ܡܬܠ̈ܐ 2
2
ܦܘܼܪܥܵܢܵܐ ܕܚܸܟ݂ܡܬܵܐ
1ܒܪܘܿܢܝܼ، ܐܸܢ ܩܲܒܠܸܬ ܗܹܡܸܙܡܵܢܝܼ̈،
ܘܦܘܼܩܕܵܢܝܼ̈ ܛܲܫܹܝܬ ܠܟܸܣ ܠܘܼܟ݂،
2ܠܨܲܠܘܼܝܹܐ ܠܚܸܟ݂ܡܬܵܐ ܢܵܬܘܼܟ݂،
ܡܲܦܬܸܠܸܬ ܠܸܒܘܼܟ݂ ܠܦܲܪܡܵܝܬܵܐ،
3ܘܐܸܢ ܠܝ݇ܕܲܥܬܵܐ ܩܵܪܹܝܬ،
ܠܦܲܪܡܵܝܬܵܐ ܝܵܗ݇ܒܹܬ ܩܵܠܘܼܟ݂،
4ܐܸܢ ܛܵܥܹܝܬ ܐܸܠܘܼܗ̇ ܐܲܝܟ݂ ܣܹܐܡܵܐ،
ܘܐܲܝܟ݂ ܣܝܼܡܵܬܹ̈ܐ ܛܸܫܝܹ̈ܐ ܨܲܚܨܹܝܬ ܐܸܠܘܼܗ̇،
5ܗ̇ܝܓܵܗ ܒܸܬ ܦܲܪܡܹܝܬ ܙܕܘܼܥܬܵܐ ܕܡܵܪܝܵܐ،
ܘܝ݇ܕܲܥܬܵܐ ܕܐܲܠܵܗܵܐ ܒܸܬ ܡܲܫ݇ܟ̰ܚܸܬ.
6ܣܵܒܵܒ ܡܵܪܝܵܐ ܟܹܐ ܝܲܗ݇ܒܸܠ ܚܸܟ݂ܡܬܵܐ،
ܡ̣ܢ ܦܘܼܡܹܗ ܝ݇ܕܲܥܬܵܐ ܘܦܲܪܡܵܝܬܵܐ،
7ܘܟܹܐ ܛܲܫܹܐ ܩܵܐ ܬܪ̈ܘܼܨܹܐ ܗܵܘܢܵܐ،
ܡܵܛܵܠܵܐ ܝܠܹܗ ܩܵܐ ܚܵܕܪ̈ܵܢܹܐ ܒܬܲܡܝܼܡܘܼܬܵܐ،
8ܠܚܲܡܘܼܝܹܐ ܐܘܼܪ̈ܚܵܬܹܐ ܕܕܝܼܘܵܢ،
ܘܐܘܼܪܚܵܐ ܕܙܲܕܝܼܩܘܼ̈ܗܝ ܟܹܐ ܢܵܛܹܪ.
9ܗ̇ܝܓܵܗ ܒܸܬ ܦܲܪܡܹܝܬ ܙܲܕܝܼܩܘܼܬܵܐ ܘܕܝܼܘܵܢ
ܘܬܪܘܼܨܘܼܬܵܐ، ܟܠ ܚܲܕ ܫܒ݂ܝܼܠܵܐ ܨܦܵܝܝܼ.
10ܣܵܒܵܒ ܒܸܬ ܥܵܒ݂ܪܵܐ ܚܸܟ݂ܡܬܵܐ ܒܠܸܒܘܼܟ݂.
ܘܝ݇ܕܲܥܬܵܐ ܠܓܵܢܘܼܟ݂ ܒܸܬ ܗܵܘܝܵܐ ܒܲܣܝܼܡܬܵܐ،
11ܬܲܚܡܲܢܬܵܐ ܒܸܬ ܢܵܛܪܵܐ ܠܘܼܟ݂،
ܦܲܪܡܵܝܬܵܐ ܒܸܬ ܚܲܡܝܵܐ ܠܘܼܟ݂،
12ܠܦܲܨܘܼܝܘܼܟ݂ ܡ̣ܢ ܐܘܼܪܚܵܐ ܒܝܼܫܬܵܐ،
ܡ̣ܢ ܐ݇ܢܵܫܹ̈ܐ ܗܲܡܙܸܡܵܢܹ̈ܐ ܕܦܸܠܡܹ̈ܐ،
13ܕܟܹܐ ܫܵܒ݂ܩܝܼ ܐܘܼܪ̈ܚܵܬܹܐ ܕܬܪܘܼܨܘܼܬܵܐ،
ܠܹܐܙܵܠܵܐ ܒܐܘܼܪ̈ܚܵܬܹܐ ܕܚܸܫܟܵܐ،
14ܕܟܹܐ ܚܵܕܝܼ ܠܸܥܒ݂ܵܕܵܐ ܒܝܼܫܘܼܬܵܐ،
ܘܟܹܐ ܦܵܨܚܝܼ ܒܦܸܠܡܹ̈ܐ ܕܒܝܼܫܬܵܐ،
15ܐܵܢܝܼ ܕܐܘܼܪ̈ܚܵܬܲܝܗܝ ܦܟ̰ܝܼܠܹܐ ܝܢܵܐ،
ܘܦܵܬܠܵܢܹ̈ܐ ܝܢܵܐ ܒܫܒ݂ܝܼܠܲܝ̈ܗܝ،
16ܠܦܲܨܘܼܝܘܼܟ݂ ܡ̣ܢ ܒܲܟ݂ܬܵܐ ܓܲܝܵܪܬܵܐ،
ܡ̣ܢ ܢܘܼܟ݂ܪܵܝܬܵܐ ܕܟܹܐ ܡܲܟ̰ܸܥܝܵܐ ܗܹܡܸܙܡܵܢܘܼ̈ܗ̇،
17ܕܟܹܐ ܫܵܒ݂ܩܵܐ ܒܲܪ ܙܵܘܓܵܐ ܕܥܠܲܝܡܘܼܬܘܼܗ̇،
ܘܘܲܥܕܵܐ ܕܐܲܠܵܗܘܼܗ̇ ܟܹܐ ܢܵܫܝܵܐ،
18ܣܵܒܵܒ ܟܹܐ ܓܵܢܹܐ ܠܡܵܘܬܵܐ ܒܲܝܬܘܼܗ̇،
ܘܠܟܸܣ ܪ̈ܘܼܚܵܬܹܐ ܕܡܝܼܬܹ̈ܐ ܫܒ݂ܝܼܠܘܼ̈ܗ̇،
19ܟܠܲܝܗܝ ܥܵܒ݂ܪ̈ܵܢܹܐ ܠܟܸܣ ܠܘܼܗ̇ ܠܹܐ ܕܵܝܪܝܼ،
ܘܠܹܐ ܡܵܛܝܼ ܠܐܘܼܪ̈ܚܵܬܹܐ ܕܚܲܝܹ̈ܐ.
20ܗܲܕܟ݂ܵܐ، ܚܵܕܪܹܬ ܒܐܘܼܪܚܵܐ ܕܛܵܒܹ̈ܐ،
ܘܐܘܼܪ̈ܚܵܬܹܐ ܕܙܲܕܝܼܩܹ̈ܐ ܢܵܛܪܹܬ،
21ܣܵܒܵܒ ܬܪ̈ܘܼܨܹܐ ܒܸܬ ܫܵܪܝܼ ܒܐܲܪܥܵܐ،
ܘܬܲܡܝܼܡܹ̈ܐ ܒܸܬ ܦܵܝܫܝܼ ܓܵܘܘܼܗ̇،
22ܐܝܼܢܵܐ ܒܝܼܫܹ̈ܐ ܡ̣ܢ ܐܲܪܥܵܐ ܒܸܬ ܦܵܝܫܝܼ ܩܛܝܼܥܹܐ،
ܘܚܵܝܝܼܢܹ̈ܐ ܒܸܬ ܦܵܝܫܝܼ ܢܟ̰ܝܼܠܹܐ ܡܸܢܘܼܗ̇.
Currently Selected:
ܡܬܠ̈ܐ 2: ABTAB
Highlight
Share
Copy
Want to have your highlights saved across all your devices? Sign up or sign in
Aramaic Bible Translation Assyrian Bible © 2025 Aramaic Bible Translation
