ܡܬܠ̈ܐ 5
5
ܙܘܼܗܵܪܵܐ ܒܘܼܬ ܓܲܝܵܪܘܼܬܵܐ
1ܒܪܘܿܢܝܼ، ܠܚܸܟ݂ܡܬܵܐ ܡܲܨܝܸܬ،
ܠܦܲܪܡܵܝܬܝܼ ܨܲܠܝܼ ܢܵܬܘܼܟ݂،
2ܠܸܢܛܵܪܵܐ ܬܲܚܡܲܢܬܵܐ؛
ܘܣܸܦܘܵܬܘܼ̈ܟ݂ ܚܲܡܝܼ ܝ݇ܕܲܥܬܵܐ.
3ܣܵܒܵܒ ܕܸܒ݂ܫܵܐ ܟܹܐ ܡܲܢܛܸܦܝܼ ܣܸܦܘܵܬܹ̈ܐ ܕܙܵܢܝܼܬܵܐ،
ܘܒܘܼܫ ܡܲܟ̰ܘܼܥ ܝܼܠܹܗ ܡ̣ܢ ܡܸܫܚܵܐ ܫܵܡܵܟܘܼܗ̇.
4ܐܝܼܢܵܐ ܦܪܵܩܬܘܼܗ̇ ܡܲܪܝܼܪܬܵܐ ܝܠܵܗ̇ ܐܲܝܟ݂ ܣܲܡܵܐ،
ܚܲܪܝܼܦܬܵܐ ܐܲܝܟ݂ ܣܲܝܦܵܐ ܕܬܪܹܝ ܦܘܼܡܵܢܹ̈ܐ.
5ܐܲܩܠܵܬܘܼ̈ܗ̇ ܟܹܐ ܨܵܠܝܼ ܠܡܵܘܬܵܐ،
ܠܫܝܘܿܠ ܦܵܣܘܿܥܝܵܬܘܼ̈ܗ̇ ܟܹܐ ܠܲܒܠܝܼ،
6ܐܘܼܪܚܵܐ ܕܚܲܝܹ̈ܐ ܠܹܐ ܡܲܫܘܝܼܵܐ ܠܵܗ̇،
ܫܥܝܼܫܹܐ ܝܢܵܐ ܫܒ݂ܝܼܠܘܼ̈ܗ̇، ܘܠܹܐ ܝܵܕܥܵܐ.
7ܘܐܵܕܝܼܵܐ، ܒܢܘܿܢܹ̈ܐ، ܫܡܸܥܡܘܼܢ ܠܝܼ،
ܘܠܵܐ ܩܵܠܒܝܼܬܘܿܢ ܡ̣ܢ ܗܹܡܸܙܡܵܢܹ̈ܐ ܕܦܘܼܡܝܼ،
8ܡܲܪܚܸܩ ܡ̣ܢ ܠܟܸܣ ܠܘܼܗ̇ ܐܘܼܪܚܘܼܟ݂،
ܘܠܵܐ ܩܲܪܒܸܢܸܬ ܠܬܲܪܥܵܐ ܕܒܲܝܬܘܼܗ̇.
9ܠܵܐ ܗܵܘܹܐ ܕܣܲܦܹܝܬ ܠܐ݇ܚܹܪ̈݇ܢܹܐ ܚܸܩܪܘܼܟ݂،
ܘܫܸܢܘܼ̈ܟ݂ ܠܛܵܠܡܵܢܬܵܐ،
10ܠܵܐ ܗܵܘܹܐ ܕܣܵܒ݂ܥܝܼ ܢܘܼܟ݂ܪ̈ܵܝܹܐ ܒܚܲܝܠܘܼܟ݂،
ܘܓ̰ܵܦܘܼ̈ܟ݂ ܐܵܙܠ݇ܝܼ ܓܵܘ ܒܲܝܬܵܐ ܕܢܘܼܟ݂ܪܵܝܵܐ،
11ܘܬܲܢܸܚܸܬ ܒܦܪܵܩܬܵܐ ܕܚܲܝܘܼ̈ܟ݂،
ܐܝܼܡܲܢ ܕܬܵܐܹܡ ܒܸܣܪܘܼܟ݂ ܘܓܘܼܫܡܘܼܟ݂،
12ܘܐܵܡܪܹܬ، ”ܕܵܐܟ݂ܝܼ ܣܢܹܐ ܠܝܼ ܡܲܪܕܘܼܬܵܐ،
ܘܡܲܢܟܲܣܬܵܐ ܡܘܼܣܠܹܐ ܠܹܗ ܠܸܒܝܼ،
13ܘܠܵܐ ܫܡܝܼܥ ܠܝܼ ܠܩܵܠܵܐ ܕܡܲܠܦܵܢܝܼ̈،
ܘܠܬܲܠܡܸܕܵܢܝܼ̈ ܠܵܐ ܨܘܼܠܹܐ ܠܝܼ ܢܵܬܝܼ.
14ܚܲܕ݇ܟ̰ܵܐ ܦܝܵܫܵܐ ܕܗܵܘܹܝܢ ܗ݇ܘܵܐ ܒܟܠܵܗ̇ ܣܸܪܝܘܼܬܵܐ،
ܒܓܵܘܵܐ ܕܟܸܢܫܵܐ ܘܓ̰ܵܡܵܥܲܬ.“
15ܫܬܝܼ ܡ̈ܝܼܵܐ ܡ̣ܢ ܩܘܼܢܝܵܐ ܕܓܵܢܘܼܟ݂،
ܘܓ̰ܪ̈ܵܝܵܬܹܐ ܡ̣ܢ ܓܵܘ ܒܹܐܪܵܐ ܕܓܵܢܘܼܟ݂.
16ܩܵܡܘܿܕܝܼ ܬܵܦܟ݂ܝܼ ܥܲܝܢܵܬܹ̈ܐ ܕܡܝܼܘܼ̈ܟ݂ ܠܒܲܕܲܪ،
ܓܵܘ ܫܘܼܩܹ̈ܐ ܗܵܘܝܼ ܫܵܩܝܼܵܬܹ̈ܐ ܕܡ̈ܝܼܵܐ؟
17ܗܵܘܝܼ ܐܸܠܘܼܟ݂ ܒܢܲܦ̮ܫܘܼܟ݂،
ܘܠܵܐ ܫܲܪܸܟܝܼ ܢܘܼܟ݂ܪ̈ܵܝܹܐ ܥܲܡܘܼܟ݂.
18ܗܵܘܹܐ ܡܲܒܘܼܥܘܼܟ݂ ܡܒܘܼܪܟ݂ܵܐ،
ܘܚܕܝܼ ܥܲܡ ܒܲܟ݂ܬܵܐ ܕܥܠܲܝܡܘܼܬܘܼܟ݂.
19ܐܲܝܠܵܐ ܡܘܼܚܸܒܬܵܐ ܘܛܲܒ݂ܝܵܐ ܕܫܵܦܵܩܲܬ،
ܒܸܙܵܙܘܼ̈ܗ̇ ܡܲܪܘܝܼ ܠܘܼܟ݂ ܒܟܠ ܙܲܒ݂ܢܵܐ،
ܒܡܲܚܲܒܬܘܼܗ̇ ܦܲܢܦܸܠܸܬ ܐܲܡܝܼܢܵܐܝܼܬ.
20ܘܩܵܡܘܿܕܝܼ ܦܲܢܦܸܠܸܬ، ܒܪܘܿܢܝܼ، ܒܩܵܪܝܼܒܵܝܬܵܐ،
ܘܚܵܦܩܹܬ ܥܘܼܒܵܐ ܕܙܵܢܝܼܬܵܐ؟
21ܣܵܒܵܒ ܩܵܕ݇ܡ ܥܲܝܢܹ̈ܐ ܕܡܵܪܝܵܐ ܝܢܵܐ ܐܘܼܪ̈ܚܵܬܹܐ ܕܐ݇ܢܵܫܵܐ،
ܘܟܹܐ ܬܵܩܹܠ ܟܠܲܝܗܝ ܫܒ݂ܝܼܠܘܼ̈ܗܝ.
22ܒܥܵܘܠܘܼ̈ܗܝ ܒܸܬ ܦܵܐܹܫ ܕܒ݂ܝܼܩܵܐ ܪܲܫܝܼܥܵܐ،
ܘܒܚܲܒ݂ܠܹ̈ܐ ܕܚܛܝܼܬܹܗ ܒܸܬ ܦܵܐܹܫ ܟܘܼܬܠܸܢܵܐ.
23ܗ̇ܘ ܒܸܬ ܡܵܐܹܬ ܒܠܵܐ ܡܲܪܕܘܼܬܵܐ،
ܘܒܦܸܪܝܘܼܬܵܐ ܕܣܲܟ݂ܠܘܼܬܹܗ ܒܸܬ ܚܵܠܹܛ.
Currently Selected:
ܡܬܠ̈ܐ 5: ABTAB
Highlight
Share
Copy
Want to have your highlights saved across all your devices? Sign up or sign in
Aramaic Bible Translation Assyrian Bible © 2025 Aramaic Bible Translation
