ܣܘܥܪ̈ܢܐ 6

ܓܲܒܵܝܬܵܐ ܕܫܲܒ݂ܥܵܐ ܡܕܲܒܪ̈ܵܢܹܐ

1ܒܐܵܢܝܼ ܝܵܘܡܵܢܹ̈ܐ ܟܲܕ ܒܸܙܝܵܕܵܐ ܝܗ݇ܘܵܐ ܡܸܢܝܵܢܵܐ ܕܬܲܠܡܝܼ̈ܕܹܐ، ܛܘܼܪܛܸܡ ܠܗܘܿܢ ܬܲܠܡܝܼ̈ܕܹܐ ܝܗܘܼܕܵܝܹ̈ܐ ܕܟܹܐ ܗܲܡܙܸܡܝܼ ܗ݇ܘܵܘ ܠܸܫܵܢܵܐ ܝܵܘܢܵܝܵܐ ܥܲܠ ܬܲܠܡܝܼ̈ܕܹܐ ܕܟܹܐ ܗܲܡܙܸܡܝܼ ܗ݇ܘܵܘ ܠܸܫܵܢܵܐ ܥܸܒ݂ܪܵܝܵܐ، ܣܵܒܵܒ ܐܲܪ̈ܡܸܠܝܵܬܲܝܗܝ ܠܹܐ ܝܗ݇ܘܵܘ ܩܲܒܘܼܠܹܐ ܚܸܠܡܲܬܹ̈ܐ ܝܵܘܡܵܝܹ̈ܐ. 2ܗ̇ܝܓܵܗ ܩܪܹܐ ܠܗܘܿܢ ܬܪܸܥܣܲܪ ܠܟܠܲܝܗܝ ܬܲܠܡܝܼ̈ܕܹܐ ܘܐ݇ܡܝܼܪܗܘܿܢ ܐܸܠܲܝܗܝ، ”ܠܹܐ ܝܠܵܗ̇ ܫܲܦܝܼܪܬܵܐ ܕܫܵܒ݂ܩܲܚ ܗܹܡܸܙܡܵܢ ܕܐܲܠܵܗܵܐ ܘܥܵܒ݂ܕܲܚ ܚܸܠܡܲܬ ܠܣܘܼܦܪܹ̈ܐ. 3”ܐܲܚܘܿܢܘܵܬܹ̈ܐ، ܓܲܒܹܝܡܘܼܢ ܫܲܒ݂ܥܵܐ ܐ݇ܢܵܫܹ̈ܐ ܡܸܢܵܘܟ݂ܘܿܢ، ܐܵܢܝܼ ܕܐܝܼܬ ܒܘܼܬ ܕܝܼܲܝܗܝ ܣܵܗܕܘܼܬܵܐ ܕܡܸܠܝܹ̈ܐ ܝܢܵܐ ܪܘܼܚܵܐ ܘܚܸܟ݂ܡܬܵܐ ܕܝܵܗ݇ܒܲܚ ܠܗܘܿܢ ܐܵܗܵܐ ܫܘܼܠܵܐ، 4”ܘܐܲܚܢܲܢ ܒܸܬ ܗܵܘܲܚ ܒܟܠ ܥܕܵܢܵܐ ܒܨܠܘܿܬܵܐ ܘܒܚܸܠܡܲܬ ܠܗܹܡܸܙܡܵܢ ܕܐܲܠܵܗܵܐ.“ 5ܫܦܝܼܪܵܗ̇ ܐܵܗܵܐ ܗܹܡܸܙܡܵܢ ܩܵܕ݇ܡ ܟܠܲܝܗܝ، ܘܓܘܼܒܹܐ ܠܗܘܿܢ ܠܐܸܣܛܲܦܵܢܘܿܣ، ܓܲܒ݂ܪܵܐ ܡܸܠܝܵܐ ܪܘܼܚܵܐ ܕܩܘܼܕܫܵܐ ܘܗܲܝܡܵܢܘܼܬܵܐ، ܘܠܦܝܼܠܝܼܦܘܿܣ، ܘܠܦܪܵܟ݂ܵܪܘܿܣ، ܘܠܢܝܼܩܵܢܘܿܪ، ܘܠܛܝܼܡܘܿܢ، ܘܠܦܲܪܡܝܼܢܵܐ، ܘܠܢܝܼܩܵܠܹܐܘܿܣ، ܢܘܼܟ݂ܪܵܝܵܐ ܡ̣ܢ ܐܵܢܛܝܘܿܟ݂ܝ ܩܠܝܼܒܵܐ ܠܝܗܘܼܕܵܝܘܼܬܵܐ. 6ܐܲܢܹܐ ܐ݇ܢܵܫܹ̈ܐ ܡܘܼܟܠܝܼܲܝ ܠܗܘܿܢ ܩܵܕ݇ܡ ܫܠܝܼܚܹ̈ܐ، ܨܘܼܠܹܐ ܠܗܘܿܢ ܘܡܘܼܬܸܒ݂ ܠܗܘܿܢ ܥܲܠܲܝܗܝ ܐܝܼܕܵܬܹ̈ܐ. 7ܘܦܪܝܼܣ ܠܵܗ̇ ܗܹܡܸܙܡܵܢ ܕܐܲܠܵܗܵܐ، ܘܡܸܢܝܵܢܵܐ ܕܬܲܠܡܝܼ̈ܕܹܐ ܙܝܼܕ ܠܹܗ ܪܵܒܵܐ ܓܵܘ ܐܘܿܪܸܫܠܸܡ، ܘܟܸܢܫܵܐ ܪܵܒܵܐ ܡ̣ܢ ܟܵܗܢܹ̈ܐ ܒܸܫܠܵܡܵܐ ܝܗ݇ܘܵܐ ܠܗܲܝܡܵܢܘܼܬܵܐ.

ܕܒ݂ܵܩܬܵܐ ܕܐܸܣܛܲܦܵܢܘܿܣ

8ܘܐܸܣܛܲܦܵܢܘܿܣ ܡܸܠܝܵܐ ܫܵܦܵܩܲܬ ܘܚܲܝܠܵܐ، ܥܒ݂ܝܼܕ ܠܹܗ ܕܘܼܡܵܪܹ̈ܐ ܘܢܝܼܫܲܢܩܹ̈ܐ ܓܘܼܪܹ̈ܐ ܓܵܘ ܥܲܡܵܐ. 9ܘܩܝܼܡ ܠܗܘܿܢ ܐ݇ܢܵܫܹ̈ܐ ܡ̣ܢ ܟܢܘܼܫܬܵܐ ܕܟܹܐ ܦܵܝܫܵܐ ܩܪܝܼܬܵܐ ”ܟܢܘܼܫܬܵܐ ܕܒܢܲܝ̈ ܚܹܐܪܹ̈ܐ،“ ܘܡ̣ܢ ܩܸܘܪ̈ܝܼܢܵܝܹܐ ܘܐܵܠܸܟܣܲܢܕܪ̈ܵܝܹܐ، ܘܡ̣ܢ ܐܘܼܚܕܵܢܹ̈ܐ ܕܩܝܼܠܝܼܩܝܼܵܐ ܘܕܐܵܣܝܼܵܐ، ܘܕܵܪܫܝܼ ܗ݇ܘܵܘ ܥܲܡ ܐܸܣܛܲܦܵܢܘܿܣ. 10ܐܝܼܢܵܐ ܠܵܐ ܡܨܹܐ ܠܗܘܿܢ ܟܵܠܝܼ ܕܲܠܩܘܼܒ݂ܠ ܕܚܸܟ݂ܡܬܵܐ ܘܪܘܼܚܵܐ ܕܒܝܼܘܼܗ̇ ܗܲܡܙܘܼܡܹܐ ܝܗ݇ܘܵܐ. 11ܗ̇ܝܓܵܗ ܡܘܼܠܸܦ ܠܗܘܿܢ ܒܛܸܫܘܵܐ ܠܚܲܕ݇ܟܡܵܐ ܐ݇ܢܵܫܹ̈ܐ ܕܐܵܡܪܝܼ ܗ݇ܘܵܘ، ”ܐܲܚܢܲܢ ܫܡܝܼܥ ܠܲܢ ܐܵܗܵܐ ܐ݇ܢܵܫܵܐ ܗܲܡܙܘܼܡܹܐ ܓܘܼܕܵܦܵܐ ܥܲܠ ܡܘܼܫܹܐ ܘܥܲܠ ܐܲܠܵܗܵܐ.“ 12ܘܡܘܼܫܓܸܫ ܠܗܘܿܢ ܠܥܲܡܵܐ ܘܠܚܘܵܪ̈ܕܸܩܢܹܐ ܘܠܣܵܦܪܹ̈ܐ، ܘܐ݇ܬܹܐ ܠܗܘܿܢ ܘܕܒ݂ܝܼܩ ܠܗܘܿܢ ܠܐܸܣܛܲܦܵܢܘܿܣ، ܘܡܘܼܐܬܹܐ ܠܗܘܿܢ ܐܸܠܹܗ ܩܵܕ݇ܡ ܟܢܘܼܫܝܵܐ ܕܕܝܼܘܵܢ. 13ܘܡܘܼܩܸܡ ܠܗܘܿܢ ܥܲܠܘܼܗܝ ܣܵܗܕܹ̈ܐ ܕܲܓܵܠܹ̈ܐ ܘܐ݇ܡܝܼܪܗܘܿܢ، ”ܐܵܗܵܐ ܐ݇ܢܵܫܵܐ ܠܹܐ ܝܠܹܗ ܒܸܫܠܵܝܵܐ ܡ̣ܢ ܠܗܲܡܙܘܼܡܹܐ ܗܹܡܸܙܡܵܢܹ̈ܐ ܕܓܘܼܕܵܦܵܐ ܥܲܠ ܐܵܗܵܐ ܕܘܼܟܵܐ ܩܲܕܝܼܫܬܵܐ ܘܥܲܠ ܢܵܡܘܿܣܵܐ. 14”ܐܲܚܢܲܢ ܫܡܝܼܥ ܠܲܢ ܡܸܢܹܗ ܒܹܐܡܵܪܵܐ ܕܝܼܫܘܿܥ ܢܵܨܪܵܝܵܐ ܒܸܬ ܬܵܠܹܚ ܠܐܵܗܵܐ ܕܘܼܟܵܐ ܘܒܸܬ ܫܲܚܠܸܦ ܥܝܵܕܹ̈ܐ ܕܣܘܼܦܹܐ ܠܹܗ ܐܸܠܵܘܟ݂ܘܿܢ ܡܘܼܫܹܐ.“ 15ܘܚܝܼܪܗܘܿܢ ܒܐܸܣܛܲܦܵܢܘܿܣ ܟܠܲܝܗܝ ܐܵܢܝܼ ܕܝ݇ܬܝܼܒܹܐ ܝܗ݇ܘܵܘ ܓܵܘ ܟܢܘܼܫܝܵܐ ܘܚܙܹܐ ܠܗܘܿܢ ܦܵܬܹܗ ܐܲܝܟ݂ ܦܵܬܵܐ ܕܡܲܠܲܐܟ݂ܵܐ.

Currently Selected:

ܣܘܥܪ̈ܢܐ 6: ABTAB

Highlight

Copy