ܪ̈ܗ݇ܘܿܡܝܐ 7

ܛܘܼܦ̮ܣܵܐ ܡ̣ܢ ܓܒ݂ܵܪܵܐ

1ܐܲܚܘܿܢܘܵܬܝܼ̈، ܗܲܡܙܘܼܡܹܐ ܝܘܸܢ ܐܸܠܵܘܟ݂ܘܿܢ ܐܲܝܟ݂ ܐܵܢܝܼ ܕܟܹܐ ܝܵܕܥܝܼ ܢܵܡܘܿܣܵܐ. ܟܹܐ ܝܵܕܥܝܼܬܘܿܢ ܕܢܵܡܘܿܣܵܐ ܐܝܼܬ ܠܹܗ ܫܘܼܠܛܵܢܵܐ ܥܲܠ ܚܲܕ ܐ݇ܢܵܫܵܐ ܟܡܵܐ ܕܗ̇ܘ ܐ݇ܢܵܫܵܐ ܚܵܝܵܐ ܝܠܹܗ. 2ܩܵܐ ܛܘܼܦ̮ܣܵܐ، ܚܕܵܐ ܒܲܟ݂ܬܵܐ ܓܒ݂ܝܼܪܬܵܐ ܐ݇ܣܝܼܪܬܵܐ ܝܠܵܗ̇ ܒܓܲܒ݂ܪܘܼܗ̇ ܟܡܵܐ ܕܓܲܒ݂ܪܘܼܗ̇ ܚܵܝܵܐ ܝܠܹܗ. ܐܝܼܢܵܐ ܐܸܢ ܡܵܐܹܬ ܓܲܒ݂ܪܘܼܗ̇، ܒܸܬ ܦܵܝܫܵܐ ܫܪܝܼܬܵܐ ܡ̣ܢ ܩܵܢܘܿܢܵܐ ܕܓܒ݂ܵܪܵܐ. 3ܒܘܼܬ ܐܵܗܵܐ ܐܸܢ ܓܵܒ݂ܪܵܐ ܠܚܲܕ ܐ݇ܚܹܪ݇ܢܵܐ ܟܲܕ ܓܲܒ݂ܪܘܼܗ̇ ܚܵܝܵܐ ܝܠܹܗ، ܒܸܬ ܦܵܝܫܵܐ ܩܪܝܼܬܵܐ ܓܲܝܵܪܬܵܐ. ܐܝܼܢܵܐ ܐܸܢ ܡܵܐܹܬ ܓܲܒ݂ܪܘܼܗ̇، ܦܝܼܫ ܠܵܗ̇ ܫܪܝܼܬܵܐ ܡ̣ܢ ܩܵܢܘܿܢܵܐ ܘܠܹܐ ܝܠܵܗ̇ ܓܲܝܵܪܬܵܐ ܐܘܼܦ ܐܸܢ ܕܓܵܒ݂ܪܵܐ ܠܚܲܕ ܐ݇ܚܹܪ݇ܢܵܐ. 4ܗܲܕܟ݂ܵܐ ܐܘܼܦ ܐܲܚܬܘܿܢ، ܐܲܚܘܿܢܘܵܬܝܼ̈، ܡܝܼܬ ܠܵܘܟ݂ܘܿܢ ܠܢܵܡܘܿܣܵܐ ܒܝܲܕ ܦܲܓ݂ܪܵܐ ܕܡܫܝܼܚܵܐ ܕܗܵܘܹܝܬܘܿܢ ܠܚܲܕ ܐ݇ܚܹܪ݇ܢܵܐ، ܗ̇ܘ ܕܩܝܼܡ ܠܹܗ ܡ̣ܢ ܓܵܘ ܡܝܼܬܹ̈ܐ ܕܝܵܗ݇ܒܲܚ ܛܥܘܼܢܝܵܬܹ̈ܐ ܠܐܲܠܵܗܵܐ. 5ܐܝܼܡܲܢ ܕܝܼܘܲܚ ܗ݇ܘܵܘ ܙܘܼܒܛܸܢܹܐ ܒܟܝܵܢܵܐ ܚܲܛܵܝܵܐ، ܫܲܗܘܲܬܝܵܬܹ̈ܐ ܕܚܛܝܼܬܵܐ ܦܝܼܫܹܐ ܝܗ݇ܘܵܘ ܡܘܼܪܥܸܫܹܐ ܓܵܘܲܢ ܒܝܲܕ ܢܵܡܘܿܣܵܐ، ܘܒܸܦܠܵܚܵܐ ܝܗ݇ܘܵܘ ܓܵܘ ܗܲܕܵܡܲܢ̈ ܕܡܲܒܪܝܼ ܗ݇ܘܵܘ ܡܵܘܬܵܐ. 6ܐܝܼܢܵܐ ܐܵܕܝܼܵܐ ܦܝܼܫ ܠܲܢ ܫܸܪܝܹܐ ܡ̣ܢ ܢܵܡܘܿܣܵܐ ܣܵܒܵܒ ܡܝܼܬ ܠܲܢ ܠܗ̇ܘ ܕܙܘܼܒܛܸܢܲܢ ܝܼܗ݇ܘܵܐ. ܐܵܕܝܼܵܐ ܒܸܥܒ݂ܵܕܵܐ ܝܘܲܚ ܚܸܠܡܲܬ ܒܚܲܕ݇ܬܘܼܬܵܐ ܕܪܘܼܚܵܐ، ܘܠܵܐ ܒܥܲܬܝܼܩܘܼܬܵܐ ܕܟܬܵܒ݂ܵܐ.

ܦܠܵܫܵܐ ܕܲܠܩܘܼܒ݂ܠ ܕܚܛܝܼܬܵܐ

7ܡܘܿܕܝܼ ܐܵܡܪܲܚ؟ ܢܵܡܘܿܣܵܐ ܚܛܝܼܬܵܐ ܝܠܹܗ؟ ܚܵܣ ܠܝܼ. ܠܹܐ ܝܵܕܥܹܢ ܗ݇ܘܵܐ ܡܘܿܕܝܼ ܝܗ݇ܘܵܐ ܚܛܝܼܬܵܐ ܐܸܠܵܐ ܒܝܲܕ ܢܵܡܘܿܣܵܐ ܝ݇ܕܝܼܥ ܠܝܼ. ܠܹܐ ܝܵܕܥܹܢ ܗ݇ܘܵܐ ܡܘܿܕܝܼ ܝܗ݇ܘܵܐ ܫܲܗܘܲܬܬܵܐ ܐܸܢ ܢܵܡܘܿܣܵܐ ܠܵܐ ܐܵܡܹܪ ܗ݇ܘܵܐ، ”ܠܵܐ ܫܲܗܘܸܬܸܬ.“#ܡܦܩܢܐ 20‏:17؛ ܬܢܝܢ ܢܡܘܣܐ 5‏:21 8ܐܝܼܢܵܐ ܚܛܝܼܬܵܐ ܟܲܕ ܡܘܼܫ݇ܟ̰ܸܚ ܠܵܗ̇ ܥܸܠܬܵܐ ܒܝܲܕ ܦܘܼܩܕܵܢܵܐ، ܡܘܼܒܪܹܐ ܠܵܗ̇ ܓܵܘܝܼ ܫܲܗܘܲܬܬܵܐ. ܣܵܒܵܒ ܒܠܵܐ ܢܵܡܘܿܣܵܐ ܚܛܝܼܬܵܐ ܡܝܼܬܬܵܐ ܝܠܵܗ̇. 9ܩܵܕ݇ܡܵܝܬܵܐ ܐܵܢܵܐ ܚܵܝܵܐ ܝܘܸܢ ܗ݇ܘܵܐ ܕܠܵܐ ܢܵܡܘܿܣܵܐ، ܐܝܼܢܵܐ ܐܝܼܡܲܢ ܕܦܘܼܩܕܵܢܵܐ ܐ݇ܬܹܐ ܠܹܗ، ܚܛܝܼܬܵܐ ܚܝܹܐ ܠܵܗ̇ ܘܐܵܢܵܐ ܡܝܼܬ ܠܝܼ. 10ܣܵܒܵܒ ܦܘܼܩܕܵܢܵܐ ܕܝܼܗ݇ܘܵܐ ܩܵܐ ܚܲܝܹ̈ܐ، ܚܙܹܐ ܠܝܼ ܩܵܐ ܡܵܘܬܵܐ ܝܗ݇ܘܵܐ. 11ܘܚܛܝܼܬܵܐ ܡܘܼܫ݇ܟ̰ܸܚ ܠܵܗ̇ ܥܸܠܬܵܐ ܒܦܘܼܩܕܵܢܵܐ، ܥܘܼܠܕܹܐ ܠܵܗ̇ ܐܸܠܝܼ، ܘܩܲܡ ܩܵܛܠܵܐ ܠܝܼ ܒܝܲܕ ܦܘܼܩܕܵܢܵܐ. 12ܗܲܕܟ݂ܵܐ ܢܵܡܘܿܣܵܐ ܩܲܕܝܼܫܵܐ ܝܠܹܗ، ܘܦܘܼܩܕܵܢܵܐ ܩܲܕܝܼܫܵܐ ܝܠܹܗ، ܘܟܹܐܢܵܐ، ܘܛܵܒ݂ܵܐ. 13ܒܲܣ ܗ̇ܘ ܕܝܼܗ݇ܘܵܐ ܛܵܒ݂ܵܐ ܗܘܹܐ ܠܹܗ ܐܸܠܝܼ ܡܵܘܬܵܐ؟ ܚܵܣ ܠܝܼ. ܐܝܼܢܵܐ ܚܛܝܼܬܵܐ ܕܡܲܒܝܸܢܵܐ ܐܲܝܟ݂ ܚܛܝܼܬܵܐ، ܡܘܼܥܒܸܪܵܗ̇ ܒܝܼܝܼ ܡܵܘܬܵܐ ܒܝܲܕ ܛܵܒ݂ܬܵܐ، ܕܗܲܕܟ݂ܵܐ ܒܝܲܕ ܦܘܼܩܕܵܢܵܐ ܚܛܝܼܬܵܐ ܦܵܝܫܵܐ ܝ݇ܕܝܼܥܬܵܐ ܪܵܒܵܐ ܚܲܛܵܝܬܵܐ. 14ܒܝܼܕܵܥܵܐ ܝܘܲܚ ܕܢܵܡܘܿܣܵܐ ܪܘܼܚܵܢܵܝܵܐ ܝܠܹܗ، ܐܝܼܢܵܐ ܐܵܢܵܐ ܠܹܐ ܝܘܸܢ ܪܘܼܚܵܢܵܝܵܐ، ܙܘܼܒܢܵܐ ܐܲܝܟ݂ ܚܲܕ ܥܲܒ݂ܕܵܐ ܕܚܛܝܼܬܵܐ. 15ܡܸܢܕܝܼ ܕܒܸܥܒ݂ܵܕܵܐ ܝܘܸܢ ܠܹܐ ܝܘܸܢ ܒܝܼܕܵܥܵܐ، ܣܵܒܵܒ ܡܸܢܕܝܼ ܕܒܨܸܒ݂ܝܵܢܝܼ ܝܠܹܗ ܠܹܐ ܝܘܸܢ ܒܸܥܒ݂ܵܕܵܐ، ܐܸܠܵܐ ܡܸܢܕܝܼ ܕܒܸܣܢܵܝܵܐ ܝܘܸܢ، ܗ̇ܘ ܒܸܥܒ݂ܵܕܵܐ ܝܘܸܢ. 16ܘܐܸܢ ܒܸܥܒ݂ܵܕܵܐ ܝܘܸܢ ܡܸܢܕܝܼ ܕܠܹܐ ܒܵܥܹܝܢ ܥܵܒ݂ܕܹܢ، ܒܸܣܗܵܕܵܐ ܝܘܸܢ ܕܢܵܡܘܿܣܵܐ ܛܵܒ݂ܵܐ ܝܠܹܗ. 17ܡܲܒܝܘܼܢܹܐ ܝܠܵܗ̇ ܕܠܹܐ ܝܘܸܢ ܐܵܢܵܐ ܒܸܥܒ݂ܵܕܵܐ ܗܲܕܟ݂ܵܐ، ܐܸܠܵܐ ܚܛܝܼܬܵܐ ܕܒܸܥܡܵܪܵܐ ܝܠܵܗ̇ ܒܝܼܝܼ. 18ܒܝܼܕܵܥܵܐ ܝܘܸܢ ܕܠܲܝܬ ܡܸܢܕܝܼ ܛܵܒ݂ܵܐ ܒܸܥܡܵܪܵܐ ܒܝܼܝܼ، ܝܲܥܢܹܐ ܓܵܘ ܟܝܵܢܝܼ ܚܲܛܵܝܵܐ، ܣܵܒܵܒ ܒܸܒܥܵܝܵܐ ܝܘܸܢ ܕܥܵܒ݂ܕܹܢ ܛܵܒ݂ܬܵܐ ܐܝܼܢܵܐ ܠܹܐ ܝܘܸܢ ܡܨܵܝܵܐ ܕܥܵܒ݂ܕܹܢ. 19ܣܵܒܵܒ ܛܵܒ݂ܬܵܐ ܕܒܵܥܹܝܢ ܥܵܒ݂ܕܹܢ ܠܹܐ ܝܘܸܢ ܒܸܥܒ݂ܵܕܵܐ، ܐܸܠܵܐ ܒܝܼܫܬܵܐ ܕܠܹܐ ܒܵܥܹܝܢ ܥܵܒ݂ܕܹܢ، ܗ̇ܝ ܒܸܥܒ݂ܵܕܘܼܗ̇ ܝܘܸܢ. 20ܐܸܢ ܒܸܥܒ݂ܵܕܵܐ ܝܘܸܢ ܡܸܢܕܝܼ ܕܠܹܐ ܒܵܥܹܝܢ ܠܸܥܒ݂ܵܕܵܐ، ܠܹܐ ܝܘܸܢ ܐ݇ܚܹܪ݇ܢܵܐ ܐܵܢܵܐ ܒܸܥܒ݂ܵܕܹܗ ܐܸܠܵܐ ܚܛܝܼܬܵܐ ܕܒܸܥܡܵܪܵܐ ܝܠܵܗ̇ ܒܝܼܝܼ. 21ܐܵܕܝܼܵܐ ܡܘܼܫ݇ܟ̰ܸܚ ܠܝܼ ܚܲܕ ܢܵܡܘܿܣܵܐ، ܐܝܼܡܲܢ ܕܒܵܥܹܝܢ ܥܵܒ݂ܕܹܢ ܛܵܒ݂ܬܵܐ، ܒܝܼܫܬܵܐ ܓܵܘܝܼ ܝܠܵܗ̇. 22ܒܸܚܕܵܝܵܐ ܝܘܸܢ ܒܢܵܡܘܿܣܵܐ ܕܐܲܠܵܗܵܐ ܕܝܼܠܹܗ ܓܵܘ ܠܸܒܝܼ، 23ܐܝܼܢܵܐ ܒܸܚܙܵܝܵܐ ܝܘܸܢ ܚܲܕ ܢܵܡܘܿܣܵܐ ܐ݇ܚܹܪ݇ܢܵܐ ܓܵܘ ܗܲܕܵܡܹ̈ܐ ܕܦܲܓ݂ܪܝܼ، ܒܸܦܠܵܫܵܐ ܕܲܠܩܘܼܒ݂ܠ ܕܢܵܡܘܿܣܵܐ ܕܪܸܥܝܵܢܝܼ، ܘܒܸܥܒ݂ܵܕܝܼ ܝܠܹܗ ܐܲܣܝܼܪܵܐ ܠܢܵܡܘܿܣܵܐ ܕܚܛܝܼܬܵܐ ܕܝܼܠܹܗ ܓܵܘ ܗܲܕܵܡܝܼ̈. 24ܘܵܝ ܥܲܠܝܼ ܒܲܪܢܵܫܵܐ ܫܲܩܝܼ! ܡܵܢܝܼ ܒܸܬ ܦܲܨܹܐ ܠܝܼ ܡ̣ܢ ܐܵܗܵܐ ܦܲܓ݂ܪܵܐ ܡܵܝܘܿܬܵܐ؟ 25ܫܲܟܘܼܪܹܐ ܝܘܸܢ ܠܐܲܠܵܗܵܐ ܒܝܼܫܘܿܥ ܡܫܝܼܚܵܐ ܡܵܪܲܢ. ܗܲܕܟ݂ܵܐ ܒܪܸܥܝܵܢܝܼ ܥܲܒ݂ܕܵܐ ܝܘܸܢ ܠܢܵܡܘܿܣܵܐ ܕܐܲܠܵܗܵܐ، ܐܝܼܢܵܐ ܒܟܝܵܢܝܼ ܚܲܛܵܝܵܐ ܥܲܒ݂ܕܵܐ ܝܘܸܢ ܠܢܵܡܘܿܣܵܐ ܕܚܛܝܼܬܵܐ.

Currently Selected:

ܪ̈ܗ݇ܘܿܡܝܐ 7: ABTAB

Highlight

Copy