ܣܘܥܪ̈ܢܐ 13

ܒܲܪܢܒ݂ܵܐ ܘܫܵܐܘܿܠ ܦܝܵܫܵܐ ܫܘܼܕܪܹܐ

1ܐܝܼܬ ܗ݇ܘܵܐ ܓܵܘ ܥܹܕܬܵܐ ܕܐܵܢܛܝܘܿܟ݂ܝ ܢܒ݂ܝܼܹ̈ܐ ܘܡܲܠܦܵܢܹ̈ܐ، ܫܸܡܵܢܲܝ̈ܗܝ ܒܲܪܢܒ݂ܵܐ، ܘܫܸܡܥܘܿܢ ܕܦܵܐܹܫ ܗ݇ܘܵܐ ܩܸܪܝܵܐ ܢܝܼܓܲܪ، ܘܠܘܼܩܝܼܘܿܣ ܡ̣ܢ ܩܸܘܪܝܼܢܹܐ ܡܕܝܼܢ݇ܬܵܐ، ܘܡܵܢܵܐܹܝܠ ܚܲܒ݂ܪܵܐ ܕܗܹܪܘܿܕܸܣ ܛܸܛܪܲܪܟܵܐ ܡ̣ܢ ܝܵܠܕ݇ܘܼܬܹܗ، ܘܫܵܐܘܿܠ. 2ܟܲܕ ܐܲܢܹܐ ܒܸܦܠܵܚܵܐ ܝܗ݇ܘܵܘ ܠܡܵܪܝܵܐ ܘܒܸܨܝܵܡܵܐ، ܐ݇ܡܝܼܪܹܗ ܐܸܠܲܝܗܝ ܪܘܼܚܵܐ ܕܩܘܼܕܫܵܐ، ”ܦܪܘܿܫܘܼܢ ܐܸܠܝܼ ܫܵܐܘܿܠ ܘܒܲܪܢܒ݂ܵܐ ܠܦܘܼܠܚܵܢܵܐ ܕܐܵܢܵܐ ܩܸܪܝܲܝ ܝܘܸܢ.“ 3ܡ̣ܢ ܒܵܬ݇ܪ ܕܨܝܼܡ ܠܗܘܿܢ ܘܨܘܼܠܹܐ ܠܗܘܿܢ، ܡܘܼܬܸܒ݂ ܠܗܘܿܢ ܥܲܠܲܝܗܝ ܐܝܼܕܵܬܹ̈ܐ ܘܫܘܼܕܪܲܝ ܠܗܘܿܢ. 4ܐܲܢܹܐ ܟܲܕ ܦܝܼܫ ܠܗܘܿܢ ܫܘܼܕܪܹܐ ܒܝܲܕ ܪܘܼܚܵܐ ܕܩܘܼܕܫܵܐ، ܨܠܹܐ ܠܗܘܿܢ ܠܣܹܠܵܘܩܝܵܐ، ܘܡ̣ܢ ܬܵܡܵܐ ܛܪܹܐ ܠܗܘܿܢ ܒܝܵܡܵܐ ܗܲܠ ܩܸܘܦܪܘܿܣ. 5ܐܝܼܡܲܢ ܕܡܛܹܐ ܠܗܘܿܢ ܠܣܵܠܵܡܹܢܵܐ، ܡܘܼܟܪܸܙ ܠܗܘܿܢ ܗܹܡܸܙܡܵܢ ܕܐܲܠܵܗܵܐ ܓܵܘ ܟܢܘܼܫܝܵܬܹ̈ܐ ܕܝܗܘܼܕܵܝܹ̈ܐ، ܘܐܘܼܦ ܝܘܿܚܲܢܵܢ ܟܹܐ ܗܲܝܸܪ ܗ݇ܘܵܐ ܠܗܘܿܢ. 6ܚܕܝܼܪܗܘܿܢ ܒܟܠܵܗ̇ ܓܵܙܲܪܬܵܐ ܗܲܠ ܕܐ݇ܬܹܐ ܠܗܘܿܢ ܠܦܵܦܘܿܣ ܡܕܝܼܢ݇ܬܵܐ. ܬܵܡܵܐ ܚܙܹܐ ܠܗܘܿܢ ܚܲܕ ܐ݇ܢܵܫܵܐ ܝܗܘܼܕܵܝܵܐ ܫܸܡܹܗ ܒܲܪ ܝܼܫܘܿܥ، ܚܲܪܵܫܵܐ ܘܢܒ݂ܝܼܵܐ ܕܲܓܵܠܵܐ. 7ܐܵܗܵܐ ܟܹܐ ܗܵܘܹܐ ܗ݇ܘܵܐ ܠܟܸܣ ܫܲܠܝܼܛܵܐ ܕܩܸܘܦܪܘܿܣ ܕܟܹܐ ܦܵܐܹܫ ܗ݇ܘܵܐ ܩܸܪܝܵܐ ܣܲܪܓܝܼܘܿܣ ܦܵܘܠܘܿܣ، ܚܲܕ ܐ݇ܢܵܫܵܐ ܚܲܟܝܼܡܵܐ. ܐܵܗܵܐ ܩܪܹܐ ܠܹܗ ܠܫܵܐܘܿܠ ܘܠܒܲܪܢܒ݂ܵܐ ܘܒܵܥܹܐ ܗ݇ܘܵܐ ܕܫܵܡܹܥ ܗ݇ܘܵܐ ܡܸܢܲܝܗܝ ܗܹܡܸܙܡܵܢ ܕܐܲܠܵܗܵܐ. 8ܐܝܼܢܵܐ ܚܲܪܵܫܵܐ ܕܫܸܡܹܗ ܟܹܐ ܦܵܐܹܫ ܗ݇ܘܵܐ ܬܘܼܪܓܸܡܵܐ ܐܵܠܘܼܡܘܿܣ، ܟܸܠܝܵܐ ܝܗ݇ܘܵܐ ܕܲܠܩܘܼܒ݂ܠܲܝܗܝ، ܘܒܵܥܹܐ ܗ݇ܘܵܐ ܕܡܲܩܠܸܒ ܗ݇ܘܵܐ ܠܫܲܠܝܼܛܵܐ ܡ̣ܢ ܗܲܝܡܵܢܘܼܬܵܐ. 9ܐܝܼܢܵܐ ܫܵܐܘܿܠ، ܕܦܝܼܫ ܠܹܗ ܩܸܪܝܵܐ ܦܵܘܠܘܿܣ، ܟܲܕ ܡܸܠܝܵܐ ܡ̣ܢ ܪܘܼܚܵܐ ܕܩܘܼܕܫܵܐ، ܚܝܼܪܹܗ ܒܝܼܹܗ ܘܐ݇ܡܝܼܪܹܗ، 10”ܝܵܐ ܡܸܠܝܵܐ ܡ̣ܢ ܟܠܲܝܗܝ ܦܸܠܡܹ̈ܐ ܘܡ̣ܢ ܟܠܲܝܗܝ ܒܝܼܫܵܬܹ̈ܐ، ܒܪܘܿܢܵܐ ܕܐܵܟܹܠܩܲܪܨܵܐ، ܘܣܵܢܝܵܢܵܐ ܕܟܠܵܗ̇ ܙܲܕܝܼܩܘܼܬܵܐ، ܩܵܡܘܿܕܝܼ ܠܹܐ ܝܘܸܬ ܒܸܫܠܵܝܵܐ ܡ̣ܢ ܡܲܦܟ̰ܘܼܠܹܐ ܐܘܼܪ̈ܚܵܬܹܐ ܫܲܪܝܼܪܹ̈ܐ ܕܡܵܪܝܵܐ؟ 11”ܗܵܐ ܐܵܕܝܼܵܐ ܐܝܼܕܵܐ ܕܡܵܪܝܵܐ ܥܲܠܘܼܟ݂ ܝܼܠܵܗ̇، ܒܸܬ ܗܵܘܹܝܬ ܣܸܡܝܵܐ ܘܠܹܐ ܚܵܙܹܝܬ ܒܲܗܪܵܐ ܕܫܸܡܫܵܐ ܩܵܐ ܚܲܕ ܙܲܒ݂ܢܵܐ.“ ܗܲܪ ܒܗ̇ܝ ܥܕܵܢܵܐ ܢܦܝܼܠ ܠܹܗ ܥܲܠܘܼܗܝ ܚܸܫܟܵܐ ܘܥܲܡܛܵܢܵܐ، ܘܫܘܼܪܹܐ ܠܹܗ ܒܸܛܥܵܝܵܐ ܘܒܸܒܥܵܝܵܐ ܐ݇ܢܵܫܵܐ ܕܕܵܒܹܩ ܒܐܝܼܕܹܗ. 12ܐܝܼܡܲܢ ܕܚܙܹܐ ܠܹܗ ܫܲܠܝܼܛܵܐ ܡܸܢܕܝܼ ܕܗܘܹܐ ܠܹܗ، ܗܘܼܡܸܢܹܗ، ܣܵܒܵܒ ܥܘܼܓ̰ܸܒ ܠܹܗ ܒܡܲܠܦܵܢܘܼܬܵܐ ܕܒܘܼܬ ܡܵܪܝܵܐ.

ܦܵܘܠܘܿܣ ܘܒܲܪܢܒ݂ܵܐ ܓܵܘ ܐܵܢܛܝܘܿܟ݂ܝ

13ܦܵܘܠܘܿܣ ܘܚܲܒ݂ܪ̈ܵܘܵܬܹܗ ܛܪܹܐ ܠܗܘܿܢ ܒܝܵܡܵܐ ܡ̣ܢ ܦܵܦܘܿܣ ܘܐ݇ܬܹܐ ܠܗܘܿܢ ܠܡܕܝܼܢ݇ܬܵܐ ܕܦܲܪܓܹܐ ܓܵܘ ܦܲܡܦܘܼܠܝܼܵܐ. ܬܵܡܵܐ ܦܪܝܼܫ ܠܹܗ ܡܸܢܲܝܗܝ ܝܘܿܚܲܢܵܢ ܘܕܝܼܪܹܗ ܠܐܘܿܪܸܫܠܸܡ. 14ܐܝܼܢܵܐ ܐܵܢܝܼ ܦܠܝܼܛ ܠܗܘܿܢ ܡ̣ܢ ܦܲܪܓܹܐ ܘܐ݇ܬܹܐ ܠܗܘܿܢ ܠܡܕܝܼܢ݇ܬܵܐ ܕܐܵܢܛܝܘܿܟ݂ܝ ܓܵܘ ܦܝܼܣܝܼܕܝܵܐ. ܒܝܵܘܡܵܐ ܕܫܲܒܬܵܐ ܥܒ݂ܝܼܪܗܘܿܢ ܠܟܢܘܼܫܬܵܐ ܘܝ݇ܬܝܼܒ݂ ܠܗܘܿܢ. 15ܡ̣ܢ ܒܵܬ݇ܪ ܩܪܵܝܬܵܐ ܕܢܵܡܘܿܣܵܐ ܘܢܒ݂ܝܼܹ̈ܐ، ܫܘܼܕܸܪܗܘܿܢ ܠܟܸܣ ܠܲܝܗܝ ܚܘܵܪ̈ܕܸܩܢܹܐ ܕܟܢܘܼܫܬܵܐ، ܒܹܐܡܵܪܵܐ، ”ܐ݇ܢܵܫܹ̈ܐ ܐܲܚܘܿܢܘܵܬܹ̈ܐ، ܐܸܢ ܐܝܼܬ ܠܵܘܟ݂ܘܿܢ ܗܹܡܸܙܡܵܢ ܕܝܲܗ݇ܒܲܠܬܵܐ ܕܠܸܒܵܐ ܠܥܲܡܵܐ، ܗܲܡܙܸܡܘܼܢ ܐܸܠܲܢ.“

16ܗ̇ܝܓܵܗ ܟܠܹܐ ܠܹܗ ܦܵܘܠܘܿܣ، ܫܥܝܼܫ ܠܹܗ ܐܝܼܕܹܗ ܘܐ݇ܡܝܼܪܹܗ، ”ܐ݇ܢܵܫܹ̈ܐ ܒܢܲܝ̈ ܝܼܣܪܵܝܹܠ، ܘܐ݇ܚܹܪ̈݇ܢܹܐ ܕܟܹܐ ܙܵܕܥܝܼ ܡ̣ܢ ܐܲܠܵܗܵܐ، ܫܡܸܥܡܘܼܢ ܐܸܠܝܼ. 17”ܐܲܠܵܗܵܐ ܕܐܵܗܵܐ ܥܲܡܵܐ ܝܼܣܪܵܝܹܠ ܓܘܼܒܹܐ ܠܹܗ ܠܐܲܒ݂ܵܗܵܬܲܢ̈، ܘܡܘܼܪܸܡ ܠܹܗ ܠܥܲܡܵܐ ܒܥܕܵܢܵܐ ܕܝܼܗ݇ܘܵܘ ܬܵܘܬܵܒܹ̈ܐ ܒܐܲܪܥܵܐ ܕܡܸܨܪܹܝܢ، ܘܒܚܲܝܠܵܐ ܓܘܼܪܵܐ ܦܘܼܠܛܲܝ ܠܹܗ ܡ̣ܢ ܗ̇ܘ ܐܲܬܪܵܐ.#ܡܦܩܢܐ 1‏:7 18”ܘܬܘܼܪܣܝܼܲܝ ܠܹܗ ܓܵܘ ܒܲܪܝܼܵܐ ܒܡܸܬܚܵܐ ܕܐܲܪܒܥܝܼ ܫܸܢܹ̈ܐ.#ܡܢܝܢܐ 14‏:34؛ ܬܢܝܢ ܢܡܘܣܐ 1‏:31 19”ܫܡܝܼܛ ܠܹܗ ܫܒܲܥ ܐܸܡܘܵܬܹ̈ܐ ܒܐܲܪܥܵܐ ܕܟܢܲܥܢ، ܘܝܘܼܗ݇ܒܸܠ ܠܹܗ ܐܸܠܲܝܗܝ ܐܲܪܥܵܐ ܠܝܵܪܬܘܼܬܵܐ.#ܬܢܝܢ ܢܡܘܣܐ 7‏:1؛ ܝܫܘܥ ܒܪ ܢܘܢ 14‏:1 20”ܡ̣ܢ ܒܵܬ݇ܪ ܐܵܗܵܐ، ܐܲܝܟ݂ ܐܲܪܒܲܥܡܵܐܐ ܘܚܲܡܫܝܼ ܫܸܢܹ̈ܐ، ܝܘܼܗ݇ܒܸܠ ܠܹܗ ܐܸܠܲܝܗܝ ܕܲܝܵܢܹ̈ܐ ܗܲܠ ܥܕܵܢܵܐ ܕܫܡܘܼܐܹܝܠ ܢܒ݂ܝܼܵܐ.#ܕܝܢ̈ܐ 2‏:16؛ ܐ. ܫܡܘܐܝܠ 3‏:20 21”ܗ̇ܝܓܵܗ ܒܢܲܝ̈ ܝܼܣܪܵܝܹܠ ܛܠܝܼܒ ܠܗܘܿܢ ܡܲܠܟܵܐ. ܘܐܲܠܵܗܵܐ ܝܘܼܗ݇ܒܸܠ ܠܹܗ ܐܸܠܲܝܗܝ ܫܵܐܘܿܠ ܒܪܘܿܢܵܐ ܕܩܝܼܫ، ܡ̣ܢ ܫܲܒ݂ܛܵܐ ܕܒܸܢܝܵܡܹܝܢ، ܘܥܒ݂ܝܼܕ ܠܹܗ ܡܲܠܟܘܼܬܵܐ ܩܵܐ ܡܸܬܚܵܐ ܕܐܲܪܒܥܝܼ ܫܸܢܹ̈ܐ.#ܐ. ܫܡܘܐܝܠ 8‏:5، 10‏:21 22”ܡ̣ܢ ܒܵܬ݇ܪ ܕܫܩܝܼܠ ܠܹܗ ܠܫܵܐܘܿܠ،#ܐ. ܫܡܘܐܝܠ 13‏:14 ܝܘܼܗ݇ܒܸܠ ܠܹܗ ܐܸܠܲܝܗܝ ܕܵܘܝܼܕ ܡܲܠܟܵܐ، ܘܣܗܝܼܕ ܠܹܗ ܒܘܼܬ ܕܝܼܹܗ، ܒܹܐܡܵܪܵܐ، ’ܚܙܹܐ ܠܝܼ ܠܕܵܘܝܼܕ ܒܪܘܿܢܵܐ ܕܐܝܼܫܲܝ ܐ݇ܢܵܫܵܐ ܐܲܝܟ݂ ܠܸܒܝܼ. ܗ̇ܘ ܒܸܬ ܥܵܒܹܕ ܟܠ ܡܸܢܕܝܼ ܕܒܵܥܹܝܢ.‘#ܐ. ܫܡܘܐܝܠ 16‏:12؛ ܡܙܡܘܪ̈ܐ 89‏:20 23”ܡ̣ܢ ܙܲܪܥܵܐ ܕܕܵܘܝܼܕ ܡܘܼܩܸܡ ܠܹܗ ܐܲܠܵܗܵܐ ܩܵܐ ܝܼܣܪܵܝܹܠ ܦܵܪܘܿܩܵܐ، ܝܼܫܘܿܥ، ܕܵܐܟ݂ܝܼ ܕܩܘܼܘܸܠ ܠܹܗ. 24”ܡ̣ܢ ܩܵܕ݇ܡ ܐ݇ܬܵܝܬܵܐ ܕܡܫܝܼܚܵܐ، ܝܘܿܚܲܢܵܢ ܡܘܼܟܪܸܙ ܠܹܗ ܠܟܠܹܗ ܥܲܡܵܐ ܕܝܼܣܪܵܝܹܠ ܕܬܲܘܸܒ ܘܥܵܡܹܕ. 25”ܟܲܕ ܬܲܡܘܼܡܹܐ ܝܗ݇ܘܵܐ ܝܘܿܚܲܢܵܢ ܪܲܗܛܹܗ، ܐ݇ܡܝܼܪܹܗ، ’ܒܸܚܫܵܒ݂ܵܐ ܝܬܘܿܢ ܡܵܢܝܼ ܝܘܸܢ ܐܵܢܵܐ؟ ܐܵܢܵܐ ܠܹܐ ܝܘܸܢ ܗ̇ܘ. ܠܵܐ، ܐܝܼܢܵܐ ܒܹܐܬܵܝܵܐ ܝܠܹܗ ܒܵܬ݇ܪܝܼ ܚܲܕ ܕܐܵܢܵܐ ܠܹܐ ܚܵܫܚܹܢ ܕܫܵܪܹܝܢ ܠܨܵܘܠܘܼ̈ܗܝ.‘

26”ܐ݇ܢܵܫܹ̈ܐ ܐܲܚܘܿܢܘܵܬܹ̈ܐ، ܒܢܘܿܢܹ̈ܐ ܕܐܲܒ݂ܪܵܗܵܡ، ܘܐ݇ܚܹܪ̈݇ܢܹܐ ܕܝܼܢܵܐ ܓܵܘܵܘܟ݂ܘܿܢ ܙܵܕܥܵܢܹ̈ܐ ܡ̣ܢ ܐܲܠܵܗܵܐ، ܐܸܠܵܘܟ݂ܘܿܢ ܦܝܼܫ ܠܵܗ̇ ܫܘܼܕܸܪܬܵܐ ܗܹܡܸܙܡܵܢ ܕܐܵܗܵܐ ܦܘܼܪܩܵܢܵܐ. 27”ܥܵܡܪ̈ܵܢܹܐ ܕܒܐܘܿܪܸܫܠܸܡ ܘܓܘܼܪ̈ܵܢܲܝܗܝ ܠܵܐ ܝ݇ܕܝܼܥ ܠܗܘܿܢ ܠܝܼܫܘܿܥ. ܐܝܼܢܵܐ ܒܕܝܵܢܬܲܝܗܝ ܐܸܠܹܗ ܬܘܼܡܸܡ ܠܗܘܿܢ ܗܹܡܸܙܡܵܢܹ̈ܐ ܕܢܒ݂ܝܼܹ̈ܐ ܕܟܹܐ ܦܵܝܫܝܼ ܩܸܪܝܹܐ ܒܟܠ ܫܲܒܬܵܐ. 28”ܐܘܼܦ ܐܸܢ ܕܠܵܐ ܡܘܼܫ݇ܟ̰ܸܚ ܠܗܘܿܢ ܥܸܠܬܵܐ ܕܡܵܘܬܵܐ ܒܝܼܹܗ، ܛܠܝܼܒ ܠܗܘܿܢ ܡ̣ܢ ܦܝܼܠܵܛܘܿܣ ܕܩܵܛܹܠ ܠܹܗ. 29”ܘܟܲܕ ܬܘܼܡܸܡ ܠܗܘܿܢ ܟܠ ܡܸܢܕܝܼ ܕܝܼܗ݇ܘܵܐ ܟܬܝܼܒ݂ܵܐ ܒܘܼܬ ܕܝܼܹܗ، ܡܘܼܨܠܹܐ ܠܗܘܿܢ ܐܸܠܹܗ ܡ̣ܢ ܩܲܝܣܵܐ ܘܡܘܼܬܸܒ݂ ܠܗܘܿܢ ܓܵܘ ܩܲܒ݂ܪܵܐ. 30”ܐܝܼܢܵܐ ܐܲܠܵܗܵܐ ܡܘܼܩܸܡ ܠܹܗ ܐܸܠܹܗ ܡ̣ܢ ܓܵܘ ܡܝܼܬܹ̈ܐ، 31”ܘܦܝܼܫ ܠܹܗ ܚܸܙܝܵܐ ܪܵܒܵܐ ܝܵܘܡܵܢܹ̈ܐ ܠܐܵܢܝܼ ܕܐ݇ܣܝܼܩ ܠܗܘܿܢ ܥܲܡܹܗ ܡ̣ܢ ܓܠܝܼܠܵܐ ܠܐܘܿܪܸܫܠܸܡ. ܐܵܢܝܼ ܐܵܕܝܼܵܐ ܣܵܗܕܘܼ̈ܗܝ ܝܢܵܐ ܠܟܸܣ ܥܲܡܵܐ. 32”ܐܲܚܢܲܢ ܡܲܟܪܘܼܙܹܐ ܝܘܲܚ ܐܸܠܵܘܟ݂ܘܿܢ ܩܵܘܠܵܐ ܕܐܲܠܵܗܵܐ ܕܥܒ݂ܝܼܕ ܠܹܗ ܥܲܡ ܐܲܒ݂ܵܗܵܬܲܢ̈، 33”ܘܬܘܼܡܸܡ ܠܹܗ ܐܸܠܲܢ، ܕܝܼܘܲܚ ܒܢܘܿܢܲܝ̈ܗܝ، ܣܵܒܵܒ ܡܘܼܩܸܡ ܠܹܗ ܠܝܼܫܘܿܥ، ܐܲܝܟ݂ ܕܝܼܠܹܗ ܟܬܝܼܒ݂ܵܐ ܒܡܲܙܡܘܿܪܵܐ ܕܬܪܹܝ:

ܐܲܢ݇ܬ ܒܪܘܿܢܝܼ ܝܘܸܬ، ܐܸܕܝܘܿܡ ܝܵܘܡܵܐ ܩܲܡ ܗܲܨܠܸܢܘܼܟ݂.#ܡܙܡܘܪ̈ܐ 2‏:7

34”ܕܡܘܼܩܸܡ ܠܹܗ ܐܸܠܹܗ ܐܲܠܵܗܵܐ ܡ̣ܢ ܓܵܘ ܡܝܼܬܹ̈ܐ ܕܗܸܟ̃ ܠܵܐ ܐܵܬܹܐ ܠܚܪܵܒ݂ܵܐ، ܕܵܐܟ݂ܝܼ ܕܐ݇ܡܝܼܪܹܗ:

ܒܸܬ ܝܵܗ݇ܒܹܢܘܼܟ݂ ܡܸܢܕܝܼܵܢܹ̈ܐ ܡܩܘܼܕܫܹ̈ܐ ܘܡܗܘܼܡܢܹ̈ܐ ܕܝܘܼܗ݇ܒܸܠ ܠܝܼ ܠܕܵܘܝܼܕ.#ܐܫܥܝܐ 55‏:3

35”ܒܚܕܵܐ ܕܘܼܟܵܐ ܐ݇ܚܹܪ݇ܬܵܐ ܟܬܝܼܒ݂ܬܵܐ ܝܠܵܗ̇:

ܠܹܐ ܫܵܒ݂ܩܹܬ ܩܲܕܝܼܫܘܼܟ݂ ܕܚܵܙܹܐ ܚܪܵܒ݂ܵܐ.#ܡܙܡܘܪ̈ܐ 16‏:10

36”ܕܵܘܝܼܕ ܒܕܵܘܪܵܐ ܕܓܵܢܹܗ ܦܠܝܼܚ ܠܹܗ ܘܬܘܼܡܸܡ ܠܹܗ ܨܸܒ݂ܝܵܢܵܐ ܕܐܲܠܵܗܵܐ، ܕܡܝܼܟ݂ ܠܹܗ، ܘܦܝܼܫ ܠܹܗ ܩܒ݂ܝܼܪܵܐ ܥܲܡ ܐܲܒ݂ܵܗܵܬܹ̈ܗ ܘܚܪܝܼܒ݂ ܠܹܗ ܦܲܓ݂ܪܹܗ. 37”ܐܝܼܢܵܐ ܗ̇ܘ ܕܐܲܠܵܗܵܐ ܡܘܼܩܸܡ ܠܹܗ ܡ̣ܢ ܓܵܘ ܡܝܼܬܹ̈ܐ ܦܲܓ݂ܪܹܗ ܠܵܐ ܚܪܝܼܒ݂ ܠܹܗ. 38”ܒܵܥܹܝܢ ܕܝܵܕܥܝܼܬܘܿܢ، ܐ݇ܢܵܫܹ̈ܐ ܐܲܚܘܿܢܘܵܬܝܼ̈، ܒܐܵܗܵܐ ܝܼܫܘܿܥ ܦܝܵܫܵܐ ܝܠܹܗ ܡܘܼܟܪܸܙܵܐ ܐܸܠܵܘܟ݂ܘܿܢ ܦܘܼܚܵܠܵܐ ܕܚܛܝܼܵܬܹ̈ܐ. 39”ܘܟܠ ܡ̇ܢ ܕܗܲܡܸܢ ܒܝܼܹܗ ܒܸܬ ܦܵܐܹܫ ܡܘܼܟܫܸܛܵܐ ܡ̣ܢ ܟܠ ܡܸܢܕܝܼ ܕܢܵܡܘܿܣܵܐ ܕܡܘܼܫܹܐ ܠܵܐ ܡܨܹܐ ܠܹܗ ܡܲܟܫܸܛ ܠܵܘܟ݂ܘܿܢ. 40”ܒܘܼܬ ܐܵܗܵܐ ܗܘܹܝܡܘܼܢ ܗܸܫܝܵܪ ܕܠܵܐ ܐܵܬܹܐ ܥܲܠܵܘܟ݂ܘܿܢ ܡܸܢܕܝܼ ܕܦܝܼܫ ܠܹܗ ܐ݇ܡܝܼܪܵܐ ܒܝܲܕ ܢܒ݂ܝܼܹ̈ܐ:

41ܓܲܫܩܘܼܢ ܡܲܣܚܸܪ̈ܵܢܹܐ، ܥܲܓ̰ܒܘܼܢ ܘܛܠܘܿܩܘܼܢ، ܣܵܒܵܒ ܒܸܬ ܥܵܒ݂ܕܹܢ ܚܲܕ ܡܸܢܕܝܼ ܒܝܵܘܡܵܢܵܘ̈ܟ݂ܘܿܢ، ܕܠܹܐ ܗܲܡܸܢܝܼܬܘܿܢ ܐܸܢ ܐ݇ܢܵܫܵܐ ܗܲܩܹܐ ܠܵܘܟ݂ܘܿܢ.“#ܚܒ݂ܩܘܩ 1‏:5

42ܟܲܕ ܦܵܘܠܘܿܣ ܘܒܲܪܢܒ݂ܵܐ ܒܸܦܠܵܛܵܐ ܝܗ݇ܘܵܘ ܡ̣ܢ ܟܢܘܼܫܬܵܐ، ܛܠܝܼܒ ܠܗܘܿܢ ܡܸܢܲܝܗܝ ܐ݇ܢܵܫܹ̈ܐ ܕܐܵܬܝܼ ܗ݇ܘܵܘ ܘܗܲܡܙܸܡܝܼ ܗ݇ܘܵܘ ܐܸܠܲܝܗܝ ܐܲܝܟ݂ ܐܲܢܹܐ ܗܹܡܸܙܡܵܢܹ̈ܐ ܒܫܲܒܬܵܐ ܐ݇ܚܹܪ݇ܬܵܐ. 43ܪܵܒܵܐ ܡ̣ܢ ܝܗܘܼܕܵܝܹ̈ܐ ܘܐܘܼܦ ܩܠܝܼܒܵܝܹ̈ܐ ܙܵܕܥܵܢܹ̈ܐ ܡ̣ܢ ܐܲܠܵܗܵܐ ܐ݇ܙܝܼܠ ܠܗܘܿܢ ܒܵܬ݇ܪ ܦܵܘܠܘܿܣ ܘܒܲܪܢܒ݂ܵܐ ܡ̣ܢ ܒܵܬ݇ܪ ܕܚܬܝܼܡ ܠܵܗ̇ ܚܸܠܡܲܬ ܕܟܢܘܼܫܬܵܐ. ܘܐܲܢܹܐ ܗܲܡܙܸܡܝܼ ܗ݇ܘܵܘ ܥܲܡܲܝܗܝ ܘܡܲܩܘܝܼ ܗ݇ܘܵܘ ܠܗܘܿܢ ܒܫܵܦܵܩܲܬ ܕܐܲܠܵܗܵܐ. 44ܒܫܲܒܬܵܐ ܐ݇ܚܹܪ݇ܬܵܐ ܚܲܕ݇ܟ̰ܵܐ ܦܵܝܫܵܐ ܟܠܵܗ̇ ܡܕܝܼܢ݇ܬܵܐ ܓ̰ܡܝܼܥ ܠܗܘܿܢ ܠܸܫܡܵܥܵܐ ܗܹܡܸܙܡܵܢ ܕܡܵܪܝܵܐ. 45ܐܝܼܢܵܐ ܐܝܼܡܲܢ ܕܚܙܹܐ ܠܗܘܿܢ ܝܗܘܼܕܵܝܹ̈ܐ ܠܟܸܢܫܹ̈ܐ، ܦܝܼܫ ܠܗܘܿܢ ܡܸܠܝܹܐ ܒܲܚܸܠܵܢܘܼܬܵܐ، ܘܗܘܼܡܙܸܡ ܠܗܘܿܢ ܕܲܠܩܘܼܒ݂ܠ ܡܸܢܕܝܼܵܢܹ̈ܐ ܕܗܲܡܙܘܼܡܲܝ ܝܗ݇ܘܵܐ ܦܵܘܠܘܿܣ، ܘܓܕܝܼܦ ܠܗܘܿܢ.

46ܗ̇ܝܓܵܗ ܓ̰ܘܼܘܸܒ ܠܗܘܿܢ ܦܵܘܠܘܿܣ ܘܒܲܪܢܒ݂ܵܐ ܒܓ̰ܘܼܪܐܲܬ، ܘܐ݇ܡܝܼܪܗܘܿܢ، ”ܘܵܠܹܐ ܝܗ݇ܘܵܐ ܕܩܵܕ݇ܡܵܝܬܵܐ ܐܸܠܵܘܟ݂ܘܿܢ ܡܲܟܪܸܙܲܚ ܗ݇ܘܵܘ ܗܹܡܸܙܡܵܢ ܕܐܲܠܵܗܵܐ، ܐܝܼܢܵܐ ܣܵܒܵܒ ܠܹܐ ܝܬܘܿܢ ܩܲܒܘܼܠܘܼܗ̇ ܘܡܫܘܼܪܸܪܵܘܟ݂ܘܿܢ ܥܲܠ ܓܵܢܵܘܟ݂ܘܿܢ ܕܠܹܐ ܚܵܫܚܝܼܬܘܿܢ ܠܚܲܝܹ̈ܐ ܕܠܥܵܠܲܡ، ܒܸܬ ܐܵܙܲܠ݇ܚ ܘܡܲܟܪܸܙܲܚ ܠܐܸܡܘܵܬܹ̈ܐ. 47”ܣܵܒܵܒ ܗܲܕܟ݂ܵܐ ܦܩܝܼܕ ܠܹܗ ܐܸܠܲܢ ܡܵܪܲܢ، ܒܹܐܡܵܪܵܐ:

ܥܒ݂ܝܼܕ ܠܝܼ ܐܸܠܘܼܟ݂ ܒܲܗܪܵܐ ܠܐܸܡܘܵܬܹ̈ܐ، ܕܗܵܘܹܝܬ ܦܘܼܪܩܵܢܵܐ ܗܲܠ ܡܲܪ̈ܙܵܢܹܐ ܕܐܲܪܥܵܐ.“#ܐܫܥܝܐ 49‏:6

48ܐܝܼܡܲܢ ܕܫܡܝܼܥ ܠܗܘܿܢ ܐܸܡܘܵܬܹ̈ܐ، ܚܕܹܐ ܠܗܘܿܢ، ܘܚܩܝܼܪܗܘܿܢ ܠܗܹܡܸܙܡܵܢ ܕܡܵܪܝܵܐ، ܘܗܘܼܡܸܢܗܘܿܢ ܟܠܲܝܗܝ ܐܵܢܝܼ ܕܦܝܼܫܹܐ ܝܗ݇ܘܵܘ ܓܘܼܒܝܹܐ ܠܚܲܝܹ̈ܐ ܕܠܥܵܠܲܡ. 49ܘܦܪܝܼܣ ܠܵܗ̇ ܗܹܡܸܙܡܵܢ ܕܡܵܪܝܵܐ ܒܟܠܹܗ ܗ̇ܘ ܐܲܬܪܵܐ. 50ܐܝܼܢܵܐ ܝܗܘܼܕܵܝܹ̈ܐ ܚܘܼܦܸܛ ܠܗܘܿܢ ܠܒܲܟ݂ܬܵܬܹ̈ܐ ܡܝܘܼܩܪܹ̈ܐ ܙܵܕܥܵܢܹ̈ܐ ܡ̣ܢ ܐܲܠܵܗܵܐ، ܘܠܪܹ̈ܫܵܢܹܐ ܕܡܕܝܼܢ݇ܬܵܐ، ܘܗܲܕܟ݂ܵܐ ܡܘܼܩܸܡ ܠܗܘܿܢ ܪܕܘܼܦܝܵܐ ܥܲܠ ܦܵܘܠܘܿܣ ܘܥܲܠ ܒܲܪܢܒ݂ܵܐ، ܘܦܘܼܠܛܲܝ ܠܗܘܿܢ ܡ̣ܢ ܬܚܘܼܡܲܝ̈ܗܝ. 51ܐܵܢܝܼ ܟܲܕ ܦܠܝܼܛ ܠܗܘܿܢ ܢܦܝܼܨ ܠܗܘܿܢ ܥܲܦܪܵܐ ܡ̣ܢ ܐܲܩܠܵܬܲܝ̈ܗܝ ܘܐ݇ܙܝܼܠ ܠܗܘܿܢ ܠܐܝܼܩܵܢܘܿܢ. 52ܘܬܲܠܡܝܼ̈ܕܹܐ ܦܝܼܫ ܠܗܘܿܢ ܡܸܠܝܹܐ ܚܲܕܘܼܬܵܐ ܘܪܘܼܚܵܐ ܕܩܘܼܕܫܵܐ.

Currently Selected:

ܣܘܥܪ̈ܢܐ 13: ABTAB

Highlight

Copy