Jenesis 8
8
1Mes Duw a borthas kov a Noy hag oll an bestes, hag oll an chatel esa ganso y'n gorhel ha Duw a wrug dhe wyns tremena war an nor ha bashes veu an dowrow. 2Fentynyow an downder ha fenestri nev a veu stoppyes, ha'n glaw dhiworth nev a veu lettys; 3ha'n dowrow a omdennas heb hedhi dhiworth an tir, ha wosa kans dydh ha hanter-kans an dowrow a veu lehes. 4Hag y'n seythves mis, yn seytegves dydh an mis, an gorhel a bowesas war menydhyow Ararat. 5Ha'n dowrow a besyas lehe bys y'n degves mis. Y'n degves mis, yn kynsa dydh an mis, pennow an menydhyow a veu gwelys.
6Ena dhe benn dew-ugens dydh, Noy a igoras fenester#8:6 fenester: Nyns yw hemma an keth ger ebrow dell usi yn 6:16. an gorhel re wrussa ev gwruthyl, 7ha dannvon yn-mes marghvran, hag yth esa hi ow mos yn-mes ha dehweles bys pan veu desyghys an dowrow dhiworth an tir. 8Ena ev a dhannvonas kolomm dhiworto dhe weles mars o an dowrow lehes dhiworth enep an dor. 9Mes ny gavas an golomm powesva rag godhen hy throes, ha hi a dhehwelis dhodho y'n gorhel, rag y feu an dowrow war enep oll an nor. Ena ev a ystynnas y leuv ha'y hachya, ha'y dri dhodho a-bervedh y'n gorhel, 10Ev a wortas hwath seyth dydh moy. Hag arta ev a dhannvonas an golomm mes a'n gorhel 11Ha'n golomm a dheuth dhodho y'n gorthugher, hag awotta, yth esa delenn oliv yr yn hy ganow, may hwodhva Noy bos an dowrow bashes dhiworth an tir 12Hag ev a wortas hwath seyth dydh moy ha dannvon an golomm yn-mes; ha ny dhehwelis dhodho arta.
13Y'n kynsa blydhen ha hwegh kans, y'n kynsa mis, yn kynsa dydh an mis, y feu an dowrow desyghys dhiworth an nor; ha Noy a gemmeras yn-mes gorher an gorhel ha mires, hag awotta, sygh o enep an dor. 14Hag y'n nessa mis, yn seythves dydh warn ugens an mis, sygh o an nor.
15Ha Duw a gewsis orth Noy, ow leverel, 16‘Ke yn-rag yn-mes a'n gorhel, ty ha'th wreg ha'th vebyon ha gwragedh dha vebyon genes. 17Doro yn-mes genes pub tra vew usi genes, a bub kig, ydhyn ha bestes, pub pryv ow kramya war an nor, may hwrellons hesya yn pals war an nor ha doen frut ha kressya war an nor.’ 18Ytho Noy eth yn-mes, ha'y vebyon ha'y wreg ha gwragedh y vebyon ganso. 19Pub best, pub pryv, pub edhen, ha pup-tra ow kramya war an dor, war-lergh aga hinda, eth yn-mes a'n gorhel.
20Ha Noy a dhrehevis alter dhe'n Arloedh ha kemmeres rann a'n bestes glan ha'n ydhyn glan hag offrynna offrynnow leskys war an alter. 21Ha'n Arloedh a vlasas an sawer plegadow, ha'n Arloedh a leveris yn y golonn, ‘Ny wrav vy mollethi an dor namoy drefenn mab-den; rag drog yw bodh kolonn mab-den a-dhia y yowynkneth. Ny wrav namoy gweskel pub tra vew, dell wrug vy.
22Hedre vo an nor ow pesya,
hasa ha trevas,
yeynder ha toemmder,
hav ha gwav,
dydh ha nos, ny wrons sessya.’
Currently Selected:
Jenesis 8: ABK
Highlight
Share
Copy
Want to have your highlights saved across all your devices? Sign up or sign in
© Kesva an Taves Kernewek 2004, 2023
© Cornish Language Board 2004, 2023