Hosea 13
13
Breus an Arloedh war Ysrael
1Pan gewsi Efraym,
yth esa krena;
yth omughelhas yn Ysrael;
mes pan beghas gans Baal
ev a verwis.
2Lemmyn i a beghas hwath moy;
i re wrug ragdha aga honan imajys teudh,
delowyow gwrys a'ga arghans herwydh aga sleyghneth,
i oll an ober a greftoryon.
Leverir anedha, ‘Tus a wra sakrifis;
i a amm dhe leughi!’
3Rakhenna i a vydh avel kommolenn-vyttin,
hag avel an gluth a dremen a-varr,
hag avel us yw hwythys a leur-drushya gans an awel,
hag avel mog a fenester.
4Mes my re beu an Arloedh dha Dhuw
a-ban veus yn pow Ejyp;#13:4 a-ban veus yn pow Ejyp: War-lergh an Septuagint ha my a'th ledyas mes a bow Ejyp.
ny wodhvydhydh Duw vyth a-der my,
ha nyns eus selwador a-der my.
5My a'th wodhya y'n gwylvos,
yn tir a syghter.
6Herwydh an peurwels yw dhedha y fons lenwys;
lenwys vons, ha'ga holonn a veu goethus;
rakhenna i a'm ankevis.
7Ytho my a vydh avel lew dhedha,
avel lewpard ow skolkya ryb an fordh.
8My a dheu er aga fynn avel orses a gollas hy helyn,
ha skwardya aga holonn mes a'ga brest,
hag ena my a's devor avel lewes;
goedhvil a wra aga frega.
9A Ysrael, my a'th tistru:#13:9 my a'th tistru: Ow siwya an Syriek. Ebrow ev a'th tistru. piw a vydh dha wereser?#13:9 piw a vydh dha wereser? Ow siwya an Septuagint ha'n Syriek. Ebrow rag er ow fynn, erbynn dha wereser.
10Ple'ma dha vyghtern, ma'th sawyo?
Ple'ma dha vreusysi yn oll agas sitys,
a leversys anedha, ‘Ro dhymm myghtern ha pennternedh’?
11My a ros dhis myghtern y'm sorr,
ha my a'n kemmeras y'm konnar.
12Kammhynseth Efraym yw maylys,
y begh yw gwithys yn kovadh.
13An paynys a venyn yn lavur a dheu ragdho,
mes ev yw mab anfur;
pan dheu an prys ny yll ev dos
dhe vin konna an brys.
14My a's daspren dhiworth leuv Sheol;
my a's delirv dhiworth ankow.
Ple'mons dha blagys, A ankow?
Ple'ma dha vros, A Sheol?
Truedh a vydh kudhys dhiworth ow dewlagas.
15Kyn hwra ev doen frut yn mysk y vreder,
gwyns an Est a dheu, gwyns an Arloedh
ow tos yn-bann dhiworth an difeyth.
Y fenten a vydh desyghys,
ha'y buth a hesk.
Ev a byll pub lester drudh a'n dresorva.
16Samaria a vydh kessydhys,
rag hi a rebellyas erbynn hy Duw.
I a goedh der an kledha;
aga fleghesigow a vydh terrys dhe demmyn,
ha'ga benynes veghyek a vydh skwardys igor.#13:16 13:16–14:9 yw niverys 14:1-10 y'n tekst ebrow ha'n Septuagint.
Currently Selected:
Hosea 13: ABK
Highlight
Copy
Compare
Share
Want to have your highlights saved across all your devices? Sign up or sign in
© Kesva an Taves Kernewek 2004, 2024
© Cornish Language Board 2004, 2024
