ܪ̈ܗ݇ܘܿܡܝܐ 5

ܛܥܘܼܢܝܵܬܹ̈ܐ ܕܙܲܕܝܼܩܘܼܬܵܐ

1ܒܲܣ ܟܲܕ ܦܝܼܫ ܠܲܢ ܡܘܼܟܫܸܛܹܐ ܒܗܲܝܡܵܢܘܼܬܵܐ ܐܝܼܬ ܠܲܢ ܫܠܵܡܵܐ ܥܲܡ ܐܲܠܵܗܵܐ ܒܝܲܕ ܡܵܪܲܢ ܝܼܫܘܿܥ ܡܫܝܼܚܵܐ. 2ܒܝܼܹܗ ܐܝܼܬ ܠܲܢ ܩܲܪܒܲܢܬܵܐ ܒܗܲܝܡܵܢܘܼܬܵܐ ܠܐܵܗܵܐ ܫܵܦܵܩܲܬ ܕܟܸܠܝܹܐ ܝܘܲܚ ܩܸܘܝܹܐ ܓܵܘܘܼܗ̇، ܘܒܸܚܕܵܝܵܐ ܝܘܲܚ ܒܗܹܒ݂ܝܼ ܕܫܘܼܒ݂ܚܵܐ ܕܐܲܠܵܗܵܐ. 3ܠܵܐ ܐܲܚܟ̰ܝܼ ܗܲܕܟ݂ܵܐ، ܐܸܠܵܐ ܒܸܚܕܵܝܵܐ ܝܘܲܚ ܒܐܘܼܠܨܵܢܲܢ̈ ܣܵܒܵܒ ܒܝܼܕܵܥܵܐ ܝܘܲܚ ܕܐܘܼܠܨܵܢܵܐ ܒܸܬ ܝܲܗ݇ܒܸܠ ܠܲܢ ܡܣܲܝܒܪܵܢܘܼܬܵܐ، 4ܘܡܣܲܝܒܪܵܢܘܼܬܵܐ ܟܹܐ ܝܵܗ݇ܒ݂ܵܐ ܠܲܢ ܢܸܣܝܵܢܵܐ، ܘܢܸܣܝܵܢܵܐ ܟܹܐ ܝܲܗ݇ܒܸܠ ܠܲܢ ܗܹܒ݂ܝܼ، 5ܘܗܹܒ݂ܝܼ ܠܹܐ ܡܲܢܟܸܦܵܐ ܠܲܢ، ܣܵܒܵܒ ܚܘܼܒܵܐ ܕܐܲܠܵܗܵܐ ܦܝܼܫ ܠܹܗ ܡܘܼܫܦܸܟ݂ܵܐ ܓܵܘ ܠܸܒܲܢ ܒܝܲܕ ܪܘܼܚܵܐ ܕܩܘܼܕܫܵܐ ܕܝܘܼܗ݇ܒܸܠ ܠܹܗ ܐܸܠܲܢ. 6ܣܵܒܵܒ ܒܗ̇ܝ ܥܕܵܢܵܐ ܕܝܼܘܲܚ ܗ݇ܘܵܘ ܙܲܒܘܼܢܹ̈ܐ ܡܫܝܼܚܵܐ ܡܝܼܬ ܠܹܗ ܡ̣ܢ ܓܹܒܵܐ ܕܥܵܘܵܠܹ̈ܐ. 7ܒܵܨܘܿܪܹ̈ܐ ܐ݇ܢܵܫܹ̈ܐ ܟܹܐ ܡܵܝܬܝܼ ܡ̣ܢ ܓܹܒܵܐ ܕܚܲܕ ܐ݇ܢܵܫܵܐ ܙܲܕܝܼܩܵܐ، ܐܝܼܢܵܐ ܩܵܘܡܵܐ ܕܚܲܕ ܩܲܫܕܸܪ ܕܡܵܐܹܬ ܡ̣ܢ ܓܹܒܵܐ ܕܚܲܕ ܐ݇ܢܵܫܵܐ ܛܵܒ݂ܵܐ. 8ܐܝܼܢܵܐ ܐܲܠܵܗܵܐ ܡܘܼܚܙܹܐ ܠܹܗ ܚܘܼܒܹܗ ܐܸܠܲܢ، ܟܲܕ ܚܲܛܵܝܹ̈ܐ ܝܘܲܚ ܗ݇ܘܵܘ، ܗܲܕܟ݂ܵܐ ܡܫܝܼܚܵܐ ܡܝܼܬ ܠܹܗ ܡ̣ܢ ܓܹܒܲܢ. 9ܟܲܕ ܦܝܼܫ ܠܲܢ ܡܘܼܟܫܸܛܹܐ ܒܕܸܡܹܗ، ܟܡܵܐ ܒܘܼܫ ܙܵܘܕܵܐ ܒܸܬ ܦܵܝܫܲܚ ܦܘܼܪܩܹܐ ܡ̣ܢ ܟܲܪܒܵܐ ܕܐܲܠܵܗܵܐ ܒܝܼܹܗ. 10ܐܝܼܡܲܢ ܕܝܼܘܲܚ ܗ݇ܘܵܘ ܕܸܫܡܸܢܹ̈ܐ ܕܐܲܠܵܗܵܐ، ܦܝܼܫ ܠܲܢ ܣܘܼܙܓܸܪܹܐ ܥܲܡܹܗ ܒܝܲܕ ܡܵܘܬܵܐ ܕܒܪܘܿܢܹܗ، ܐܝܼܢܵܐ ܐܵܕܝܼܵܐ ܕܣܘܼܙܓܸܪܹܐ ܝܘܲܚ ܟܡܵܐ ܒܘܼܫ ܙܵܘܕܵܐ ܒܸܬ ܦܵܝܫܲܚ ܦܘܼܪܩܹܐ ܒܚܲܝܘܼ̈ܗܝ. 11ܘܠܵܐ ܐܲܚܟ̰ܝܼ ܗܲܕܟ݂ܵܐ، ܐܝܼܢܵܐ ܐܘܼܦ ܒܸܚܕܵܝܵܐ ܝܘܲܚ ܒܐܲܠܵܗܵܐ ܒܝܲܕ ܡܵܪܲܢ ܝܼܫܘܿܥ ܡܫܝܼܚܵܐ، ܕܒܝܼܹܗ ܩܘܼܒܸܠ ܠܲܢ ܣܲܙܓܲܪܬܵܐ.

ܡܵܘܬܵܐ ܒܝܲܕ ܐܵܕܵܡ،ܚܲܝܹ̈ܐ ܒܝܲܕ ܡܫܝܼܚܵܐ

12ܕܵܐܟ݂ܝܼ ܕܚܛܝܼܬܵܐ ܥܒ݂ܝܼܪܵܗ̇ ܓܵܘ ܥܵܠܡܵܐ ܒܝܲܕ ܚܲܕ ܐ݇ܢܵܫܵܐ،#ܒܪܝܬܐ 3‏:6 ܘܡܵܘܬܵܐ ܐ݇ܬܹܐ ܠܹܗ ܒܝܲܕ ܚܛܝܼܬܵܐ، ܗܲܕܟ݂ܵܐ ܡܵܘܬܵܐ ܐ݇ܬܹܐ ܠܹܗ ܥܲܠ ܟܠܲܝܗܝ ܐ݇ܢܵܫܹ̈ܐ ܣܵܒܵܒ ܟܠܲܝܗܝ ܚܛܹܐ ܠܗܘܿܢ. 13ܡ̣ܢ ܩܵܕ݇ܡ ܕܦܵܐܹܫ ܗ݇ܘܵܐ ܝܘܼܗ݇ܒ݂ܵܐ ܢܵܡܘܿܣܵܐ، ܐܝܼܬ ܗ݇ܘܵܐ ܚܛܝܼܬܵܐ ܓܵܘ ܥܵܠܡܵܐ. ܐܝܼܢܵܐ ܚܛܝܼܬܵܐ ܠܹܐ ܝܠܵܗ̇ ܚܘܼܫܒܸܢܬܵܐ ܚܛܝܼܬܵܐ ܐܝܼܡܲܢ ܕܠܲܝܬ ܢܵܡܘܿܣܵܐ. 14ܐܝܼܢܵܐ ܗܘܼܟܸܡ ܠܹܗ ܡܵܘܬܵܐ ܡ̣ܢ ܥܕܵܢܵܐ ܕܐܵܕܵܡ ܗܲܠ ܥܕܵܢܵܐ ܕܡܘܼܫܹܐ، ܐܘܼܦ ܥܲܠ ܐܵܢܝܼ ܕܠܵܐ ܚܛܹܐ ܠܗܘܿܢ ܒܫܡܵܛܬܵܐ ܕܦܘܼܩܕܵܢܵܐ ܐܲܝܟ݂ ܐܵܕܵܡ، ܗ̇ܘ ܕܝܼܗ݇ܘܵܐ ܛܘܼܦ̮ܣܵܐ ܕܗ̇ܘ ܕܐܵܬܹܐ ܗ݇ܘܵܐ. 15ܐܝܼܢܵܐ ܡܵܘܗܲܒ݂ܬܵܐ ܠܹܐ ܝܠܵܗ̇ ܐܲܝܟ݂ ܓܢܵܗܵܐ. ܣܵܒܵܒ ܐܸܢ ܒܓܢܵܗܵܐ ܕܚܲܕ ܐ݇ܢܵܫܵܐ ܪܵܒܵܐ ܡܝܼܬ ܠܗܘܿܢ، ܟܡܵܐ ܒܘܼܫ ܙܵܘܕܵܐ ܫܵܦܵܩܲܬ ܕܐܲܠܵܗܵܐ، ܘܡܵܘܗܲܒ݂ܬܹܗ ܒܫܵܦܵܩܲܬ ܕܚܲܕ ܐ݇ܢܵܫܵܐ، ܝܼܫܘܿܥ ܡܫܝܼܚܵܐ، ܙܝܼܕ ܠܵܗ̇ ܠܪܵܒܵܐ ܐ݇ܢܵܫܹ̈ܐ. 16ܡܵܘܗܲܒ݂ܬܵܐ ܠܹܐ ܝܠܵܗ̇ ܐܲܝܟ݂ ܚܛܝܼܬܵܐ ܕܚܲܕ ܐ݇ܢܵܫܵܐ. ܕܝܵܢܬܵܐ ܐ݇ܬܹܐ ܠܵܗ̇ ܡ̣ܢ ܒܵܬ݇ܪ ܚܛܝܼܬܵܐ ܕܚܲܕ ܐ݇ܢܵܫܵܐ ܘܡܘܼܐܬܹܐ ܠܵܗ̇ ܚܲܝܵܒ݂ܘܼܬܵܐ، ܐܝܼܢܵܐ ܡܵܘܗܲܒ݂ܬܵܐ ܐ݇ܬܹܐ ܠܵܗ̇ ܡ̣ܢ ܒܵܬ݇ܪ ܪܵܒܵܐ ܓܢܵܗܹ̈ܐ ܘܡܘܼܐܬܹܐ ܠܵܗ̇ ܡܲܟܫܲܛܬܵܐ. 17ܐܸܢ ܒܓܢܵܗܵܐ ܕܚܲܕ ܐ݇ܢܵܫܵܐ ܡܵܘܬܵܐ ܗܘܼܟܸܡ ܠܹܗ ܒܝܲܕ ܚܲܕ ܐ݇ܢܵܫܵܐ، ܒܘܼܫ ܙܵܘܕܵܐ ܐܵܢܝܼ ܕܩܲܒܠܝܼ ܦܸܪܝܘܼܬܵܐ ܕܫܵܦܵܩܲܬ ܘܡܵܘܗܲܒ݂ܬܵܐ ܕܙܲܕܝܼܩܘܼܬܵܐ ܒܸܬ ܗܲܟܡܝܼ ܒܚܲܝܹ̈ܐ ܒܝܲܕ ܚܲܕ ܐ݇ܢܵܫܵܐ، ܝܼܫܘܿܥ ܡܫܝܼܚܵܐ. 18ܒܲܣ ܕܵܐܟ݂ܝܼ ܕܒܓܢܵܗܵܐ ܕܚܲܕ ܐ݇ܢܵܫܵܐ ܕܝܵܢܬܵܐ ܐ݇ܬܹܐ ܠܵܗ̇ ܥܲܠ ܟܠܲܝܗܝ ܒܢܲܝ̈ܢܵܫܵܐ، ܗܲܕܟ݂ܵܐ ܒܙܲܕܝܼܩܘܼܬܵܐ ܕܚܲܕ، ܡܲܟܫܲܛܬܵܐ ܗܘܹܐ ܠܵܗ̇ ܠܚܲܝܹ̈ܐ ܩܵܐ ܟܠܲܝܗܝ ܒܢܲܝ̈ܢܵܫܵܐ. 19ܣܵܒܵܒ ܕܵܐܟ݂ܝܼ ܕܒܥܵܨܝܼܘܼܬܵܐ ܕܚܲܕ ܐ݇ܢܵܫܵܐ ܪܵܒܵܐ ܗܘܹܐ ܠܗܘܿܢ ܚܲܛܵܝܹ̈ܐ، ܒܡܲܨܝܲܬܬܵܐ ܕܚܲܕ ܐ݇ܢܵܫܵܐ ܪܵܒܵܐ ܒܸܬ ܦܵܝܫܝܼ ܥܒ݂ܝܼܕܹܐ ܙܲܕܝܼܩܹ̈ܐ. 20ܢܵܡܘܿܣܵܐ ܐ݇ܬܹܐ ܠܹܗ ܕܙܵܝܕܵܐ ܗ݇ܘܵܐ ܓܢܵܗܵܐ، ܐܝܼܢܵܐ ܐܲܝܟܵܐ ܕܚܛܝܼܬܵܐ ܙܝܼܕ ܠܵܗ̇، ܐܘܼܦ ܫܵܦܵܩܲܬ ܒܘܼܫ ܙܝܼܕ ܠܵܗ̇، 21ܕܐܲܝܟ݂ ܕܗܘܼܟܸܡ ܠܵܗ̇ ܚܛܝܼܬܵܐ ܒܡܵܘܬܵܐ، ܗܲܕܟ݂ܵܐ ܐܘܼܦ ܫܵܦܵܩܲܬ ܒܸܬ ܗܲܟܡܵܐ ܒܙܲܕܝܼܩܘܼܬܵܐ ܕܡܲܝܬܝܵܐ ܚܲܝܹ̈ܐ ܕܠܥܵܠܲܡ ܒܝܼܫܘܿܥ ܡܫܝܼܚܵܐ ܡܵܪܲܢ.

Currently Selected:

ܪ̈ܗ݇ܘܿܡܝܐ 5: ABTAB

Highlight

Copy