Lavarow Koth 2
2
Talvosogeth Furneth
1Ow mab, mar tegemmerydh ow geryow
ha gwitha ow gorhemmynnow avel tresor genes,
2ow kul dha skovarn hewoel dhe furneth
hag ow gidya dha golonn dhe gonvedhes;
3mar kriydh devri war-lergh galloes dissernya,
ha drehevel dha lev rag konvedhes,
4mara'n hwilydh avel arghans
hag assaya y gavoes avel tresor kudhys,
5ena ty a gonvedh own an Arloedh
ha kavoes aswonnvos a Dhuw.
6Rag an Arloedh a re furneth,
a'y anow y teu godhvos ha konvedhes,
7ev a with kusul len rag an re ewnhynsek;
ev yw skoes dhe'n re hag a gerdh yn tivlam,
8ow kwitha fordhow gwirvreus
hag ow kwitha fordhow y syns.
9Ena ty a gonvedh gwiryonedh ha gwirvreus,
hag ewnder – pub hyns da;
10rag furneth a dheu a-ji y'th holonn,
ha godhvos a vydh hweg dhe'th enev.
11Doethter a with warnas;
konvedhes a wra dha witha,
12orth dha dhelivra dhiworth an fordh a dhrog,
dhiworth an gour hag a gews yn treus,
13an dus a forsak an hynsyow a ewnder
rag kerdhes y'n hynsyow a dewlder,
14neb a lowenha ow kul drog,
hag a gyv plesour yn drogober treus,
15tus yw kamm aga hynsyow
ha gwius aga fordhow.
16Furneth a'th saw dhiworth an venyn estren,#2:16 venyn estren: Benyn nag yw Ysraelyades, ytho nag yw kelmys yn-dann an Kevambos. Yndella an styr omma yw avoutres, hora.
a'n estrenes ha'y geryow medhel,
17neb a forsak koweth hy yowynkneth
hag a ankev kevambos hy Duw,
18rag hy fordh#2:18 hy fordh: Ebrow hy chi. Amendys war-lergh 7:27, hag ow kwitha an gettuoleth. Ny yll hy chi (gorow yn Ebrow) bos sojet an verb (benow yn Ebrow). a dhiyskynn dhe ankow,
ha'y hynsyow dhe spyrysyon an re varow;
19an re neb a dheu dhedhi, ny dhehwelons arta,
na ny dhrehedhons dhe hynsyow bewnans.
20Rakhenna ty a gerdh yn fordh an dus vas,
ha holya hynsyow tus wiryon.
21Rag an re ewn a drig y'n vro,
ha'n re dhinamm a bes ynni;
22mes an debeles a vydh terrys dhiworth an vro,
ha'n falswesyon a vydh terrys dhe-ves anedhi.
© Kesva an Taves Kernewek 2026
© Cornish Language Board 2026