ܡܬܠ̈ܐ 23
23
ܡܹܐܡܪܹ̈ܐ ܕܚܲܟܝܼܡܵܐ
1ܟܲܕ ܝܵܬܒܹܬ ܠܹܐܟ݂ܵܠܵܐ ܠܲܚܡܵܐ ܥܲܡ ܫܲܠܝܼܛܵܐ،
ܝ݇ܕܸܥ ܒܙܗܝܼܪܘܼܬܵܐ ܠܡܸܢܕܝܼ ܕܝܼܠܹܗ ܩܵܕ݇ܡܘܼܟ݂،
2ܘܡܲܬܒܸܬ ܣܟܝܼܢܬܵܐ ܠܒܵܠܘܿܥܬܘܼܟ݂،
ܐܸܢ ܪܵܒܵܐ ܐܵܟ݂ܘܿܠܵܐ ܝܘܸܬ.
3ܠܵܐ ܫܲܗܘܸܬܸܬ ܠܛܲܥܡܵܬܹ̈ܗ،
ܣܵܒܵܒ ܡܹܐܟ݂ܘܼܠܬܵܐ ܕܕܘܼܓܠܹ̈ܐ ܝܠܵܗ̇.
4ܠܵܐ ܡܲܟܟ̰ܸܚ ܓܵܢܘܼܟ݂ ܠܸܗܘܵܝܵܐ ܥܲܬܝܼܪܵܐ،
ܗܘܝܼ ܒܲܣܵܐ ܨܲܠܝܼܠܵܐ ܠܸܫܠܵܝܵܐ ܡܸܢܹܗ.
5ܟܲܕ ܡܲܬܒܸܬ ܥܲܝܢܘܼ̈ܟ݂ ܥܲܠܘܼܗܝ، ܘܠܹܐ ܦܵܐܹܫ ܩܵܬܘܼܟ݂،
ܣܵܒܵܒ ܥܘܼܬܪܵܐ ܥܒ݂ܵܕܵܐ ܟܹܐ ܥܵܒܹܕ ܐܸܠܹܗ ܓܘܼܠܦܵܢܹ̈ܐ،
ܘܟܹܐ ܦܵܪܹܚ ܐܲܝܟ݂ ܢܸܫܪܵܐ ܠܫܡܲܝܵܐ.
6ܠܵܐ ܐܵܟ݂ܠܹܬ ܠܲܚܡܵܐ ܕܥܲܝܢܹܗ ܥܝܼܩܬܵܐ،
ܘܠܵܐ ܫܲܗܘܸܬܸܬ ܠܛܲܥܡܵܬܹ̈ܗ،
7ܣܵܒܵܒ ܐܲܝܟ݂ ܡܸܙܬܵܐ ܓܵܘ ܒܵܠܘܿܥܬܵܐ، ܗܲܕܟ݂ܵܐ ܝܠܹܗ ܗ̇ܘ،
ܟܹܐ ܐܵܡܹܪ ܐܸܠܘܼܟ݂، ”ܐ݇ܟ݂ܘܿܠ ܘܫܬܝܼ!“
ܐܝܼܢܵܐ ܠܸܒܹܗ ܠܹܐ ܝܠܹܗ ܥܲܡܘܼܟ݂.
8ܬܹܟܵܐ ܕܐ݇ܟ݂ܝܼܠ ܠܘܼܟ݂ ܒܸܬ ܓܵܣܹܝܬ ܠܹܗ،
ܘܒܸܬ ܛܲܠܩܸܬ ܗܹܡܸܙܡܵܢܘܼ̈ܟ݂ ܒܲܣܝܼܡܹ̈ܐ.
9ܒܢܵܬܝܵܬܹ̈ܐ ܕܣܲܟ݂ܠܵܐ ܠܵܐ ܗܲܡܙܸܡܸܬ،
ܣܵܒܵܒ ܒܸܬ ܡܲܣܠܹܐ ܠܣܘܼܟܵܠܵܐ ܕܗܹܡܸܙܡܵܢܘܼ̈ܟ݂.
10ܠܵܐ ܡܲܓ̰ܘܸܓ̰ܸܬ ܬܚܘܼܡܵܐ ܥܲܬܝܼܩܵܐ،
ܘܒܚܲܩܠܵܢܹ̈ܐ ܕܝܵܬܘܿܡܹ̈ܐ ܠܵܐ ܥܵܒ݂ܪܹܬ.
11ܣܵܒܵܒ ܦܵܪܘܿܩܲܝܗܝ ܚܲܝܠܵܢܵܐ ܝܠܹܗ،
ܗ̇ܘ ܒܸܬ ܥܵܒܹܕ ܕܝܼܘܵܢܲܝܗܝ ܕܲܠܩܘܼܒ݂ܠܘܼܟ݂.
12ܡܲܬܸܒ݂ ܠܡܲܪܕܘܼܬܵܐ ܠܸܒܘܼܟ݂،
ܘܢܵܬܝܵܬܘܼ̈ܟ݂ ܠܗܹܡܸܙܡܵܢܹ̈ܐ ܕܝ݇ܕܲܥܬܵܐ.
13ܠܵܐ ܡܲܟܠܹܝܬ ܡ̣ܢ ܝܵܠܵܕ݇ܐ ܬܲܥܠܲܡܬܵܐ،
ܟܲܕ ܡܲܚܹܝܬ ܠܹܗ ܒܩܲܛܝܼܥܵܐ، ܠܹܐ ܡܵܐܹܬ.
14ܐܲܢ݇ܬ ܒܩܲܛܝܼܥܵܐ ܡܲܚܹܝܬ ܠܹܗ،
ܓܵܢܹܗ ܡ̣ܢ ܫܝܘܿܠ ܒܸܬ ܦܲܨܹܝܬ.
15ܒܪܘܿܢܝܼ، ܐܸܢ ܚܲܟܝܼܡܵܐ ܝܠܹܗ ܠܸܒܘܼܟ݂،
ܐܘܼܦ ܠܸܒܵܐ ܕܝܼܝܼ ܒܸܬ ܚܵܕܹܐ.
16ܘܒܸܬ ܦܵܨܚܵܐ ܓܵܢܝܼ،
ܟܲܕ ܗܲܡܙܸܡܝܼ ܣܸܦܘܵܬܘܼ̈ܟ݂ ܚܲܒܪܹ̈ܐ ܬܪ̈ܘܼܨܹܐ.
17ܠܵܐ ܒܲܚܸܠ ܠܸܒܘܼܟ݂ ܒܚܲܛܵܝܹ̈ܐ،
ܐܸܠܵܐ ܗܵܘܹܐ ܛܲܢܵܢܵܐ ܠܙܕܘܼܥܬܵܐ ܕܡܵܪܝܵܐ ܟܠܹܗ ܝܵܘܡܵܐ.
18ܣܵܒܵܒ ܗܲܪ ܐܝܼܬ ܚܲܕ ܕܲܥܬܝܼܕ،
ܘܣܲܒ݂ܪܘܼܟ݂ ܠܹܐ ܦܵܐܹܫ ܩܛܝܼܥܵܐ.
19ܫܡܸܥ ܐܲܢ݇ܬ، ܒܪܘܿܢܝܼ، ܘܗܘܝܼ ܚܲܟܝܼܡܵܐ،
ܘܡܗܲܕܝܼ ܠܸܒܘܼܟ݂ ܒܐܘܼܪܚܵܐ ܬܪܘܼܨܬܵܐ.
20ܠܵܐ ܗܵܘܹܝܬ ܒܓܵܘܵܐ ܕܫܵܬܝܵܢܹ̈ܐ ܕܚܲܡܪܵܐ،
ܒܓܵܘܵܐ ܕܒܵܠܘܿܥܵܢܹ̈ܐ ܐܵܟ݂ܠܵܢܹ̈ܐ ܕܒܸܣܪܵܐ.
21ܣܵܒܵܒ ܪܵܘܵܝܵܐ ܘܒܵܠܘܿܥܵܢܵܐ ܒܸܬ ܦܵܝܫܝܼ ܣܢܝܼܩܹ̈ܐ،
ܘܟ̰ܸܢܓܸܪܹ̈ܐ ܒܸܬ ܡܲܠܒܸܫܵܐ ܢܝܵܡܬܵܐ.
22ܫܡܸܥ ܠܒܵܒܘܼܟ݂ ܕܩܲܡ ܡܲܠܸܕ ܠܘܼܟ݂،
ܘܠܵܐ ܡܲܣܠܹܝܬ ܠܝܸܡܘܼܟ݂ ܐܝܼܡܲܢ ܕܣܵܝܒ݂ܵܐ.
23ܫܪܵܪܵܐ ܩܢܝܼ، ܘܠܵܐ ܙܲܒܢܸܬ،
ܐܘܼܦ ܚܸܟ݂ܡܬܵܐ، ܘܡܲܪܕܘܼܬܵܐ، ܘܦܲܪܡܵܝܬܵܐ.
24ܦܨܵܚܵܐ ܒܸܬ ܦܵܨܹܚ ܒܵܒܵܐ ܕܙܲܕܝܼܩܵܐ،
ܘܗ̇ܘ ܕܡܲܠܸܕ ܚܲܟܝܼܡܵܐ ܒܸܬ ܚܵܕܹܐ ܒܝܼܹܗ.
25ܚܵܕܝܼ ܒܵܒܘܼܟ݂ ܘܝܸܡܘܼܟ݂،
ܘܦܵܨܚܵܐ ܗ̇ܝ ܕܩܲܡ ܝܵܠܕܵܐ ܠܘܼܟ݂.
26ܗܲܒ݂݇ܠ، ܒܪܘܿܢܝܼ، ܠܸܒܘܼܟ݂ ܐܸܠܝܼ،
ܘܥܲܝܢܘܼ̈ܟ݂ ܐܘܼܪ̈ܚܵܬܝܼ ܢܵܛܪܝܼ.
27ܣܵܒܵܒ ܓܘܼܒܵܐ ܥܲܡܘܼܩܵܐ ܝܠܵܗ̇ ܙܵܢܝܼܬܵܐ،
ܘܒܹܐܪܵܐ ܥܝܼܩܵܐ ܢܘܼܟ݂ܪܵܝܬܵܐ.
28ܐܘܼܦ ܗ̇ܝ ܐܲܝܟ݂ ܕܠܨܲܝܕܵܐ ܟܹܐ ܝܵܬܒ݂ܵܐ ܒܟܡܹܐܢܵܐ،
ܘܚܵܝܝܼܢܹ̈ܐ ܓܵܘ ܒܢܲܝ̈ ܐ݇ܢܵܫܵܐ ܟܹܐ ܡܲܙܝܸܕܵܐ.
29ܠܡܵܢܝܼ ܐܘܿܝ؟ ܠܡܵܢܝܼ ܐܵܚܹ̈ܐ ܘܐܘܿܚܹ̈ܐ؟ ܠܡܵܢܝܼ ܕܲܥܘܝܼܹ̈ܐ؟
ܠܡܵܢܝܼ ܩܒ݂ܵܠܬܵܐ؟ ܠܡܵܢܝܼ ܕܲܪ̈ܒܵܬܹܐ ܕܠܵܐ ܥܸܠܬܵܐ؟
ܠܡܵܢܝܼ ܝܲܩܘܼܪܘܼܬܵܐ ܕܥܲܝܢܹ̈ܐ؟
30ܠܐܵܢܝܼ ܕܥܲܪܩܸܠܝܼ ܒܚܲܡܪܵܐ،
ܠܐܵܢܝܼ ܕܐܵܬܝܼ ܠܸܛܥܵܝܵܐ ܚܲܡܪܵܐ ܡܙܝܼܓ݂ܵܐ.
31ܠܵܐ ܓܲܫܩܸܬ ܥܲܠ ܚܲܡܪܵܐ ܟܲܕ ܝܼܠܹܗ ܣܡܘܿܩܵܐ،
ܟܲܕ ܒܲܠܒܸܣ ܒܟܵܣܵܐ،
ܟܲܕ ܨܵܠܹܐ ܪܵܗܲܬ.
32ܚܲܪܬܹܗ ܐܲܝܟ݂ ܚܘܼܘܹܐ ܟܹܐ ܢܵܐܹܨ،
ܘܐܲܝܟ݂ ܚܘܼܘܹܐ ܚܲܪܡܵܢܵܐ ܟܹܐ ܕܵܪܹܐ ܣܲܡܵܐ.
33ܥܲܝܢܘܼ̈ܟ݂ ܒܸܬ ܚܵܙܝܼ ܡܸܢܕܝܼܵܢܹ̈ܐ ܩܵܪ̈ܝܼܒܵܝܹܐ،
ܘܠܸܒܘܼܟ݂ ܒܸܬ ܗܲܡܙܸܡ ܦܟ̰ܝܼܠܘܼܝܵܬܹ̈ܐ.
34ܘܒܸܬ ܗܵܘܹܝܬ ܐܲܝܟ݂ ܗ̇ܘ ܕܕܵܡܹܟ݂ ܒܠܸܒܵܐ ܕܝܵܡܵܐ،
ܘܐܲܝܟ݂ ܗ̇ܘ ܕܕܵܡܹܟ݂ ܒܪܹܫܵܐ ܕܣܛܘܼܢܵܐ ܕܩܘܼܢܒܵܐ.
35ܘܒܸܬ ܐܵܡܪܹܬ، ”ܩܲܡ ܡܵܚܝܼ ܠܝܼ، ܐܝܼܢܵܐ ܠܵܐ ܡܪܝܼܥ ܠܝܼ،
ܩܲܡ ܛܵܪܦܝܼ ܠܝܼ، ܐܝܼܢܵܐ ܠܵܐ ܝ݇ܕܝܼܥ ܠܝܼ.
ܐܝܼܡܲܢ ܒܸܬ ܪܵܥܫܹܢ؟ ܒܸܬ ܡܲܙܝܸܕܸܢ ܠܸܛܥܵܝܵܐ ܒܵܬ݇ܪ ܫܬܵܝܬܵܐ ܡܸܢܕܪܸܫ.“
Currently Selected:
ܡܬܠ̈ܐ 23: ABTAB
Highlight
Share
Copy
Want to have your highlights saved across all your devices? Sign up or sign in
Aramaic Bible Translation Assyrian Bible © 2025 Aramaic Bible Translation
