Yeremia 21
21
Duw a Nagh Yeremia
1An ger hag a dheuth dhe Yeremia a-dhiworth an Arloedh, pan dhannvonas myghtern Sedekia dhodho Pashhur mab Malkia, ha Sefania mab Maaseya an oferyas, ow leverel, 2‘Govynn, my a'th pys, orth an Arloedh ragon; rag Nebukadnessar myghtern Babylon a werr er agan pynn; martesen an Arloedh a wra gwrians marthys ragon, may kildenno a-dhiworthyn.’
3Ena Yeremia a leveris dhedha, Yndellma hwi a gews dhe Sedekia: 4Yndellma y lever an Arloedh, Duw Ysrael: My a dreyl an arvow bresel usi yn agas diwdhorn, gansa mayth omledhewgh erbynn myghtern Babylon, hag erbynn an Kaldeanys, neb usi ow korheas er dha bynn a-ves dhe'n fosow, ha my a's kuntell yn kres an sita ma. 5Ha my ow honan a omladh er agas pynn gans dorn ystynnys ha bregh grev, yn sorr, hag yn konnar, hag yn sorrvann meur. 6Ha my a wysk annedhysi an sita ma, ha den ha best; i a verow yn pla meur. 7Hag a-wosa, y lever an Arloedh, my a re Sedekia myghtern Yuda, ha'y servysi, ha'n bobel, ha'n re yw hwath yn few y'n sita ma wosa an pla, an kledha ha'n divoetter, bys yn dorn Nebukadnessar myghtern Babylon, hag yn dorn aga eskerens, hag yn dorn an re a hwila aga bewnans. Ev a's gwysk gans min an kledha; ny wra ev aga sparya, na kemmeres truedh, na mersi.
8Ha dhe'n bobel ma y leverydh: Yndellma y lever an Arloedh: Otta, my a worr a-ragowgh an fordh a vewnans ha'n fordh a vernans. 9Seul a vo trigys y'n sita ma a verow gans an kledha, ha gans an divoetter ha gans an pla: mes neb a yn-mes ha kilfia dhe'n Kaldeanys usi yn ow korheas er dha bynn, ev a vew hag y'n jeves y vewnans avel preydh. 10Rag my re worras ow fas erbynn an sita ma rag drog, a-der rag da, yn-medh an Arloedh: res vydh yn dorn myghtern Babylon, hag ev a's lesk gans tan.
Barn war Ji Myghtern Yuda
11Ha rag chi myghtern Yuda lavar: Klewewgh ger an: Arloedh, 12A ji Davydh; yndellma y lever an Arloedh:
Gwra gwirvreus pub myttin,
ha livra a-dhiworth dorn an arwasker
an den a veu robbys,
ma na ello ow honnar yn-mes avel tan,
ha leski, ha ny vydh denvyth dh'y difeudhi,
rag drogedh agas gwriansow.
13Otta, yth esov er dha bynn, a annedhyas an nans,
ha karrek an plen,
y lever an Arloedh;
hwi neb a lever, ‘Piw a yll dos yn-nans er agan pynn?
ha piw a yll entra yn agan annedhow?’
14Mes my a'gas kessydh herwydh frut agas gwriansow,
yn-medh an Arloedh;
ha my a enow tan yn y goeswik,
hag a gowllesk pup-tra a-dro dhodho.
Currently Selected:
Yeremia 21: ABK
Highlight
Copy
Compare
Share
Want to have your highlights saved across all your devices? Sign up or sign in
© Kesva an Taves Kernewek 2004, 2024
© Cornish Language Board 2004, 2024
