ovejanaandamta chig apiba thʉa wai chitá ajim.
18Magnaa ichdeupai iekhamamua irig magjim:
—Pʉde mʉ iek ũrbarí: Warrgur pua pʉch juadamau pʉch khajũa jũawi pʉch mam khõsimʉg maajeejim. Pari mʉ cha iekha chirʉm iekhau mʉg atag pʉ jooiraa aadeewai pod pʉch juau khajũadamjã jũaba, chikhamnauta pʉ khajũa jũapijugui ajim. Magnaa pʉ juajã amau bʉʉrkha sĩunaa pʉ mamapha khitʉm aar ajués amau pʉ arrjugui ajim.
19Jesuu Pedroog mag iekhatarran, jãga õrau ich gaaimua mag i thõoju jaauwiata mag iekha sim ajim, mag ich gaaimua meebaawai Ẽwandamta õrag tho iekhamkhĩir. Magnaa irig warag, —Mʉ iekta ogdʉba ich jãg ʉkha chitá ajim.
Jesuu ich dʉi naajerr eem ãb ʉ̃rcha daupii aajerr
20Maimua ereubaadewi Pedroou deeu ewag oo nʉʉ aawai ich Jesuu ʉ̃rcha daupii aajerrta am ẽudee urajim. Ich ag wounau ajim i thõoju noram ãbmiecha thach kho naawaijã, ichta igarcha oo sĩerr aawai, irig “¿Khaíuta mag pʉ oomapha aajem khʉʉnag pʉ pʉr deeju agá?” a jeeutarr. Wajapcharan magan mʉchma, mʉchta am ẽudee maa ajim. 21Mag ewag oo nʉʉ awia ich Pedroou mʉ oo athaawai mʉ igwia Jesuug, —Señor, ¿magan Juanjãma? ¿Jã jãga meejuma? ajim.
22Magbaawaita Jesuu irig, —Mua i meepiba deeu mʉch bee nʉm ora ich jãg nʉrrapiju akhiinjã, ¿pua i jãgbarju? ajim. Mag chirabnaa pʉchta khĩirjunaa ich jãg mʉ iek gaaita ubʉ chitá ajim ich Pedroog.
23Pari Jesuu mag iekhatarr igwia hermanonaanau amach eepain mʉ igwia, “Magan mag woun chan meeba ich mag nʉrrajugui” a iekhaajeejim. Pari mʉchdeucha ũurwai chan Jesuu mag mʉ meepiba ich mag chitaju aba, sĩi ar mʉchdeu jaau chirʉmjopaita, “Mua i meepiba deeu mʉch bee nʉm ora ich jãg nʉrrapiju akhiinjã, ¿pua i jãgbarju?” ajim. Magpaita iekhajim.
24Jesuu mʉ igwia mag iekhatarr ich ag wounaupaita mag thumaa cha jaau chirʉm mʉg ẽsap gaai, mʉchjã i dʉi ogdʉba chitʉmua mʉch daúa oojerr aawai. Maagwai tagam khʉʉnaujã khaphʉ nʉm, mua mʉg phã chirʉm nem chadcha arrta jaau chirʉm.
25Mua mʉg ẽsap gaai phã chirʉm atcha Jesuu nem inag pooma waaujeejim. Irua mag nem waaujerr thum ãhãbdo jaaukhiin, libro khapaanata oberkham, makhʉʉn thumaa õrag khakhapdo amkhĩir ĩgkhapʉyaag.
Maga ajim keena. Makhʉʉndamta pãrag khap amkhĩir jaaum ig chirajim.
Juan, ich Jesús dʉicha chitaajerr
Currently Selected:
San Juan 21: noaA
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.