Diskwedhyans 6
6
An Selyow
1Ha my a welas pan igoras an Oen onan a'n seyth sel, ha my a glewas onan a'n peswar kreatur bew ow leverel, kepar dell veu gans son taran, ‘Deus!’ 2Ha my a welas, hag otta, margh gwynn, ha gwarak gans neb o esedhys warnodho, ha kurun a veu res dhodho, hag ev eth dhe-ves ow fetha ha dhe fetha.
3Ha pan igoras an nessa sel, my a glewas an nessa kreatur bew ow leverel, ‘Deus.’ 4Ha margh arall eth yn-mes, onan rudh, ha grontys veu dhe neb o esedhys warnodho kemmeres kres yn-mes a'n norvys, may latthens i an eyl y gila, ha kledha meur a veu res dhodho.
5Ha pan igoras an tressa sel, my a glewas an tressa kreatur bew ow leverel, ‘Deus.’ Ha my a welas hag otta, margh du, ha neb o esedhys warnodho ow synsi mantol yn y dhorn. 6Ha my a glewas kepar dell ve lev yn mysk an peswar kreatur bew ow leverel, ‘Kwart a waneth rag diner ha tri hwart a varlys rag diner, ha na wra pystiga an olew ha'n gwin.’
7Ha pan igoras an peswora sel my a glewas lev an peswora kreatur bew ow leverel, ‘Deus.’ 8Ha my a welas, hag otta, margh glas; ha hanow neb o esedhys warnodho o Ankow, hag ifarn a siwyas ganso. Ha galloes a veu res dhedha war beswora rann an norvys dhe ladha gans kledha, ha gans divoetter, gans mernans ha gans bestes an norvys.
9Ha pan igoras an pympes sel, my a welas yn-dann an alter enevow an re o ledhys rag ger Duw ha rag an dustuni esa gansa i: 10Hag i a armas, ughel aga lev, ow leverel, ‘Pygemmys prys, A Arloedh sans ha gwir, na vreusydh na diella agan goes war an re a drig war an norvys?’ 11Ha pows wynn a veu res dhe bubonan anedha, hag y feu leverys dhedha i dhe bowes a dermyn berr moy, bys may fe kowlwrys ynwedh niver aga heswesyon ha'ga breder a vedha ledhys kepar dell vons i ledhys kekeffrys.
12Ha my a welas pan igoras an hweghves sel, ha dorgrys bras a hwarva ha'n howl a dhuhas kepar ha saghlenn blew ha'n loer leun eth kepar ha goes. 13Ha ster an nev a goedhas bys y'n dor, kepar dell dewl figbrenn y figys kriv pan yw shakys gans gwyns bras. 14Ha'n nev eth dhe-ves kepar ha rol-skrifa ow pos rolys war-barth, ha pub menydh hag ynys a veu removyes yn-mes a'y le. 15Ha myghternedh an norvys ha'n dus vras, ha hembrenkysi luyow, ha'n dus rych, ha'n dus krev, ha pub den keth ha den rydh a omgudhas yn mogowyow hag yn karregi an menydhyow. 16Hag i a leveris dhe'n menydhyow ha dhe'n karregi, ‘Koedhewgh warnan ha kudhewgh ni dhiworth an fas a neb yw esedhys war an tron, ha dhiworth sorr an Oen’, 17rag devedhys yw dydh meur aga sorr, ha piw a yll sevel?
Currently Selected:
Diskwedhyans 6: ABK
Highlight
Share
Copy
Want to have your highlights saved across all your devices? Sign up or sign in
© Kesva an Taves Kernewek 2004, 2023
© Cornish Language Board 2004, 2023