Levitikus 1
1
An Offrynn Leskys
1An Arloedh a elwis Moyses ha kewsel orto dhiworth tylda an kuntelles, ow leverel, 2Kows orth mebyon Ysrael ha leverel dhedha: Mars eus nebonan ahanowgh a dhrollo offrynn dhe'n Arloedh, drewgh agas offrynn a vestes mes a'n chatel ha mes a'n flokk.
3Mars yw y offrynn offrynn leskys a'n gwarthek, offrynnes ev best gorow heb namm: gwres ev y offrynna orth daras tylda an kuntelles, may kaffo favour dherag an Arloedh. 4Ev a worr y leuv war benn an sakrifis leskys, ha kemmeradow vydh ragdho, dhe wul dehwelyans ragdho. 5Ena ev a ladh an lodhen dherag an Arloedh, ha mebyon Aron, an oferysi, a dhre an goes ha skoellya an goes a-dro war an alter usi ryb daras tylda an kuntelles. 6Ev a groghen an offrynn leskys ha'y dreghi yn rannow. 7Ha mebyon Aron an oferyas a worr tan war an alter hag araya prenn war an tan. 8Mebyon Aron, an oferysi, a aray an rannow, an penn, ha'n blonek war an prenn usi war an tan war an alter. 9Mes y bottys ha'y arrow ev a's golgh yn dowr; ha'n oferyas a lesk pup-tra oll war an alter avel offrynn leskys, offrynn dre dan, sawer plegadow dhe'n Arloedh.
10Mars yw y offrynn a'n flokk, deves po gever, rag sakrifis leskys, ev a dhre best gorow heb namm. 11Ev a'n ladh orth tenewen kledh an alter dherag an Arloedh; ha mebyon Aron, an oferysi, a skoell y woes a-dro war an alter. 12Hag ev a'n tregh yn y rannow, gans y benn ha'y vlonek, ha'n oferyas a's aray war an prenn usi war an tan war an alter. 13Mes ev a wolgh an pottys ha'n garrow gans dowr; ha'n oferyas a dhre oll anodho ha'y leski war an alter. Sakrifis leskys yw, offrynn dre dan, sawer plegadow dhe'n Arloedh.
14Mars yw y offrynn dhe'n Arloedh sakrifis leskys a ydhyn, ena ev a dhre avel offrynn turennow po kelemmi yowynk. 15Ha'n oferyas a'n dre dhe'n alter ha wrestya dhe-ves y benn ha'y leski war an alter; ha'y woes a vydh gweskys yn-mes orth tenewen an alter. 16Ev a gemmer dhe-ves y groth gans y bluvennow ha'y dewlel ryb an alter troha'n howldrevel ryb tyller an lusu. 17Ev a'n skward der an eskelli mes ny wra y ranna yn tien, ha'n oferyas a'n lesk war an alter, war an prenn usi war an tan. Sakrifis leskys yw, offrynn dre dan, sawer plegadow dhe'n Arloedh.
Currently Selected:
Levitikus 1: ABK
Highlight
Copy
Compare
Share
Want to have your highlights saved across all your devices? Sign up or sign in
© Kesva an Taves Kernewek 2004, 2024
© Cornish Language Board 2004, 2024
