Hechos 1
1
Ẽwandam Akhaar pʉiju Jesuu jaautarr
1Jooi Teófilo, ¿jãgpai chirʉ́? Pʉch khapeer ajapham Lucaauta pʉrʉg mʉg ẽsap phã deepʉi chirʉm.
Nacharam ẽsap phã deepʉitarr gaai mua pʉrʉg jaau chirajim, Jesuu warrcha ich phidkhabaadeewaiwe nem waunaa jaaujerr aigmua khĩeb i ʉ̃gthar matarrpa. 2Mua pʉrʉg jaau chirajim ĩchab, mag ich Jesuu ʉ̃gthar maju nawe, Ẽwandam Akharau ichig jaaupibaawai, jũrr irua ich dʉi ogdʉba wenʉrramkhĩir ichdeucha jʉr autarr khʉʉnag, jãga amau nem wau wenʉrraju a jaau pʉatarr. 3Na mʉchdeu pʉrʉg jaau chirarrjo, makhʉʉn mag ichdeucha jʉr autarr khʉʉnagta õrau i juau thõowi deeu iiu phiidʉtarr khurjã dau daau oberchewi ich oopiejeejim aajem, chadcha ich iiu chirʉm khap amkhĩir. Cuarenta días nʉm ee ich mag ich oopiejeejim aajem. Mag ich oopi simua, jãga Ẽwandamau õor ich denkha auwia ichta am Porkhaajẽ a jaaujeejim aajem amag.
4Mag ichdeu doce jʉr autarr khʉʉnag ich oopipikham jaarta ĩchab amag Jerusalén phobor eemuajã chawag wetpiba jaaumamua amag, —Mua pãrag jaaujeejimgui ajim anʉm, mʉ Ayau pãar athee ich Akhaar pʉiju. Magtarr aawai mʉg phobor eemua chawag wetba, mʉigpai nʉbat ajim anʉm, ichdeu chadcha pãrag ich Akhaar dee nʉm ora. 5Juanaun chadcha dodamaupaita õor por choojeejim, mamʉ mʉgtarr khur pomcha khaba nʉm ee, jũrr Ẽwandamau ich Akhaarta pãrag deejugui ajim anʉm. Mag ich Akhaar deebarmuata, chadcha pãar por choo chaar por choo nʉisijugui ajim aajem Jesuu amag.
Teófilo, maach Por Jesuu mag iekhatarr aawai, chadcha ichdeu iekhatarrjo, jãga mag Ẽwandam Akhaar beejĩ a khap amkhĩirta ĩs mua deeu pʉrʉg mʉg ẽsap phã deepʉi chirʉm. Maimua mag beewi, jãga mag ich Jesuu ichdeucha jʉr autarr khʉʉn ee sĩeichewi, amag nem waupimarrjã agjo mua pʉrʉg jaaupäaigpam.
Jesús ʉ̃gthar matarr
6Maan mʉgta ajim aajem:
Mag amau chi Jesús thõowi deeu iiu phiidʉtarr khur ya ãbmiecha ichdeu jʉr autarr khʉʉn dʉi sĩejim aajem. Mag amach aig sĩerr aawai amach garmuata irig, —Señor, marau khap am ig nʉmgui ajierram anʉm, marag jaaubá. ¿Ĩsta pua chadcha chikhamnaan jua eemua maar peerdʉ auwi pʉchta thumaam khʉʉn Porkhaagpá, maach gobierno chaarcha wai nʉisieg?
7Magbaawai Jesuu amag magjim aajem:
—Ẽwandam ichta thumaam khʉʉn khãai nem jua theeg simua ichdeupaita magʉm nem thum khap aju arr aawai pãrau chan bʉ̃ʉrjã magʉm khap aju aai khaba nʉmgui ajim anʉm, jãagwaita magju, wa khan edta magju khai. 8Mag khãai Ẽwandam Akhaar pãach gaai phẽs sĩeichejuun chad pãrau khaphʉ aju aai nʉmgui ajim anʉm. Mag pãach gaai phẽs sĩeichem ed pãar jua theeg aphobaademua mua nem waaujerr pãach daúacha oonaa mʉ iek pãach jʉ̃gʉucha ũurjerrjã pãrau õrag jaau nʉrrjee aju. Nacha mʉg Jerusalén phobor ee, maigmua Judea durr, Samaria durr, ich mag khĩeb durrpierr jaau wetumua warp durr chaauram magwe pãrau jaau wenʉrrajugui ajim anʉm amag.
9Ya ich Jesús mag iekha obarm ee, sĩi warag ʉ̃gthaa papagmam dʉi jʉʉnthumie baug beewi sĩi ag ee i meer athamjo abaawai ʉu amau i oo wai durrarrjã warag oohba pamamua chukkhu aadejim aajem. 10Mag warag i ʉ̃gthaa papagmam eerpa dʉnʉnʉidʉ nʉm ee, emkhooin numí khajũa bäpphä jũa sĩsidʉmta degolp am aig dʉnʉʉutkhachejim aajem. 11Mag dʉnʉʉutkhachewia amag, —Keena, ¿khanta ʉ̃gthaag jãg eerpa dʉnʉnʉidʉ nʉma? aichejierram anʉm. Jesús ya ʉ̃gthar petabahab. Mamʉ ar jãg pãrau i mam oo naabá; ich jãg pãachdeu oo nʉmjo ũmaai deeu i beebajupa ajierram anʉm amag, mag chi khajũa bäpphä jũa sĩsid arr khʉʉnau.
Judas jũrr Matías anʉm jʉr autarr
12Mag amach dʉi ãba sĩewia petam oobaawai, durrdam Olivo Durrsĩ anʉm gaai naawi ich aigpaimua Jerusalenag wetjim aajem. Mag durrsĩ Jerusalenmua warpcha khaba, peer kilómetro ãbpaím sim aajem. 13Mag wetwia phobor ee paaukhabaimaawai ʉ̃gthaa amach jẽerjem aar ãba biirdʉ nʉisijim aajem. Maig naajim aajem: Pedro, Santiago, Juan, Andrés, Felipe, Tomás, Bartolomé, Mateo, Santiago jooi Alfeo iewaa, Simón ibʉʉr wauwia Celote a thʉ̃ʉrjem, maimua Judas, woun ãb deeum agjo Santiago anʉm dʉi ãbam khʉʉn. 14Makhʉʉn amach thum ich mag biirdʉajeejim aajem Jesús eeugpeen dʉi, ich Jesús ãd María maimua dewam ʉʉinpa, ãba mag biirdʉnaa Ẽwandamag jewaag. 15Ich mag Ẽwandamag jewaag am ãba biirdʉdʉkham ed gaai, biek ãb Pedroou tagam khʉʉn agjo Jesús iek ʉkha nʉm khʉʉn khapan ciento veinte nʉm jãrr dʉnʉʉunaa, 16—Keena ajim anʉm, Jesús gaaimua khodamnaan. Mua pãrag jaaukhimgui ajim anʉm. Jãg maach Por Jesús imeraa perpʉitarran ichiita ich jãgju aai sĩejim, warrgarwe rey David khararrau Ẽwandam Akharau ichig jaaubaawai ich mag phã pʉarrjo. Chadcha magtarr aawaita õrau maach Por Jesús pʉr awaan beewaijã maach khapeer Judas khararrta chi porkha nʉrrajimgui ajim anʉm. 17Iin maach eem maach dʉi ãba phidkhaajeejimgui ajim anʉm. 18Magtarrta ich dau lokoo mag Jesús pertarr paar ichig phagtarr phatkhonau jẽb per auwia, mam mawia, ichdeupai ich o jorrkaawi, porou burrwi, bi jurrphe sĩi jʉhãutarrjo apʉijimgui ajim aajem. 19Mag ichdeupai wir aig ich thõowia magbarm Jerusalenpienau thum ũrphobaadeewai mag durr ichdeu per autarr aig “Acéldama” a thʉ̃rjierramgui ajim aajem. Mag am meúa Acéldama aawai maach meúan jũrr “õor thõotarr param jẽb” a simʉu. 20Judaau magju khaphʉta warrgarwe rey David khararrau Salmos anʉm phã sĩewai i igwia magjim:
“I di atarr di õor parii iseg pʉaju, ag ee joobaju khʉʉn chukhu.” (Sal. 69:25)
Maimua ich ag ẽsap gaai ich Davidaupai ĩchab,
“Deeumua jũrr i phidkhaajerr phidag phidkhaju aai simgui” a phã pʉajim. (Sal. 109:8)
21’Magua mua mag chirʉmgui ajim anʉm ich Pedrooupai. David khararrau jaautarrjo chadcha amkhĩir, mʉig maach ee õor nʉm eem ãb maach daumaai jʉr aujugui ajim anʉm, ich daúa Jesús iiu phiidʉtarr ootarr aawai maach ipierr jaaumkhĩir. 22Mag maadeu jʉr aujuun, ĩchab maachjo Jesús dʉi ogdʉba wenʉrranaa ĩchab warrcha Juan õor por choomieu Jesús por chootarr aigmua ewag pawiajã khĩeb ich Jesús ʉ̃gthar ma nʉm ed gaai ich mag maach dʉi ogdʉba wenʉrraajerr khʉʉn eemta jʉr auju aai nʉmgui ajim aajem.
23Pedroou mag iekhabaawai, aig narr khʉʉnau õor numí thʉ̃r aujierram aajem: Ãb José anʉm, ich ag wounpai Barsabás a thʉ̃rnaa ĩchab ibʉʉr wauwia Justo a thʉ̃ʉrjem; maagwai ãbakhai Matías ajim aajem. 24Mag numí jʉr auwia Ẽwandamag jeeumamua magjierram aajem:
“Ẽwandam, pʉchdeuta chadcha õor thumaam khʉʉn thãar khaphʉ chitaawai, marau pʉrʉg jeeu nʉm, marag jaaubá” ajierram anʉm, “mʉg numí nʉm aig chijãata pʉchdeu ig chirʉm agá. 25Ya Judajã ichdeu khaigba arr gaaimua wir aig ich thõobaawai i jũrr pʉch i jaau nʉm phidag maar dʉi ãba phidkhamkhĩir marau deeum ig nʉmgui” ajim anʉm, “maach daumaai.”
26Mag Ẽwandamag jeeu durrawia mokpor gaai am thʉ̃r numwe phãkhanaa jẽkhʉt barbapäaiwai, chi Matías thʉ̃r phã simta ʉ̃gthaag jẽer kherbaimajim aajem. Magtarr aigmua atag Matías warm khʉʉn once narr dʉi ãba phidkha sĩsijim aajem, Ẽwandam i jaau nʉm phidag gaai.
Currently Selected:
Hechos 1: noaA
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.