ܒܪܝܬܐ 49
49
ܝܲܥܩܘܿܒ݂ ܓ̰ܲܡܘܼܥܹܐ ܒܢܘܿܢܘܼ̈ܗܝ ܠܟܸܣ ܠܹܗ
1ܩܪܹܐ ܠܹܗ ܝܲܥܩܘܿܒ݂ ܠܒܢܘܿܢܘܼ̈ܗܝ ܘܐ݇ܡܝܼܪܹܗ ܐܸܠܲܝܗܝ، ”ܓ̰ܡܸܥܡܘܼܢ ܠܸܚܕܵܕܹ̈ܐ ܕܡܲܕܥܸܢܵܘܟ݂ܘܿܢ ܡܘܿܕܝܼ ܒܸܬ ܩܲܘܸܡ ܥܲܠܵܘܟ݂ܘܿܢ ܒܝܵܘܡܵܢܹ̈ܐ ܕܐܵܬܝܼ.
2ܟܦܘܿܫܘܼܢ ܘܫܡܸܥܡܘܼܢ، ܝܵܐ ܒܢܘܿܢܹ̈ܐ ܕܝܲܥܩܘܿܒ݂،
ܘܫܡܸܥܡܘܼܢ ܠܝܲܥܩܘܿܒ݂ ܒܵܒܵܘܟ݂ܘܿܢ.
3ܪܐܘܼܒܸܢ، ܐܲܢ݇ܬ ܒܘܼܟ݂ܪܝܼ ܝܘܸܬ،
ܚܲܝܠܝܼ، ܘܪܹܫ ܥܘܼܫܢܝܼ،
ܥܲܬܝܼܪܵܐ ܒܢܲܨܝܼܚܘܼܬܵܐ،
ܘܪܵܒܵܐ ܡܵܪܹܐ ܚܲܝܠܵܐ.
4ܫܥܝܼܫܵܐ ܐܲܝܟ݂ ܡ̈ܝܼܵܐ،
ܠܵܐ ܙܵܝܕܵܐ ܡܝܲܬܪܘܼܬܘܼܟ݂،
ܣܵܒܵܒ ܐ݇ܣܝܼܩ ܠܘܼܟ݂ ܥܲܠ ܡܲܕܡܟ݂ܵܐ ܕܒܵܒܘܼܟ݂،
ܘܫܚܝܼܡܵܐ ܠܘܼܟ݂؛
ܐ݇ܣܝܼܩ ܠܘܼܟ݂ ܥܲܠ ܫܘܝܼܬܝܼ.
5ܫܸܡܥܘܿܢ ܘܠܹܘܝܼ ܐܲܚܘܿܢܘܵܬܹ̈ܐ ܝܢܵܐ؛
ܣܲܝܦܲܝ̈ܗܝ ܙܲܝܢܹ̈ܐ ܕܚܸܡܬܵܐ.
6ܠܡܵܘܬܒܲܝ̈ܗܝ ܠܵܐ ܩܲܪܒܸܢܲܬܝ، ܝܵܐ ܓܵܢܝܼ؛
ܠܟܢܘܼܫܝܵܬܲܝ̈ܗܝ ܠܵܐ ܥܵܒ݂ܪܲܬܝ، ܝܵܐ ܪܘܼܚܝܼ؛
ܣܵܒܵܒ ܓܵܘ ܚܸܡܬܲܝܗܝ ܩܛܝܼܠ ܠܗܘܿܢ ܐ݇ܢܵܫܹ̈ܐ،
ܘܩܵܐ ܒܘܼܣܵܡܵܐ ܦܪܝܼܡ ܠܗܘܿܢ ܦܲܝܵܢܹ̈ܐ ܕܬܵܘܪܹ̈ܐ.
7ܠܝܼܛܬܵܐ ܝܠܵܗ̇ ܚܸܡܬܲܝܗܝ ܕܝܼܠܵܗ̇ ܙܲܪܒܵܢܬܵܐ؛
ܘܟܲܪܒܲܝܗܝ ܕܝܼܠܵܗ̇ ܩܫܝܼܬܵܐ.
ܒܸܬ ܒܵܙܩܹܢܗܘܿܢ ܓܵܘ ܝܲܥܩܘܿܒ݂،
ܘܒܲܪܒܸܙܸܢܗܘܿܢ ܓܵܘ ܝܼܣܪܵܝܹܠ.
8ܝܼܗܘܼܕܵܐ،#49:8 ܫܸܡܵܐ ܕܝܼܗܘܼܕܵܐ ܩܵܠܹܗ ܒܸܕܡܵܝܵܐ ܝܠܹܗ ܠܚܲܒܪܵܐ ܕܫܵܟܲܪܬܵܐ ܒܠܸܫܵܢܵܐ ܥܸܒ݂ܪܵܝܵܐ ܐܲܢ݇ܬ ܒܸܬ ܫܲܟܪܝܼ ܠܘܼܟ݂ ܐܲܚܘܿܢܘܵܬܘܼ̈ܟ݂؛
ܐܝܼܕܘܼܟ݂ ܒܸܬ ܗܵܘܝܵܐ ܥܲܠ ܩܕܵܠܵܐ ܕܕܸܫܡܸܢܘܼ̈ܟ݂؛
ܒܢܘܿܢܹ̈ܐ ܕܒܵܒܘܼܟ݂ ܒܸܬ ܡܲܟܸܦܝܼ ܓܵܢܲܝܗܝ ܐܸܠܘܼܟ݂.
9ܓܘܼܪܝܵܐ ܕܐܲܪܝܵܐ ܝܠܹܗ ܝܼܗܘܼܕܵܐ؛
ܡ̣ܢ ܨܲܝܕܵܐ ܕܝܼܪܘܼܟ݂، ܒܪܘܿܢܝܼ.
ܒܪܝܼܟ ܠܹܗ، ܕܡܝܼܟ݂ ܠܹܗ ܐܲܝܟ݂ ܐܲܪܝܵܐ،
ܘܐܲܝܟ݂ ܐܲܪܝܝܼܬܵܐ؛ ܡܵܢܝܼ ܒܸܬ ܡܲܩܸܡ ܠܹܗ؟
10ܠܹܐ ܥܵܒܹܪ ܩܲܛܝܼܥܵܐ ܡ̣ܢ ܝܼܗܘܼܕܵܐ،
ܘܠܵܐ ܚܘܼܛܪܵܐ ܡ̣ܢ ܒܹܝܠ ܐܲܩܠܵܬܹ̈ܗ،
ܗܲܠ ܕܐܵܬܹܐ ܫܝܼܠܘܿܗ،
ܘܐܸܠܹܗ ܡܲܨܝܸܬܝܼ ܥܲܡܡܹ̈ܐ.
11ܓ̰ܲܥܫܹܗ ܟܹܐ ܐܵܣܹܪ ܒܓܸܦܬܵܐ،
ܘܟܘܼܪܪܵܐ ܕܚܡܵܪܬܹܗ ܒܓܸܦܬܵܐ ܓܘܼܒܝܼܬܵܐ.
ܟܹܐ ܚܲܠܸܠ ܠܒ݂ܝܼܫܬܹܗ ܒܚܲܡܪܵܐ،
ܘܓ̰ܘܼܠܘܼ̈ܗܝ ܒܕܸܡܵܐ ܕܥܲܢܒܹ̈ܐ.
12ܣܡܘܿܩܹ̈ܐ ܥܲܝܢܘܼ̈ܗܝ ܒܸܬ ܗܵܘܝܼ ܡ̣ܢ ܚܲܡܪܵܐ،
ܘܚܘܵܪܹ̈ܐ ܟܹܟܘܼ̈ܗܝ ܡ̣ܢ ܚܲܠܒ݂ܵܐ.
13ܙܒ݂ܘܿܠܘܿܢ ܒܸܬ ܫܵܪܹܐ ܒܡܲܪܙܵܐ ܕܝܵܡܵܐ،
ܘܒܸܬ ܗܵܘܹܐ ܒܹܝܬ ܡܲܫܪܝܵܐ ܠܓܵܡܝܼܹ̈ܐ؛
ܘܬܚܘܼܡܘܼ̈ܗܝ ܒܸܬ ܡܵܛܝܼ ܗܲܠ ܨܲܝܕܘܿܢ.
14ܐܝܼܣܵܟ݂ܵܪ ܚܡܵܪܵܐ ܚܲܝܠܵܢܵܐ ܝܠܹܗ،
ܕܡܝܼܟ݂ܵܐ ܒܹܝܠ ܣܲܪ̈ܓܹܐ.
15ܚܙܹܐ ܠܹܗ ܨܦܵܝܝܼ ܝܗ݇ܘܵܐ ܕܘܼܟܵܐ ܕܢܝܵܚܵܐ،
ܘܒܲܣܝܼܡܬܵܐ ܝܗ݇ܘܵܐ ܐܲܪܥܵܐ؛
ܗܲܕܟ݂ܵܐ ܡܘܼܟܸܦ ܠܹܗ ܪܘܼܦ̮ܫܹܗ ܠܸܛܥܵܢܵܐ،
ܘܗܘܹܐ ܠܹܗ ܥܲܒ݂ܕܵܐ ܕܫܘܼܚܪܵܐ.
16ܕܵܢ#49:16 ܥܸܒ݂ܪܵܐܝܼܬ ܒܡܲܥܢܵܝܵܐ: ܕܝܵܢܬܵܐ ܒܸܬ ܕܵܐܹܢ ܠܥܲܡܹܗ ܐܲܝܟ݂ ܚܲܕ ܡ̣ܢ ܫܲܒ݂ܛܹ̈ܐ ܕܝܼܣܪܵܝܹܠ.
17ܒܸܬ ܗܵܘܹܐ ܕܵܢ ܚܘܼܘܹܐ ܥܲܠ ܐܘܼܪܚܵܐ،
ܐܵܟܸܕܢܵܐ ܥܲܠ ܫܒ݂ܝܼܠܵܐ،
ܕܢܵܐܹܨ ܥܸܩܒܵܬܹ̈ܐ ܕܣܘܼܣܹܐ،
ܗܵܕܵܐ ܕܢܵܦܹܠ ܪܲܟܵܒܹܗ ܠܒܵܬ݇ܪܵܐ.
18ܠܦܘܼܪܩܵܢܘܼܟ݂ ܒܸܣܦܵܪܵܐ ܝܘܸܢ، ܝܵܐ ܡܵܪܝܵܐ.
19ܒܸܬ ܦܵܐܹܫ ܡܸܚܝܵܐ ܓܵܕ#49:19 ܥܸܒ݂ܪܵܐܝܼܬ ܒܡܲܥܢܵܝܵܐ: ܓܲܝܣܵܐ. ܘܫܸܡܵܐ ܕܓܵܕ ܩܵܠܹܗ ܒܸܕܡܵܝܵܐ ܝܠܹܗ ܠܚܲܒܪܵܐ ܕܓܲܝܣܵܐ ܒܠܸܫܵܢܵܐ ܥܸܒ݂ܪܵܝܵܐ ܒܓܲܝܵܣܹ̈ܐ،
ܐܝܼܢܵܐ ܗ̇ܘ ܒܸܬ ܡܵܚܹܐ ܠܥܸܩܒܲܝܗܝ.
20ܒܸܬ ܗܵܘܹܐ ܠܹܗ ܐܵܫܹܝܪ ܡܹܐܟ݂ܘܼܠܬܵܐ ܦܪܝܼܬܵܐ،
ܘܬܘܼܪܣܵܝܵܐ ܒܲܣܝܼܡܵܐ ܒܸܬ ܝܲܗ݇ܒܸܠ ܠܡܲܠܟܹ̈ܐ.
21ܢܲܦ̮ܬܵܠܝܼ ܓܲܙܵܠܵܐ ܫܪܝܼܬܵܐ ܝܠܹܗ،
ܕܟܹܐ ܗܲܨܠܵܐ ܙܲܥܝܹ̈ܐ ܫܲܦܝܼܪܹ̈ܐ.
22ܦܲܥܘܵܐ ܝܵܗ݇ܒ݂ܵܢܵܐ ܕܛܥܘܼܢܬܵܐ ܝܠܹܗ ܝܵܘܣܸܦ،
ܦܲܥܘܵܐ ܕܝܲܗ݇ܒܸܠ ܛܥܘܼܢܬܵܐ ܒܕܸܦܢܵܐ ܕܥܲܝܢܵܐ؛
ܨܸܒܥܵܬܹ̈ܗ ܒܹܐܣܵܩܵܐ ܒܫܘܼܪܵܐ.
23ܡܲܪܝܼܪܘܼܬܵܐ ܐܸܠܹܗ ܕܵܪ̈ܝܵܢܹܐ ܕܓܹܐܪܹ̈ܐ،
ܘܕܪܹܐ ܠܗܘܿܢ ܓܹܐܪܹ̈ܐ ܒܝܼܹܗ ܘܡܘܼܥܝܸܩ ܠܗܘܿܢ ܐܸܠܹܗ؛
24ܐܝܼܢܵܐ ܟܠܹܐ ܠܵܗ̇ ܡܬܝܼܚܬܵܐ ܩܸܫܬܹܗ،
ܘܦܝܼܫ ܠܗܘܿܢ ܚܘܼܠܸܢܹܐ ܕܪ̈ܲܥܢܵܢܘܼܗܝ ܒܝܲܕ ܚܲܝܠܬܵܢܵܐ ܕܝܲܥܩܘܿܒ݂،
ܒܫܸܡܵܐ ܕܪܵܥܝܵܐ، ܩܵܝܵܐ ܕܝܼܣܪܵܝܹܠ.
25ܐܲܠܵܗܵܐ ܕܒܵܒܘܼܟ݂، ܗ̇ܘ ܒܸܬ ܗܲܝܸܪܘܼܟ݂؛
ܐܹܝܠ ܫܲܕܲܝ، ܗ̇ܘ ܒܸܬ ܒܲܪܸܟ݂ ܠܘܼܟ݂
ܒܝܲܕ ܒܘܼܪ̈ܟܵܬܹܐ ܕܫܡܲܝܵܐ ܡ̣ܢ ܠܥܸܠܸܠ،
ܘܒܝܲܕ ܒܘܼܪ̈ܟܵܬܹܐ ܕܥܘܼܡܩܵܐ ܡ̣ܢ ܠܠܬܸܚܬ،
ܘܒܝܲܕ ܒܘܼܪ̈ܟܵܬܹܐ ܕܒܸܙܵܙܹ̈ܐ ܘܕܡܲܪܒܥܵܐ.
26ܒܘܼܪ̈ܟܵܬܹܐ ܕܒܵܒܘܼܟ݂ ܒܘܼܫ ܙܝܼܕ ܠܗܘܿܢ ܡ̣ܢ ܒܘܼܪ̈ܟܵܬܹܐ ܕܐܲܒ݂ܵܗܵܬܝܼ̈،
ܡܛܹܐ ܠܗܘܿܢ ܠܬܚܘܼܡܹ̈ܐ ܕܪ̈ܘܼܡܝܵܬܹܐ ܥܵܠܡܝܼܢܵܝܹ̈ܐ.
ܐܲܢܹܐ ܒܸܬ ܗܵܘܝܼ ܥܲܠ ܪܹܫܵܐ ܕܝܵܘܣܸܦ،
ܥܲܠ ܩܸܨܵܐ ܕܗ̇ܘ ܕܝܼܠܹܗ ܢܙܝܼܪܵܐ ܓܵܘ ܐܲܚܘܿܢܘܵܬܹ̈ܗ.
27ܕܹܐܒ݂ܵܐ ܦܵܪܘܿܛܵܐ ܝܠܹܗ ܒܸܢܝܵܡܹܝܢ؛
ܒܨܲܦܪܵܐ ܟܹܐ ܐܵܟܹܠ ܨܲܝܕܵܐ،
ܘܒܪܲܡܫܵܐ ܟܹܐ ܦܲܠܸܥ ܣܠܵܒܵܐ.“
28ܐܲܢܹܐ ܝܢܵܐ ܟܠܲܝܗܝ ܬܪܸܥܣܲܪ ܫܲܒ݂ܛܹ̈ܐ ܕܝܼܣܪܵܝܹܠ؛ ܘܗܲܕܟ݂ܵܐ ܐ݇ܡܝܼܪܹܗ ܐܸܠܲܝܗܝ ܒܵܒܲܝܗܝ ܐܝܼܡܲܢ ܕܒܘܼܪܟܲܝ ܠܹܗ. ܒܘܼܪܸܟ݂ ܠܹܗ ܠܟܠ ܚܲܕ ܐܲܝܟ݂ ܕܝܼܗ݇ܘܵܐ ܠܚܝܼܡܵܐ ܠܒܘܼܪܟܬܵܐ.
ܡܵܘܬܵܐ ܕܝܲܥܩܘܿܒ݂
29ܗ̇ܝܓܵܗ ܦܩܝܼܕܲܝ ܠܹܗ ܒܹܐܡܵܪܵܐ ܐܸܠܲܝܗܝ، ”ܐܵܢܵܐ ܦܝܵܫܵܐ ܝܘܸܢ ܩܒ݂ܝܼܪܵܐ ܕܸܦܢܵܐ ܕܥܲܡܝܼ؛ ܩܒ݂ܘܿܪܘܼܢ ܠܝܼ ܠܟܸܣ ܒܵܒܵܘܵܬܝܼ̈، ܒܓܸܦܝܼܬܵܐ ܕܝܼܠܵܗ̇ ܓܵܘ ܚܲܩܠܵܐ ܕܥܸܦܪܘܿܢ ܚܹܝܬܵܝܵܐ، 30ܗ̇ܝ ܕܝܼܠܵܗ̇ ܒܚܲܩܠܵܐ ܕܡܲܟ݂ܦܹܠܵܐ ܠܡܲܕܢܚܵܐ ܕܡܲܡܪܹܐ ܒܐܲܪܥܵܐ ܕܟܢܲܥܢ، ܗ̇ܝ ܕܙܒ݂ܝܼܢܵܐ ܠܹܗ ܐܲܒ݂ܪܵܗܵܡ ܥܲܡ ܚܲܩܠܵܐ ܡ̣ܢ ܥܸܦܪܘܿܢ ܚܹܝܬܵܝܵܐ، ܐܲܝܟ݂ ܐܲܪܥܵܐ ܕܒܹܝܬ ܩܒ݂ܘܼܪܵܐ. 31ܬܵܡܵܐ ܩܒ݂ܝܼܪܗܘܿܢ ܠܐܲܒ݂ܪܵܗܵܡ ܘܠܣܲܪܵܐ ܒܲܟ݂ܬܹܗ؛ ܬܵܡܵܐ ܩܒ݂ܝܼܪܗܘܿܢ ܠܐܝܼܣܚܵܩ ܘܠܪܲܦܩܵܐ ܒܲܟ݂ܬܹܗ؛ ܘܬܵܡܵܐ ܩܒ݂ܝܼܪܝܼ ܐܵܢܵܐ ܠܠܲܝܵܐ. 32ܗ̇ܝ ܚܲܩܠܵܐ ܥܲܡ ܓܸܦܝܼܬܵܐ ܕܒܓܵܘܘܼܗ̇ ܦܝܼܫܹܐ ܝܗ݇ܘܵܘ ܙܒ݂ܝܼܢܹܐ ܡ̣ܢ ܒܢܲܝ̈ ܚܹܝܬ.“ 33ܐܝܼܡܲܢ ܕܦܪܝܼܩ ܠܹܗ ܝܲܥܩܘܿܒ݂ ܡ̣ܢ ܠܸܦܩܵܕܵܐ ܠܒܢܘܿܢܘܼ̈ܗܝ، ܓ̰ܘܼܡܸܥ ܠܹܗ ܐܲܩܠܵܬܹ̈ܗ ܒܫܘܝܼܬܵܐ ܘܣܘܼܦܝܵܐ ܠܹܗ ܪܘܼܚܹܗ، ܘܦܝܼܫ ܠܹܗ ܩܒ݂ܝܼܪܵܐ ܕܸܦܢܵܐ ܕܥܲܡܹܗ.
Currently Selected:
ܒܪܝܬܐ 49: ABTAB
Highlight
Copy
Compare
Share
Want to have your highlights saved across all your devices? Sign up or sign in
Aramaic Bible Translation Assyrian Bible © 2025 Aramaic Bible Translation
