Diskwedhyans 2
2
An Messaj dhe Efesus
1‘Dhe el an eglos yn Efesus skrif: Neb a syns an seyth sterenn yn y dhorn dhyghow ha kerdhes yn mysk an seyth kantoler owrek a lever an taklow ma:
2‘My a aswonn dha wriansow ha'th lavur ha'th perthyans, ha fatell na yllydh godhav tus dhrog, ha ty re brovas an re a lever aga bos abesteli heb bos yndellma, ha kavoes aga bos gowygyon. 3Yma genes perthyans; ty a wodhevis a-barth ow hanow, ha nyns osta skwithys. 4Byttegyns yma genev neppyth er dha bynn: ty re asas dha gerensa, kepar dell vedha wostalleth. 5Kovha, ytho, le may koedhsys anodho, ha kemmer edrek ha gwra an oberow dell wrussys kyns; poken dos dhiso yn skon a vynnav, ha gorra dha gantolbrenn mes a'y le, mar ny gemmerydh edrek. 6Mes an dra ma yma genes, ty dhe gasa gwriansow an Nikolaitanys a gasav vy ynwedh. 7Neb a'n jeffo skovarn, klewes ev an pyth a lever an Spyrys dhe'n eglosyow. Dhodho ev a fettho, my a re dhe dhybri a'n wydhenn a vewnans usi yn mysk paradhis Duw.
An Messaj dhe Smyrna
8‘Ha dhe el an eglos yn Smyrna skrif: An taklow ma a lever an kynsa ha'n diwettha, a veu marow, ha devedhys yw dhe vewnans:
9‘My a aswonn dha wriansow ha'th halar#2:9 My a aswonn dha wriansow ha'th halar: War-lergh re a'n dornskrifow My a aswonn dha alar ha'th wriansow. ha'th voghosogneth (mes rych osta) ha my a aswonn blasfemi an re a lever aga bos Yedhewon, heb bos yndella, mes synaga Satnas yns i. 10Na borth own a nagonan a'n taklow na a wredh godhav. Otta, an jowl a wra tewlel re ahanowgh yn prison may fewgh prevys, ha galar a'gas bydh deg dydh. Bydh len bys yn ankow, ha kurun bewnans dhiso a rov. 11Neb a'n jeffo skovarn, klewes ev an pyth a lever an Spyrys dhe'n eglosyow. Seul a fettho ny vydh pystigys der an nessa mernans.
An Messaj dhe Pergamum
12‘Ha dhe el an eglos yn Pergamum skrif: An taklow ma a lever ev ha ganso an kledha lymm dewvinyek:
13‘My a aswonn le mayth esos trigys,#2:13 My a aswonn le mayth esos trigys: War-lergh re a'n dornskrifow, My a aswonn dha wriansow ha le mayth esos trigys. le mayth usi tron Satnas, ha ty a syns ow hanow yn fast ha ny wrussys nagha ow fydh hwath y'n dydhyow na may feu ledhys Antipas ow merther len yn agas mysk, le may trig Satnas. 14Mes yma genev nebes taklow er dha bynn, rag yma genes ena an re a syns dyskas Balaam a dhyskas dhe Balak gorra maglenn a-dherag mebyon Ysrael dhe dhybri taklow offrynnys dhe idolys ha gul fornikasyon. 15Yndella ty ynwedh a'th eus re a syns dyskas an Nikolaitanys.#2:15 an Nikolaitanys: War-lergh re a'n dornskrifow an Nikolaitanys, an pyth a gasav. 16Kemmer edrek; poken dos dhiso yn skon a vynnav hag omladh er aga fynn gans kledha ow ganow. 17Seul a'n jeffo skovarn, klewes ev an pyth a lever an Spyrys dhe'n eglosyow. Dhe neb a fettho y rov a'n manna kudhys dhe dhybri, ha ganso ev men gwynn a rov hag y'n men hanow nowydh skrifys, nag aswonn denvyth marnas ev a'n degemmer.
An Messaj dhe Thyatira
18‘Ha dhe el an eglos yn Thyatira skrif: An taklow ma a lever Mab Duw a'n jeves dewlagas kepar ha flamm a dan, ha treys kepar ha brest fin:
19‘My a aswonn dha wriansow ha'th kerensa ha'th fydh ha'th wasonieth ha'th perthyans; ha'th wriansow wortiwedh yw moy es dha wriansow wor'talleth. 20Byttegyns, yma genev hemma er dha bynn: ty dhe asa an venyn na Yezebel a elow hy honan profoeses dhe dhyski ha dynya ow gwesyon dhe wul fornikasyon ha dybri taklow offrynnys dhe idolys. 21Ha spas a res vy dhedhi dhe gemmeres edrek, mes ny vynn hi kemmeres edrek a'y fornikasyon. 22Otta, my a's tewl yn gweli, ha'n re na a wra avoutri gensi yn galar meur, mar ny gemmerons edrek a'ga gwriansow. 23Ha my a ladh hy fleghes yn farow; ha'n eglosyow oll a wra godhvos ow bos neb a hwila an lonethi ha'n kolonnow: hag y rov dhywgh hwi pubonan war-lergh agas gwriansow. 24Mes dhywgh hwi y lavarav, ha dhe'n re erell yn Thyatira, dhe vyns na'n jeffo an dyskas ma, na wodhva, dell leverons, downderyow Satnas: ny worrav warnowgh begh arall. 25Mes an pyth usi genowgh seulabrys synsewgh ev fast erna dhyffiv. 26Ha dhe neb a fettho ha gwitha ow gwriansow bys y'n diwedh,
my a re galloes war an kenedhlow,
27dh'aga rewlya gans gwelenn horn,
kepar ha lestri pri, y fydhons i terrys dhe demmyn,
28kepar dell dhegemmeris vy dhiworth ow Thas; my ynwedh a re dhodho an Vorlowenn. 29Neb a'n jeves skovarn, klewes ev an pyth a lever an Spyrys dhe'n eglosyow.
Currently Selected:
Diskwedhyans 2: ABK
Highlight
Share
Copy
Want to have your highlights saved across all your devices? Sign up or sign in
© Kesva an Taves Kernewek 2004, 2023
© Cornish Language Board 2004, 2023