ܩܘܗܠܬ 8

1ܡܵܢܝܼ ܝܠܹܗ ܐܲܝܟ݂ ܚܲܟܝܼܡܵܐ؟ ܘܡܵܢܝܼ ܟܹܐ ܝܵܕܹܥ ܦܘܼܫܵܩܵܐ ܕܚܲܒܪܵܐ؟ ܚܸܟ݂ܡܬܵܐ ܕܐ݇ܢܵܫܵܐ ܟܹܐ ܒܲܗܪܸܢܵܐ ܦܵܬܹܗ، ܘܩܸܘܝܘܼܬܵܐ ܕܦܵܬܹܗ ܟܹܐ ܦܵܝܫܵܐ ܫܘܼܚܠܸܦܬܵܐ.

ܒܘܼܬ ܫܘܼܠܛܵܢܵܐ، ܘܚܸܟ݂ܡܬܵܐ، ܘܙܲܕܝܼܩܘܼܬܵܐ، ܘܢܵܗܲܩܘܼܬܵܐ

2ܠܚܲܒܪܵܐ ܕܡܲܠܟܵܐ ܢܛܘܿܪ، ܡ̣ܢ ܥܸܠܬܵܐ ܕܝܼܠܵܗ̇ ܡܵܘܡܝܼܬܵܐ ܠܐܲܠܵܗܵܐ. 3ܠܵܐ ܡܲܠܝܸܙܸܬ ܕܡ̣ܢ ܩܵܕ݇ܡܘܼܗܝ ܐܵܙܹܠ݇ܬ، ܘܠܵܐ ܟܵܠܹܝܬ ܒܫܘܼܠܵܐ ܒܝܼܫܵܐ، ܣܵܒܵܒ ܟܠ ܕܟܹܐ ܒܵܣܡܵܐ ܠܹܗ ܟܹܐ ܥܵܒܹܕ. 4ܒܗ̇ܝ ܕܚܲܒܪܵܐ ܕܡܲܠܟܵܐ ܗܘܼܟܡܵܢܵܐ ܝܠܹܗ، ܘܡܵܢܝܼ ܡܵܨܹܐ ܐܵܡܹܪ ܐܸܠܹܗ، ”ܡܘܿܕܝܼ ܒܸܥܒ݂ܵܕܵܐ ܝܘܸܬ؟“ 5ܢܵܛܪܵܢܵܐ ܕܦܘܼܩܕܵܢܵܐ ܠܹܐ ܝܵܕܹܥ ܫܘܼܠܵܐ ܒܝܼܫܵܐ، ܘܠܸܥܒ݂ܵܕܵܐ ܙܲܒ݂ܢܵܐ ܘܕܝܼܘܵܢ ܟܹܐ ܝܵܕܹܥ ܠܸܒܵܐ ܕܚܲܟܝܼܡܵܐ. 6ܣܵܒܵܒ ܠܟܠ ܨܒ݂ܘܼܬܵܐ ܐܝܼܬ ܙܲܒ݂ܢܵܐ ܘܕܝܼܘܵܢ، ܐܝܼܢܵܐ ܒܝܼܫܬܵܐ ܕܒܲܪܢܵܫܵܐ ܩܫܝܼܬܵܐ ܝܠܵܗ̇ ܥܲܠܘܼܗܝ. 7ܣܵܒܵܒ ܠܹܐ ܝܵܕܹܥ ܡܸܢܕܝܼ ܕܒܸܬ ܗܵܘܹܐ، ܗ̇ܝܓܵܗ ܡܵܢܝܼ ܡܵܨܹܐ ܡܲܕܸܥ ܠܹܗ ܕܵܐܟ݂ܝܼ ܒܸܬ ܗܵܘܹܐ؟ 8ܠܲܝܬ ܒܲܪܢܵܫܵܐ ܕܡܵܨܹܐ ܗܲܟܸܡ ܥܲܠ ܦܵܘܚܵܐ، ܠܡܲܟܠܘܼܝܹܐ ܦܵܘܚܵܐ، ܘܠܲܝܬ ܗܘܼܟܡܵܢܵܐ ܒܝܵܘܡܵܐ ܕܡܵܘܬܵܐ، ܘܠܲܝܬ ܫܪܵܝܬܵܐ ܕܕܲܚܫܵܐ ܒܥܕܵܢܵܐ ܕܦܠܵܫܵܐ، ܘܠܹܐ ܦܲܨܝܵܐ ܪܲܫܝܼܥܘܼܬܵܐ ܠܡܵܪ̈ܵܘܵܬܘܼܗ̇. 9ܠܟܠܹܗ ܐܵܗܵܐ ܚܙܹܐ ܠܝܼ، ܘܝܘܼܗ݇ܒܸܠ ܠܝܼ ܠܸܒܝܼ ܠܟܠ ܦܘܼܠܚܵܢܵܐ ܕܦܝܼܫ ܠܹܗ ܥܒ݂ܝܼܕܵܐ ܬܚܘܿܬ ܫܸܡܫܵܐ، ܐܝܼܬ ܙܲܒ݂ܢܵܐ ܕܟܹܐ ܗܲܟܸܡ ܐ݇ܢܵܫܵܐ ܥܲܠ ܐ݇ܢܵܫܵܐ ܠܒܝܼܫܬܵܐ ܐܸܠܹܗ.

10ܘܒܗܲܕܟ݂ܵܐ ܚܙܹܐ ܠܝܼ ܪ̈ܲܫܝܼܥܹܐ ܩܒ݂ܝܼܪܹ̈ܐ، ܘܐ݇ܬܹܐ ܠܗܘܿܢ، ܘܡ̣ܢ ܕܘܼܟܬܵܐ ܕܩܘܼܕܫܵܐ ܐ݇ܙܝܼܠ ܠܗܘܿܢ، ܘܦܝܼܫ ܠܗܘܿܢ ܢܸܫܝܹܐ ܒܡܕܝܼܢ݇ܬܵܐ ܕܗܲܕܟ݂ܵܐ ܥܒ݂ܝܼܕ ܠܗܘܿܢ. ܐܘܼܦ ܐܵܗܵܐ ܣܪܝܼܩܘܼܬܵܐ ܝܠܵܗ̇. 11ܟܲܕ ܠܹܐ ܝܠܵܗ̇ ܓ̰ܲܠܕܹܐ ܦܝܵܫܵܐ ܥܒ݂ܝܼܕܬܵܐ ܕܝܼܘܵܢ ܒܘܼܬ ܗܲܓ̰ܲܬ ܕܒܝܼܫܬܵܐ، ܒܘܼܬ ܐܵܗܵܐ، ܡܸܠܝܵܐ ܝܠܹܗ ܠܸܒܵܐ ܕܒܢܲܝ̈ܢܵܫܵܐ ܒܝܼܲܝܗܝ ܠܸܥܒ݂ܵܕܵܐ ܒܝܼܫܬܵܐ. 12ܐܵܦܸܢ ܕܚܵܛܹܐ ܥܵܒ݂ܕܵܢܵܐ ܕܒܝܼܫܬܵܐ ܐܸܡܵܐܐ ܓܵܗܹ̈ܐ، ܘܡܲܪܝܸܟ݂ ܐܸܠܹܗ، ܐܝܼܢܵܐ ܐܘܼܦ ܟܹܐ ܝܵܕܥܹܢ ܐܵܢܵܐ ܕܒܸܬ ܗܵܘܝܵܐ ܨܦܵܝܝܼ ܠܙܕܝܼܥܹ̈ܐ ܕܐܲܠܵܗܵܐ، ܐܵܢܝܼ ܕܙܵܕܥܝܼ ܡ̣ܢ ܩܵܕ݇ܡܘܼܗܝ. 13ܐܝܼܢܵܐ ܨܦܵܝܝܼ ܠܹܐ ܗܵܘܝܵܐ ܠܪܲܫܝܼܥܵܐ، ܘܠܹܐ ܡܲܪܝܸܟ݂ ܝܵܘܡܵܢܹ̈ܐ ܐܲܝܟ݂ ܛܸܠܵܢܝܼܬܵܐ، ܣܵܒܵܒ ܠܹܐ ܝܠܹܗ ܒܸܙܕܵܥܵܐ ܡ̣ܢ ܩܵܕ݇ܡ ܐܲܠܵܗܵܐ.

14ܐܝܼܬ ܣܪܝܼܩܘܼܬܵܐ ܕܟܹܐ ܦܵܝܫܵܐ ܥܒ݂ܝܼܕܬܵܐ ܥܲܠ ܐܲܪܥܵܐ، ܕܐܝܼܬ ܙܲܕܝܼܩܹ̈ܐ ܕܡܵܛܹܐ ܐܸܠܲܝܗܝ ܐܲܝܟ݂ ܦܘܼܠܚܵܢܵܐ ܕܪ̈ܲܫܝܼܥܹܐ، ܘܐܝܼܬ ܪ̈ܲܫܝܼܥܹܐ ܕܡܵܛܹܐ ܐܸܠܲܝܗܝ ܐܲܝܟ݂ ܦܘܼܠܚܵܢܵܐ ܕܙܲܕܝܼܩܹ̈ܐ. ܒܹܐܡܵܪܵܐ ܝܘܸܢ ܕܐܘܼܦ ܐܵܗܵܐ ܣܪܝܼܩܘܼܬܵܐ ܝܠܵܗ̇. 15ܘܚܩܝܼܪܝܼ ܐܵܢܵܐ ܠܚܲܕܘܼܬܵܐ، ܣܵܒܵܒ ܠܲܝܬ ܒܘܼܫ ܨܦܵܝܝܼ ܠܒܲܪܢܵܫܵܐ ܬܚܘܿܬ ܫܸܡܫܵܐ، ܫܒ݂ܘܿܩ ܡ̣ܢ ܠܹܐܟ݂ܵܠܵܐ ܘܠܸܫܬܵܝܵܐ ܘܠܸܚܕܵܝܵܐ، ܘܗ̇ܘ ܒܸܬ ܬܵܒܹܥ ܐܸܠܹܗ ܒܥܲܡܠܹܗ، ܒܝܵܘܡܵܢܹ̈ܐ ܕܚܲܝܘܼ̈ܗܝ ܕܝܘܼܗ݇ܒܸܠ ܠܹܗ ܐܸܠܹܗ ܐܲܠܵܗܵܐ ܬܚܘܿܬ ܫܸܡܫܵܐ.

16ܟܲܕ ܝܘܼܗ݇ܒܸܠ ܠܝܼ ܠܸܒܝܼ ܠܝܼܕܵܥܵܐ ܚܸܟ݂ܡܬܵܐ، ܘܠܸܚܙܵܝܵܐ ܟܸܟ̰ܚܵܐ ܕܦܝܼܫ ܠܹܗ ܥܒ݂ܝܼܕܵܐ ܥܲܠ ܐܲܪܥܵܐ، ܣܵܒܵܒ ܐܘܼܦ ܒܐܝܼܡܵܡܵܐ ܘܒܠܲܝܠܹܐ ܫܸܢܬܵܐ ܠܹܐ ܚܵܙܹܐ ܒܥܲܝܢܘܼ̈ܗܝ، 17ܘܚܙܹܐ ܠܝܼ ܠܟܠ ܦܘܼܠܚܵܢܵܐ ܕܐܲܠܵܗܵܐ، ܕܠܹܐ ܡܵܨܹܐ ܒܲܪܢܵܫܵܐ ܠܡܲܫ݇ܟ̰ܘܼܚܹܐ ܦܘܼܠܚܵܢܵܐ ܕܦܝܼܫ ܠܹܗ ܥܒ݂ܝܼܕܵܐ ܬܚܘܿܬ ܫܸܡܫܵܐ، ܣܵܒܵܒ ܟܹܐ ܥܵܒܹܕ ܥܲܡܠܵܐ ܒܲܪܢܵܫܵܐ ܠܸܛܥܵܝܵܐ ܐܝܼܢܵܐ ܠܹܐ ܡܲܫ݇ܟ̰ܸܚ، ܘܐܘܼܦ ܐܸܢ ܐܵܡܹܪ ܚܲܟܝܼܡܵܐ، ”ܒܝܼܕܵܥܵܐ ܝܘܸܢ،“ ܠܹܐ ܡܵܨܹܐ ܡܲܫ݇ܟ̰ܸܚ.

Currently Selected:

ܩܘܗܠܬ 8: ABTAB

Highlight

Copy