Hechos 2
2
Ẽwandam Akhaar beetarr
1Maimua nemkho dichtarr khur cincuenta días nʉm ee, judionaan phiesta Pentecostés anʉm burrjim aajem. Ich mag edcha thum chi ʉkha durrum khʉʉn ãbam aig podpa thʉnaajim aajem. 2Mag am ãba podpa nʉmta, degolp edjã eemua jẽbʉ phũ theeg urum iekjo jug urum ũr athajierram anʉm. Mag jug beewi am nʉm di gaaita sĩi wʉbaichemjo ajim anaabá. 3Magbarm abarmʉn meukhĩirjo sĩsidʉmta sĩi õtdaujo uujẽer uujẽer aademua, ich Jesús iek ʉkha narr khʉʉn por ʉ̃r dʉrjopkhamamua, dʉrjopkha, deeu chukkhu aadejim anʉm. 4Mag õtdau khĩirjo simta õor por ʉ̃r dʉrjopkhabarmjo arrau Ẽwandamau ich Akhaarta thumaam khʉʉn gaai phẽs deebarmua agdaujo deeum meu amachdeu bʉ̃ʉrjã iekhaba aajerrta waa iekha nʉrrjee aphobaadejim anʉm, ich chi Ẽwandam Akharau iekhapimampierr.
5Ich mag phiesta jaar Jerusalén phobor ee naajim aajem: judionaan Ẽwandam iek ʉkhanaa irua jaau sim ipierraa aajem khʉʉn, durrpierrmua beetarr khʉʉn. 6Mag edjã eemua phũ iekjo jug pierrum ũrbaawai, thum ãba ag di aig biirdʉnaa mag phũ iekjo thʉnʉm dʉi sereu wejom ũrbaawai, “¿Jãga aademta mʉg thʉnʉisima?” ajierram anʉm, amachdeu ũurwai am meeun khabam khʉʉnauta durr warpham khʉʉn meupa ajapha chi meu khʉʉn denjo iekha nʉm ũrwia. 7Mag ũrwia sĩi warag dauderraa nʉmua amach wir aigpai jejeeu aajeejim aajem, amach khapeenag. Mag jeeu nʉmua, —Keena, ar jãg durr chaauram meupa iekha nʉrrjeem khʉʉn, ¿jãkhʉʉn amach thum Galileapien khabá? 8¿Jãga jãg amau iekhamam marau maach meúachata ũr nʉmma? aajeejim anʉm. 9Mʉig maach nem meu khapan iekha wejomgui aajeejim anʉm, durr chaauram khʉʉn pom thʉnaawai. Mʉig nʉm: Partiapien, Mediapien, Elampien maimua maach chi Mesopotamia durr joobaajem khʉʉn; Judea durram khʉʉn, Capadociapien, Pontopien maimua Asiapien. 10Mag tag ĩchab thʉnʉm: Frigiapien, Pamfiliapien, Egipto durram khʉʉn maimua Africa durr phobor Cirene anʉm ag atag naajem khʉʉnpa thʉnʉm. Romapienjã mʉig joobaajemgui ajim anʉm, judionaan chaar maimua deeum durrmua beewi judionaan igar nʉm khʉʉnjã agjo, 11Creta durram khʉʉn dʉi Arabiapienpa thʉnʉm. Mag meu khĩirpierr thʉnʉm ee thumaam khʉʉnau agdaujo dich meúata Ẽwandamau nem wautarr amau ĩgkhamam ajapha ũr thʉnʉmgui ajim anʉm.
12Mag amachdeu warm khʉʉn deeum meupa ijẽjẽbkham ũrwia dauderraa nʉm gaaimua, amach wir aigpai jũrr jeeu ohookhamua, “Ma mʉg thʉnʉmʉn, ¿jãga awiata jãg thʉnʉnʉm?” khajierram aajem. 13Mamʉ ãaur khʉʉn ĩchab aig narr khʉʉnau warag am wauwia, “Vino pom agtha khũwaa sim dopʉiwia khech thʉnaawaita jãg thʉnaabahab” aajeejim aajem.
Pedroou õrag iekhatarr
14Magbaawai Pedro tagam ich khapeen agjo ich Jesuucha jʉr autarr khʉʉn dʉi ãba bʉjãau dʉnʉisiwia thet amag magjim anʉm:
—Keena, Judeapien, maimua ĩchab Jerusalén naajem khʉʉn: Khap abat mua pãrag jawaagpam; mʉ iek ũrbat ajim anʉm. 15Õor pãrau oowai jãg thʉnʉm chan pãrau jaau nʉmjo mag nag pom dowia khech thʉnaawai khabamgui ajim anʉm. Pãrau oo naabá ajim anʉm, ĩsta edpherr garm las nuevepai sim; agtha doojem orajã khaba sim, ¿jãga mag õor khech thʉnaajugui? ajim anʉm. 16Am jãg nʉmʉn, sĩi warrgar Ẽwandam i jaaumie Joel khararrau phã pʉatarrjo thʉnʉm khabahab ajim anʉm. Mʉg thʉnaaju igwiata ich Ẽwandamaucha jooi Joel khararrag jaaumamua,
17“Ya mʉg atag mʉchdeu mʉg jẽb opʉiju gayaa paawai mua mʉch Akhaar thumaam khʉʉnag deemajugui” ajim aajem.
“Mag mua amag mʉch Akhaar deebaawai chaain chi emkhooinau chi ʉʉinaupa warrgar mʉ iek jaaujerr khʉʉn denjo mʉ iek jaaujugui” ajim aajem.
“Maimua chaainaam khʉʉn dʉi jooiraam khʉʉnpa mua mʉch aar khãaipi aumajugui” ajim aajem.
18“Ĩchab mua thum mʉch ipierraa nʉm khʉʉnag mʉch Akhaar deemaju, emkhooinag wa ʉʉinag awia khãijã.
Magbaawai amau mʉchdeu amachig jaaubarmta jũrr õrag jaaumajugui” ajim anʉm ich Ẽwandamau.
19Mag jaaumamua ĩchab, “Edjã eejã mua mʉch beeju ijaaur nem khĩirpierr ompaapimajugui” ajim aajem.
“Maagwai mʉg jẽb gaai bag ooju, õtdau phur jĩerrarraukham dʉi;
sĩi naar phʉichchi khõrr jĩubaadephʉmjã oojugui” ajim anʉm.
20“Mag mʉch jua theeg thum beeju ed gayaa paawai, ãsdawam edau khĩbaadeewai jũrr edaram edau arg sĩi bagjo phurii aadejugui” ajim aajem ich Ẽwandamaucha.
21“Mamʉ ĩchab ʉu ar thum mʉrʉg amach dau aug khaugpi jeeu nʉm khʉʉnan ʉu peerdʉtkhajugui” ajim aajem ich Jooirau. (Jl. 2:28-32)
22Pedroou mag Ẽwandam iek phã pʉarr jaau dichwia, ĩchab ijẽjẽbkhamua, —Keena israelnaan, cha mua iekhaagpam ajapha ũrbat ajim anʉm. Pãrau khaphʉ nʉmgui ajim anʉm, Jesús Nazaretpierrta ich Ẽwandamaucha pʉitarr aawai pãach ee ag na nem mag ooba aajerr irua wau nʉrraajerr gaaimuata Ẽwandamau pãrag ich jua theeg oopijim. 23Mamʉ mag khitarrta juau ich Ẽwandamau mag ʉdʉraa i thõopibajieb ajim anʉm, mag i thõopibarm gaaimua warag pãachta wajapcha oberju khaphʉ sĩerr aawai. Magju arr aawaita, pãachig pʉr deebaawai, pãrau i pʉr arrwi pãach ipaarmua pakuls gaai õor sĩi khaibag sĩsidʉm khʉʉnag i meerphe thõopijierramgui ajim anʉm, ich Ẽwandamau ag nawe mag khĩirju wai sĩerrjo. 24Mag juau i thõopʉijierrab mamʉ, Ẽwandamau deeu i phiriu aujimgui ajim anʉm. I mag sĩi jẽb ee ich mag sĩerraju atheem khaba arr aawai mee nʉmuapai chan pod i thʉ aubajim a jaaumajim aajem Pedroou. 25Magju arr aawai rey David khararraujã warrgarwe Jesús igwia ich Jesuuta chadcha ich Aai dʉi iekha sim ũrtarrjo phãmamua magjim:
“Ẽwandam” ajim anʉm chi Chaai garmua ich Ayag, “mua khaphʉ chirʉm, pʉ mʉ dʉi ogdʉba sĩejem.
Pʉchta mʉ na nʉnʉʉu khaawai pua bʉ̃ʉrjã mʉ chig apibamgui” ajim anʉm.
26“Mag gaaimua thãar onee chiraawai mʉch meukhĩraucha pʉrʉg ʉu ajim a chiraajemgui” ajim anʉm chi Chaairau.
27“Mua khaphʉ chirʉm, khaigbam khʉʉn akhaar weetjem aar mʉ akhaar pua pʉim iek pʉibamgui” ajim anʉm, “pʉch chogkha chirʉmta pua mʉ kha khõsi wai chiraawai.
Mʉch kherbarm jẽb degpai ʉdʉraa ãrpiba, deeu mʉch phiriu aujujã mua khaphʉ chirʉmgui” ajim anʉm.
28“Pʉchdeuta pʉch aarcha obeerjem khʉdau mʉrʉg khaugpijim,
maagwai pʉch dʉicha chiraimaawai mʉ onee chirsijugui” ajim anʉm. (Sal. 16:8-11)
29Mag David khararrau phã pʉarr igwia ich Pedroou, —Keena, pãade khĩirjubat ajim anʉm. David khararrau ichpai wir aig igwia pod mag iekhaju khaba sĩejim. Maadeu meraajã khaba nʉm, maach dau nawe jooi David khararr meewi bep sĩujierram; mag i beptarr jẽbdi agtha sĩejemgui ajim anʉm. 30Mamʉ í ĩchab Ẽwandam i jaaumie arr aawai irua khaphʉ sĩejim Ẽwandamau ichig “Mʉ cha iekha chirʉm iekhau pʉ chaain ewagam khʉʉn eemta pʉch simjo reikhapiju” a iekhatarr. 31Ẽwandamau mag iekhatarr aawaita Davidau khaphʉ ya oo wai simjo Cristo iiu phiidʉjujã jaaujim: jãga Ẽwandamau ich Chaai akhaar khaigbam khʉʉn akhaar weetjem aar mawia ich mam sĩepiba, ni i morjã ich aukherbarm jẽb degpai ãrpiba, sĩi phiriu auju. 32Warrgarwe mag jaaujerr aawai ich Ẽwandamau chadcha i phiriu aujimgui ajim anʉm. Marau mag jaau nʉmʉn, chadcha maach daúacha ootarr aawaita mag jaau nʉmgui ajim anʉm Pedroou.
33Mag jaaumamua ichdeupai, —Jãan Ẽwandamau ich jua theegauta chadcha i phiriu autarr aawai ĩs ʉ̃gthar ich Ẽwandam dʉi ãba thumaam khʉʉn Porkha simgui ajim anʉm, ich Jesús igwia. Magta ĩchab ich chi Ayaucha ich Akhaar deeju a jaaujerrjã irig deejimgui ajim aajem. Mag ichig deebaawai jũrr ich Jesuu ĩsta õrag deebarmgui ajim anʉm. Magua cha pãrau pãach daúacha oonaa pãach jʉ̃gʉucha pãach meu ũr nʉmjã mag sĩi khech naawai khaba, thum ich Jesús gaaimuata jãg thʉnʉmgui ajim anʉm, chadcha ichta ʉ̃gtharjã maach thumaam khʉʉn Porkha sĩewai. 34Maigta pãrau oo naabá ajim anʉm. David Jesujo ʉ̃gtharjã thumaam khʉʉn Porkhaimaba arr aawai ¿jãga irua ich igwia magkhajĩ? Mag khãai maach Por Jesuuta ʉ̃gthar pabaimaawaijã thumaam khʉʉn Porkhaimaju ichdeu khaphʉ sĩerr aawai, ich Jesús igwiata Davidau ich paarmua,
“Ẽwandamau maach Porogta, ich dʉi ãba thumaam khʉʉn Porkhapieg ich juachaar gar juppiju” a iekhabajieb ajim anʉm, 35“i oomapham khʉʉn thum ich jua ee pʉrkha dee nʉm ora.” (Sal. 110:1)
36Maimua deeu ich Pedrooupai, —Keena ĩsmua atag israelnaan thumaam khʉʉnau warre khaphʉ abat ajim anʉm, cha mua pãrag jawaagpam. Ar pãach ipaarmua pa gaai meerphe thõopʉipi jaautarr Jesuuta warag Ẽwandamau thumaam khʉʉn Porkhapibarm; ich khabajieb ajim anʉm warrgarwe Ẽwandamau jʉr auwia maach peerdʉ aumkhĩir pʉiju jaaujerr.
37Pedroou mag iekhabapʉim amachdeu ũrbaawai warre gaai machaaga aphobaademua ich Pedroogcha jeeunaa i khapeenagjã agjo, —Keena, ¿magan marau jãgata aju aai nʉwi ajierram anʉm, Ẽwandamau maach peerdʉ aumkhĩir? Marag jaaubat ajierram aajem.
38Magbaawai Pedroou amag magjim aajem:
—Thum agdaujo pãach mor ewag khĩirjuwia Ẽwandamag pãach khaibag chugpaapi jeeubat ajim anʉm. Magnaa chadcha Jesucristo iek ʉkhanaa pãach por choopibat ajim anʉm. Pãrau magmʉn, Ẽwandamau pãar khaibag chugpaapʉiwia jũrr ich Akhaarta pãrag deejugui ajim aajem, ichdeu deeju a jaautarrjo. 39Irua mag ich Akhaar deeju jaautarran, pãrag deenaa, pãar chaainagjã deewi, thum durr warpham khʉʉnagpa deeju jaautarrau. Wajapcharan thum ichdeu khõsi thʉ̃r aumam khʉʉnagta ich Akhaar deemajugui ajim aajem.
40Mag, Jesuu nem waaujerr thumaa jaaumam dʉi warag am wawimamua Pedroou amag, “Õor mʉg chi ajaugjã chukhu thʉnʉm khʉʉn dʉi okhoomapha nʉm khai, ãba Ẽwandamta jʉrbat” aajeejim anʉm.
41Mag chadcha Pedroou jaau sim ũrwia Ẽwandam iek ʉkhamarr khʉʉnau amach por choopimajierram aajem. Ich mag edpai ʉkhawia amach por choopimarr khʉʉn appai tres miljo naajim aajem. 42Mag, chi ʉkha durrarr khʉʉn thum ãbam aig podpanaa ich Jesuu pʉitarr khʉʉnau jaau nʉmpierr ich mag am ipierraa wenʉrraajeejim aajem. Amach khapeen dʉi o khaigbajã khaba, ante Ẽwandamag jeeu nʉmua warag thachjã ãba jig khoojeejim aajem.
Jãga aajeejĩ warrcha Cristo iek ʉkha phobaaderr khʉʉn
43Mag nʉm ee ich Jesuu jʉr autarr khʉʉnau ag na nem mag ooba aajempa wau nʉm oowia õor thumaam khʉʉnta dauderraa thʉnaajim aajem. 44Chi Ẽwandam iek ʉkha nʉm khʉʉnan ʉ̃iba ãba biirdʉnaa amach khapeen dʉijã ajapha naajeejim aajem. Maguata jũrr agdaujo chikhamnagjã nemdam ĩgkhaba, thumaa jig aumaajeejim aajem. 45Amach nem wai nʉnʉid arrjã thum perkhʉʉinaa chi phatkhon jũrr nemdam ig nʉmjã chukhu khitheem khʉʉnag jigpʉimaajeejim anaabá, thumaa agdaujo. 46Mag nʉmua edau ãspapakhampierr Aai i jeeujem deg ãba podpanaa Ẽwandamag jeeujeejim aajem. Maimua amach di aar pawiajã ich mag Ẽwandamag jeeu nʉmua thachjã agdaujoo thoikhanaa thumaa o ãba onee kho dichdimapphʉ aajeejim anʉm. 47Amach mag nʉm gaaimua ag phobor eem sĩi bithurgam khʉʉnaujã am kha khõsi aajeejim aajem. Mag nʉm dʉi maach Por Jesuu warag õrag ich iek ʉkhapi aumam khʉʉn ag nawe ʉkha durrarr khʉʉn ee dubmaawai warag khapaana paaukhamajim aajem, edau ãspapakhampierr.
Currently Selected:
Hechos 2: noaA
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.