Yona 2
2
Salm a Rasyans
1Ena Yona a bysis dhe'n Arloedh y Dhuw yn-mes a dorr an pysk, 2ow leverel,
My a elwis y'm anken war an Arloedh,
hag ev a worthybis dhymm;
yn-mes a dorr Sheol y kriis vy rag gweres,
ha ty a glewas ow lev.
3Ty a'm tewlis y'n downder,
yn kolonn an moryow,
ha'n liv eth a-dro dhymm;
oll dha vordardhow ha'th vordonnow
a dremenas dresov.
4Ha my a leveris, ‘Pellhes ov vy
a-dhiworth dha dhewlagas:
fatell wrav vy mires arta
troha'th tempel sans?’
5An dowrow a dheuth a-dro dhymm bys y'n enev,
an downder a dheuth dresov;
goemmon a veu maylys a-dro dhe'm penn.
6Dhe woeles an menydhyow yth yth vy,
barrys an nor a'm degeas a-derdro bynitha;
mes ty a dhros ow bewnans yn-bann dhiworth an pytt,
A Arloedh ow Duw.
7Pan glamderas ow enev ynnov,
my a borthas kov a'n Arloedh,
ha'm pysadow a dheuth dhis,
dhe'th tempel sans.
8An re a wra vri a idolys euver
a forsak aga thregeredh aga honan.
9Mes my, gans lev a rasyans,
a wra sakrifis dhis;
an pyth a ambosis my a gollenow.
Selwyans yma dhe'n Arloedh.
10Ena an Arloedh a gewsis orth an pysk, hag ev a hwyjas Yona yn-mes war an tir sygh.
Currently Selected:
Yona 2: ABK
Highlight
Copy
Compare
Share
Want to have your highlights saved across all your devices? Sign up or sign in
© Kesva an Taves Kernewek 2004, 2024
© Cornish Language Board 2004, 2024
