Niverow 2
2
Towlow rag an Kampow ha'n Kerdhow
1An Arloedh a leveris dhe Moyses hag Aron, 2‘Mebyon Ysrael a wra kampya peub ryb y vaner y honan, gans toknys chiow aga thasow; i a wra kampya a-dal tylda an kuntelles a bub tu. 3An re ow kampya war denewen an est, war-tu ha'n howldrehevel, a vydh a vaner an kamp a Yuda herwydh aga luyow; ha hembrenkyas mebyon Yuda a vydh Nahshon mab Amminadab. 4Y lu, dell veu niverys, a veu peswardhek ha tri-ugens a vilyow, hwegh kans. 5An re a gamp rybdho a vydh loeth Yssakar; ha hembrenkyas mebyon Yssakar a vydh Nethanel mab Suar; 6ha'y lu, dell veu niverys, a veu peswardhek ha dew-ugens a vilyow, peswar kans. 7Ena loeth Zebulun; ha hembrenkyas mebyon Zebulun a vydh Eliab mab Helon. 8Y lu, dell veu niverys, a veu seytek ha dew-ugens a vilyow, peswar kans. 9Niver kowal kamp Yuda, herwydh aga luyow, yw kans, hwegh ha peswar-ugens a vilyow, peswar kans. I a wra mos yn kynsa war an kerdh.
10‘Dhe'n barth dhyghow y fydh baner kamp Rewben, herwydh aga luyow; ha hembrenkyas mebyon Rewben a vydh Elisur mab Shedeur. 11Y lu, dell veu niverys, a veu hwegh ha dew-ugens a vilyow, pymp kans. 12An re ow kampya rybdho a vydh loeth Simeon; ha hembrenkyas mebyon Simeon a vydh Shelumiel mab Surishadday. 13Y lu, dell veu niverys, a veu nownsek ha dew-ugens a vilyow, trihans. 14Ena loeth Gad; hembrenkyas mebyon Gad a vydh Eliasaf mab Reuel. 15Y lu, dell veu niverys, a veu pymp ha dew-ugens a vilyow, hwegh kans ha hanter-kans. 16Niver kowal kamp Rewben herwydh aga luyow, yw kans, unnek ha dew-ugens a vilyow, peswar kans ha hanter-kans. I a wra mos yn nessa war an kerdh.
17‘Ena tylda an kuntelles a wra mos war an kerdh, gans kamp an Levysi yn mysk an kampow; dell gampyons, yndellma i a wra mos war an kerdh, peub yn y le, ryb y vaner.
18‘War-tu ha'n howlsedhes y fydh baner kamp Efraym herwydh aga luyow; ha hembrenkyas mebyon Efraym a vydh Elishama mab Ammihud, 19Y lu, dell veu niverys, a veu dew-ugens mil ha pymp kans. 20Ha rybdho y fydh loeth Manasse; ha hembrenkyas mebyon Manasse a vydh Gamaliel mab Pedahsur. 21Y lu, dell veu niverys, a veu dewdhek warn ugens a vilyow, dew kans. 22Ena loeth Benyamin; hembrenkyas mebyon Benyamin a vydh Abidan mab Gideoni. 23Y lu, dell veu niverys, a veu pymthek warn ugens a vilyow, peswar kans. 24Niver kowal kamp Efraym, herwydh aga luyow, yw kans hag eth a vilyow, kans. I a wra mos yn tressa war an kerdh.
25‘War-tu ha'n gledhbarth y fydh baner kamp Dan herwydh aga luyow; ha hembrenkyas mebyon Dan a vydh Ahiezer mab Ammishadday. 26Y lu, dell veu niverys, a veu dew ha tri-ugens a vilyow, seyth kans. 27An re a gamp rybdho a vydh loeth Asher; ha hembrenkyas mebyon Asher a vydh Pagiel mab Okran. 28Y lu, dell veu niverys, a veu onan ha dew-ugens a vilyow, pymp kans. 29Ena loeth Naftali; hembrenkyas mebyon Naftali a vydh Ahira mab Enan. 30Y lu, dell veu niverys, a veu trydhek mil ha dew-ugens ha peswar kans. 31Niver kowal kamp Dan yw kans, seytek ha dew-ugens a vilyow, hwegh kans. I a wra mos yn tiwettha, ryb aga baneryow.’
32An re ma yw mebyon Ysrael dell vons niverys herwydh chiow aga thasow; peub y'n kampow a veu niverys herwydh aga luyow o hwegh kans ha tri a vilyow, pymp kans ha hanter-kans. 33Mes ny veu niverys an Levysi yn mysk mebyon Ysrael, dell worhemmynnis an Arloedh dhe Moyses.
34Ytho mebyon Ysrael a wrug war-lergh pup-tra a worhemmynnis an Arloedh dhe Moyses; yndellma I a gampyas ryb aga baneryow, hag yndellma i a dhallathas war an kerdh, pubonan gans y deylu, herwydh chi y das.
Currently Selected:
Niverow 2: ABK
Highlight
Copy
Compare
Share
Want to have your highlights saved across all your devices? Sign up or sign in
© Kesva an Taves Kernewek 2004, 2024
© Cornish Language Board 2004, 2024