ܐ. ܩܘܪ̈ܢܬܝܐ 2
2
ܡܲܟܪܘܼܙܹܐ ܡܫܝܼܚܵܐ ܡܸܚܝܵܐ ܠܙܩܝܼܦܵܐ
1ܐܲܚܘܿܢܘܵܬܝܼ̈، ܐܝܼܡܲܢ ܕܐ݇ܬܹܐ ܠܝܼ ܠܟܸܣ ܠܵܘܟ݂ܘܿܢ ܡܲܟܪܘܼܙܹܐ ܐܸܠܵܘܟ݂ܘܿܢ ܐ݇ܪܵܙܵܐ ܕܐܲܠܵܗܵܐ، ܠܵܐ ܐ݇ܬܹܐ ܠܝܼ ܒܡܲܡܠܠܵܐ ܓܘܼܪܵܐ ܘܠܵܐ ܒܚܸܟ݂ܡܬܵܐ ܓܘܼܪܬܵܐ، 2ܣܵܒܵܒ ܩܛܝܼܥ ܠܝܼ ܒܚܝܼܵܠܝܼ، ܟܲܕ ܐܵܢܵܐ ܥܲܡܵܘܟ݂ܘܿܢ ܕܠܹܐ ܝܵܕܥܹܢ ܡܸܢܕܝܼ ܫܒ݂ܘܿܩ ܡ̣ܢ ܝܼܫܘܿܥ ܡܫܝܼܚܵܐ، ܘܐܸܠܹܗ ܡܸܚܝܵܐ ܠܙܩܝܼܦܵܐ. 3ܗܘܹܐ ܠܝܼ ܠܟܸܣ ܠܵܘܟ݂ܘܿܢ ܒܙܲܒܘܼܢܘܼܬܵܐ، ܘܒܙܕܘܼܥܬܵܐ ܘܒܪܲܬܪܲܬܬܵܐ ܓܘܼܪܬܵܐ. 4ܘܗܹܡܸܙܡܵܢܝܼ̈ ܘܟܵܪܘܿܙܘܼܬܝܼ ܠܹܐ ܝܗ݇ܘܵܘ ܠܡܲܨܒ݂ܘܼܥܹܐ ܐܸܠܵܘܟ݂ܘܿܢ ܒܚܸܟ݂ܡܬܵܐ، ܐܝܼܢܵܐ ܒܡܲܚܙܵܝܬܵܐ ܕܪܘܼܚܵܐ ܘܕܚܲܝܠܵܐ، 5ܩܵܐ ܕܗܲܝܡܵܢܘܼܬܵܘܟ݂ܘܿܢ ܠܵܐ ܗܵܘܝܵܐ ܒܢܝܼܬܵܐ ܥܲܠ ܚܸܟ݂ܡܬܵܐ ܕܒܢܲܝ̈ܢܵܫܵܐ، ܐܸܠܵܐ ܥܲܠ ܚܲܝܠܵܐ ܕܐܲܠܵܗܵܐ.
ܓܸܠܝܵܢܵܐ ܒܝܲܕ ܪܘܼܚܵܐ ܕܐܲܠܵܗܵܐ
6ܟܹܐ ܗܲܡܙܸܡܲܚ ܗܹܡܸܙܡܵܢܹ̈ܐ ܕܚܸܟ݂ܡܬܵܐ ܒܹܝܠ ܓܡܝܼܪܹ̈ܐ، ܐܝܼܢܵܐ ܠܵܐ ܚܸܟ݂ܡܬܵܐ ܕܐܵܗܵܐ ܙܲܒ݂ܢܵܐ ܘܠܵܐ ܕܓܘܼܪ̈ܵܢܹܐ ܕܐܵܗܵܐ ܙܲܒ݂ܢܵܐ، ܐܵܢܝܼ ܕܦܝܵܫܵܐ ܝܢܵܐ ܒܘܼܛܠܹܐ. 7ܐܝܼܢܵܐ ܟܹܐ ܗܲܡܙܸܡܲܚ ܚܸܟ݂ܡܬܵܐ ܕܐܲܠܵܗܵܐ ܒܐ݇ܪܵܙܵܐ، ܗ̇ܝ ܕܝܼܗ݇ܘܵܐ ܡܘܼܟܸܣܬܵܐ، ܗ̇ܝ ܕܐܲܠܵܗܵܐ ܦܪܝܼܫܵܐ ܠܹܗ ܡ̣ܢ ܩܵܕ݇ܡ ܫܘܼܪܵܝܵܐ ܕܙܲܒ݂ܢܵܐ ܠܚܸܩܪܵܐ ܕܝܼܲܢ، 8ܗ̇ܝ ܕܐܘܼܦ ܚܲܕ ܡ̣ܢ ܓܘܼܪ̈ܵܢܹܐ ܕܐܵܗܵܐ ܙܲܒ݂ܢܵܐ ܠܵܐ ܝ݇ܕܝܼܥܵܐ ܠܹܗ. ܐܸܢ ܗܵܘܝܼ ܗ݇ܘܵܘ ܝ݇ܕܝܼܥܘܼܗ̇، ܠܹܐ ܙܵܩܦܝܼ ܗ݇ܘܵܘ ܠܡܵܪܵܐ ܕܬܸܫܒܘܿܚܬܵܐ. 9ܐܲܝܟ݂ ܕܝܼܠܹܗ ܟܬܝܼܒ݂ܵܐ:
ܥܲܝܢܵܐ ܠܹܐ ܝܠܵܗ̇ ܚܙܝܼܬܵܐ، ܘܢܵܬܵܐ ܠܹܐ ܝܠܵܗ̇ ܫܡܝܼܥܬܵܐ، ܘܓܵܘ ܗܵܘܢܵܐ ܕܒܲܪܢܵܫܵܐ ܠܹܐ ܝܢܵܐ ܥܒ݂ܝܼܪܹܐ، ܡܸܢܕܝܼܵܢܹ̈ܐ ܕܐܲܠܵܗܵܐ ܗܘܼܕܪܲܝ ܠܹܗ ܠܐܵܢܝܼ ܕܡܲܚܸܒܝܼ ܠܹܗ.#ܐܫܥܝܐ 64:4
10ܐܝܼܢܵܐ ܐܲܠܵܗܵܐ ܓܸܠܝܲܝ ܠܹܗ ܐܸܠܲܢ ܒܝܲܕ ܪܘܼܚܹܗ، ܣܵܒܵܒ ܪܘܼܚܵܐ ܠܟܠ ܡܸܢܕܝܼ ܟܹܐ ܨܲܚܨܹܐ، ܐܘܼܦ ܠܡܸܢܕܝܼܵܢܹ̈ܐ ܥܲܡܘܼܩܹ̈ܐ ܕܐܲܠܵܗܵܐ. 11ܣܵܒܵܒ ܡܵܢܝܼ ܡ̣ܢ ܒܢܲܝ̈ܢܵܫܵܐ ܟܹܐ ܝܵܕܹܥ ܪܸ̈ܥܝܵܢܹܐ ܕܐ݇ܢܵܫܵܐ ܫܒ݂ܘܿܩ ܡ̣ܢ ܪܘܼܚܵܐ ܕܐ݇ܢܵܫܵܐ ܕܝܼܠܵܗ̇ ܓܵܘܹܗ؟ ܗܲܕܟ݂ܵܐ ܐܘܼܦ ܚܲܕ ܠܹܐ ܝܵܕܹܥ ܪܸ̈ܥܝܵܢܹܐ ܕܐܲܠܵܗܵܐ ܫܒ݂ܘܿܩ ܡ̣ܢ ܪܘܼܚܵܐ ܕܐܲܠܵܗܵܐ. 12ܐܝܼܢܵܐ ܐܲܚܢܲܢ ܠܵܐ ܩܘܼܒܸܠ ܠܲܢ ܪܘܼܚܵܐ ܕܐܵܗܵܐ ܕܘܼܢܝܹܐ ܐܸܠܵܐ ܪܘܼܚܵܐ ܕܡ̣ܢ ܐܲܠܵܗܵܐ، ܩܵܐ ܕܝܵܕܥܲܚ ܠܡܵܘܗܒ݂ܵܬܹ̈ܐ ܕܐܲܠܵܗܵܐ ܝܘܼܗ݇ܒܲܝ ܠܹܗ ܐܸܠܲܢ. 13ܘܐܘܼܦ ܐܲܚܢܲܢ ܟܹܐ ܗܲܡܙܸܡܲܚ ܒܘܼܬ ܐܵܢܝܼ ܡܸܢܕܝܼܵܢܹ̈ܐ، ܠܵܐ ܒܗܹܡܸܙܡܵܢܹ̈ܐ ܡܘܼܠܦܹܐ ܐܸܠܲܢ ܒܝܲܕ ܚܸܟ݂ܡܬܵܐ ܕܒܲܪܢܵܫܵܐ، ܐܸܠܵܐ ܒܗܹܡܸܙܡܵܢܹ̈ܐ ܡܘܼܠܦܹܐ ܒܝܲܕ ܪܘܼܚܵܐ، ܘܗܲܕܟ݂ܵܐ ܦܲܫܩܲܚ ܫܪܵܪܵܐ ܪܘܼܚܵܢܵܝܵܐ ܒܝܲܕ ܚܲܒܪܹ̈ܐ ܪ̈ܘܼܚܵܢܵܝܹܐ. 14ܐ݇ܢܵܫܵܐ ܕܠܵܐ ܦܲܪܡܵܝܬܵܐ ܪܘܼܚܵܢܵܝܬܵܐ ܠܹܐ ܡܵܨܹܐ ܩܲܒܸܠ ܡܸܢܕܝܼܵܢܹ̈ܐ ܕܟܹܐ ܐܵܬܝܼ ܡ̣ܢ ܪܘܼܚܵܐ ܕܐܲܠܵܗܵܐ، ܣܵܒܵܒ ܣܲܟ݂ܠܘܼܬܵܐ ܝܢܵܐ ܠܟܸܣ ܠܹܗ، ܘܠܹܐ ܡܵܨܹܐ ܦܲܪܡܹܐ ܠܗܘܿܢ ܣܵܒܵܒ ܒܪܘܼܚܵܐ ܟܹܐ ܦܵܝܫܝܼ ܕܝܼܢܹܐ. 15ܐ݇ܢܵܫܵܐ ܪܘܼܚܵܢܵܝܵܐ ܟܹܐ ܕܵܐܹܢ ܟܠܲܝܗܝ ܡܸܢܕܝܼܵܢܹ̈ܐ، ܐܝܼܢܵܐ ܒܓܵܢܹܗ ܠܹܐ ܝܠܹܗ ܬܚܘܿܬ ܕܝܵܢܬܵܐ ܕܐܘܼܦ ܚܲܕ.
16ܣܵܒܵܒ ܡܵܢܝܼ ܟܹܐ ܝܵܕܹܥ ܪܸܥܝܵܢܵܐ ܕܡܵܪܝܵܐ ܩܵܐ ܕܡܲܠܸܦ ܠܹܗ؟#ܐܫܥܝܐ 40:13
ܐܝܼܢܵܐ ܐܲܚܢܲܢ ܐܝܼܬ ܠܲܢ ܪܸܥܝܵܢܵܐ ܕܡܫܝܼܚܵܐ.
Currently Selected:
ܐ. ܩܘܪ̈ܢܬܝܐ 2: ABTAB
Highlight
Share
Copy
Want to have your highlights saved across all your devices? Sign up or sign in
Aramaic Bible Translation Assyrian Bible © 2025 Aramaic Bible Translation
