Jenesis 22

Sakrifis Ysak

1Wosa an hwarvosow ma Duw a brovas Abraham ha leverel dhodho, ‘Abraham!’ Hag yn-medh ev, ‘Awottavy.’ 2Yn-medh ev, ‘Kemmer dha vab, dha unn vab Ysak a gerydh, ha ke dhe bow Moria ha'y offra ena avel offrynn leskys war onan an menydhyow a lavarav dhis.’ 3Ytho Abraham a sevis yn-bann ternos a-varr, dibra y asen, ha kemmeres dew a'y wer yowynk ganso hag Ysak y vab. Hag ev a droghas an keunys rag an offrynn leskys, ha sevel ha mos dhe'n tyller a leveris Duw dhodho. 4An tressa dydh, Abraham a dhrehevis y dhewlagas ha gweles an tyller a-bell. 5Hag yn-medh Abraham dh'y wer yowynk, ‘Gortewgh omma gans an asen ha my ha'n maw a vynn mos enos ha gordhya, ha dehweles dhywgh arta.’ 6Hag Abraham a gemmeras keunys an offrynn leskys ha'y worra war Ysak y vab. Ev a gemmeras an tan y'n y dhorn ha kollell hag i eth aga dew war-barth. 7Hag Ysak a gewsis orth Abraham y das ha leverel, ‘Ow thas!’ Hag ev a leveris, ‘Ottavy, ow mab.’ Yn-medh ev, ‘Otta an tan ha'n keunys, mes ple'ma'n oen rag an offrynn leskys?’ 8Hag yn-medh Abraham, ‘Duw y honan a brovi an oen rag offrynn leskys, ow mab.’ Ytho i eth aga dew war-barth.

9Pan dheuthons dhe'n tyller a leveris Duw dhodho, Abraham a dhrehevis alter, hag araya an keunys, ha kelmi Ysak y vab, ha'y worra war an alter a-ugh an keunys. 10Abraham a ystynnas y dhorn ha kemmeres an gollell dhe ladha y vab. 11Mes el an Arloedh a elwis dhodho mes a nev ha leverel, ‘Abraham, Abraham!’ Hag yn-medh ev, ‘Ottavy.’ 12Yn-medh ev, ‘Na ystynn dha dhorn war an maw, na gul travyth dhodho, rag lemmyn my a woer ty dhe berthi own a Dhuw, a-ban na wruss'ta skonya a ri dhymm dha vab, dha unn vab.’ 13Hag Abraham a dhrehevis y dhewlagas hag awotta, war y lergh hordh maglennys der y gern yn prysk. Hag Abraham eth ha kemmeres an hordh ha'y offrynna avel offrynn leskys yn le y vab. 14Abraham a elwis hanow an tyller na ‘An Arloedh a brovi,’ dell yw leverys bys y'n jydh hedhyw, ‘War venydh an Arloedh y fydh proviys.’

15El an Arloedh a elwis dhe Abraham mes a'n nevow an nessa torn. 16Hag ev a leveris, ‘Ren ow honan, my re dos,’ yn-medh an Arloedh, ‘rag ty re wrug an dra ma ha ny skonsys ri dha vab, dha unn vab, 17my a wra dha venniga yn surredi, ha kressya dha has kepar ha ster an nevow ha kepar ha'n tewes war dreth an mor, ha'th has a wra erita yet y eskerens. 18Hag y'th has y fydh kenedhlow oll y'n norvys owth omvenniga, rag ty re woslowas orth ow lev.’ 19Ena Abraham a dhehwelis dh'y dus yowynk hag i a sevis yn-bann ha mos war-barth dhe Beer-sheba, hag yth esa Abraham trigys yn Beer-sheba.

20Lemmyn wosa an taklow ma, y feu derivys dhe Abraham ow leverel, ‘Awotta, Milka, hi ynwedh, re dhineythis mebyon dhe'th vroder Nahor, 21Us, y gynsa-genys ha Buz y vroder ha Kemuel, tas Aram, 22ha Kesed ha Hazo ha Pildash ha Yidlaf ha Bethuel.’ 23Bethuel a dhineythis Rebeka. Milka a dhineythis an eth ma dhe Nahor, broder Abraham. 24Ha'y iswreg, Reuma hy hanow, a dhineythis ynwedh Tebagh ha Gaham ha Tahash ha Maaka.

Currently Selected:

Jenesis 22: ABK

Highlight

Compare

Copy