Levitikus 10
10
Nadab hag Abihu
1Ena Nadab hag Abihu, mebyon Aron, a gemmeras, pubonan, y ynkyslester ha gorra tan ynno ha settya ynkys warnodho hag offrynna tan astranj#10:1 astranj: An styr yw ankler; martesen estren, po heb awtorita. dherag an Arloedh, na wrug ev erghi dhedha. 2Ha tan eth yn-mes dhiworth an Arloedh ha'ga howlleski, hag i a verwis dherag an Arloedh. 3Ena yn-medh Moyses dhe Aron, ‘Hemm yw an pyth a gewsis an Arloedh anodho, ow leverel, “My a vydh sanshes der an re a dheu nes dhymm, ha my a vydh glorifiys dherag oll an bobel.” ’ Hag Aron a dewis.
4Ha Moyses a elwis Mishael hag Elsafan, mebyon Uzziel, ewnter Aron, ha leverel dhedha, ‘Dewgh nes, degewgh agas breder a-dhiworth an tyller sans, yn-mes a'n kamp.’ 5Ytho, i a dheuth nes ha'ga doen, gwiskys yn aga fowsyow, yn-mes a'n kamp, dell leveris Moyses. 6Hag yn-medh Moyses dhe Aron ha dhe Eleazar ha dhe Ithamar y vebyon, ‘Na esewgh gols agas pennow dhe gregi lows, na skwardya agas dillas, ma na wryllowgh hwi merwel, ha na dheffo sorr war oll an kuntelles, mes gesewgh agas breder, chi dien Ysrael, dhe oela drefenn an loskvann re wrug an Arloedh. 7Ha ny wrewgh hwi mos yn-mes dhiworth daras tylda an kuntelles, ma na verwowgh hwi; rag yma oyl untyans an Arloedh warnowgh.’ Hag i a wrug war-lergh ger Moyses.
8Ha'n Arloedh a gewsis orth Aron, ow leverel, 9‘Na wrewgh hwi, naneyl ty na'th vebyon, eva gwin na korev pan entrowgh yn tylda an kuntelles, ma na verwowgh. Ordenans vydh bys vykken der agas henedhow, 10dhe dhissernya ynter an pyth yw sans ha'n pyth yw ansans, hag ynter an pyth yw avlan ha'n pyth yw glan; 11ha dhe dhyski dhe vebyon Ysrael oll an ordenansow a leveris an Arloedh dhedha dre leuv Moyses.’
12Moyses a leveris dhe Aron hag Eleazar hag Ithamar, y vebyon a veu gesys: Kemmerewgh an offrynn greun yw gesys a'n offrynnow dhe'n Arloedh dre dan ha'y dhybri heb goell ryb an alter, rag an moyha sans yw. 13Hwi a'n deber yn tyller sans rag yth yw dha rann jy ha rann dha vebyon a'n sakrifisow dre dan dhe'n Arloedh, rag yndella erghys yw dhymmo. 14Ha hwi a dheber an vronn wevys ha mordhos an offrynn drehevys yn tyller glan, ty ha'th vebyon ha'th vyrghes genes, rag yth yns i dha rann jy ha rann dha vebyon, res dhiworth sakrifisow offrynnow kowethyans#10:14 offrynnow kowethyanspo offrynnow kresEbrow: shalom mebyon Ysrael. 15I a dhre mordhos an offrynn drehevys ha'n vronn wevys gans an offrynnow a vlonek gwrys dre dan, dhe wevya rag offrynn gwevys dherag an Arloedh, hag y fydh dhiso jy ha dhe'th vebyon genes avel ordenans bys vykken, dell erghis an Arloedh.
16Ena Moyses a hwilas a-dro dhe vogh an offrynn pegh, hag otta, leskys veu, ha serrys veu gans Eleazar hag Ithamar, mebyon Aron o gesys, ow leverel, 17‘Prag na wrussowgh hwi dybri an offrynn pegh y'n tyller sans? Rag yth yw an moyha sans, y feu res dhywgh dhe berthi kammweyth an kuntelles ha gul dehwelyans ragdha dherag an Arloedh. 18Otta, ny veu an goes anodho dres a-ji dhe'n rann a-bervedh a'n tyller sans. Y koedhvia dhywgh y dhybri y'n tyller sans, dell erghis vy.’ 19Yn-medh Aron dhe Moyses, ‘Otta, hedhyw i re offrynnas aga offrynn pegh ha'ga offrynn leskys dherag an Arloedh; mes taklow avel henna re hwarva dhymmo vy. Mar kwrellen dybri an offrynn pegh hedhyw, a via ev kemmeradow yn golok an Arloedh?’ 20Pan glewas Moyses hemma, ev a veu pes da.
Currently Selected:
Levitikus 10: ABK
Highlight
Copy
Compare
Share
Want to have your highlights saved across all your devices? Sign up or sign in
© Kesva an Taves Kernewek 2004, 2024
© Cornish Language Board 2004, 2024
